¹ Kemá Póroma keráwáqá Yéntairiq-wayukayabae-te ánná-naupaqa máune. keráwáqtábábówana Îtu Káríqtoma kemmá ánná-naupaqa tiyúkaiye. ² É paámi itéq kemmá Îtogoma yaímma wení íráqô-tataaqa tímíkaiqtaba tíwáqnaa-ónúne. ³ Paá min-áúbábí áqa agayéq kemá timátímikaunama Îtogoma wení aúpáq-yátááqá tiráátiraiye. ⁴ Min-áúbámá yoraúma itéq kemô áaimma átáma itánúnayaba Îtogo-ní aúpáq-yátááqá wení timákarai-naqtabae. ⁵ Naayóbáqá máqe-uráá kayukama min-aúpáq-yátááqtábá íma ítaraane. Miráimanibo íbêqa Îtogo-ní aokaq timáyíkarai kayukagaraq wení Ápotoro-anna wáyúkágáráq Îtogo-ní Aokaq-Áágómá yiráátiraiye. ⁶ Min-áté-áímmá minnáe. min-ánó-qtátááqá Îtuma pááq umátíkaraiqtaayaba Yéqtaaeo-wayukama Îtogo-nopake keqtááráá-umá kanaaráq mayánówe. Yeráwáqá mimórá-ánnámá ketáátê mááe. Máqtemma árain-aimma Îtogo akoqnáá-umá timá tíkaraiqtaama yemá ketêtaa íbêqa kanaaráq mayánówe. ⁷ Îtogo kemá Póromma mamá mórama wení timáyíkarai-kayukabi tíkaraitaq miráipowaq átê-wataama Îtuma keqtááyábá umátíkarain-aimma kétune. Îtogoma wení íráqô-tataapike yaímma tiména wení akoqnáágo kepí mayaí kémayaiye. ⁸ Kemá Îtogo-ní wayúkama yeráwá-píké anómma íma máune. 'Imiye. Kemá paá yinaaé kéune. Miráimanibo Îtogo kemmá máqte-kayuka-bike yabititaq minnáyaba timuqá kémaraune. Kemá Yéntairiq-wayukama abarokáq timá-yimikaae téna kateko-yátááqá Îtu Káríqtoqtaba kemmá Îtogoma timátíkaraiye. Mi-kátékó-yátááqá Îtuqtaba uyátá-maqma anómma wáipowata ketááí watáayaba minnáma íma kanaaráq tenúnatae. ⁹ Îtogo wení aúpáq-yátááqtábá kemá máqten-aayapaq-wayukama timáyimikaae téna kemmá timátíkaraiye. Naayóbáqá mamin-áúpáq-yátááqá máqte-kanaaraqa Îtogo-ní aúyánápí aúyoqma wáqe-urena wemá máqte-tataaqa tarôq urái-nare. ¹⁰ Miráimanibo wemá íbêqa akoqnáá-wayukagaraq náápaa-kayukagaraq ketáámá Îtun-anaaé kéwarauna-wayukanapo yemmá wení itaí-yátááqá kéyiraatiye. ¹¹ Maa-márámá íma tarôquréna Îtogoma nói-qtataarabi maa-márábímmá pááq-íniye téna aúyánámmá ítaraiye. íbêqa wemá abarokáq ketááí uyátárai-nakoma Îtu Káríqtoma wení mayaíráké mamá pááq kéiye. ¹² Íbêq-kanaama ketáámá náayubi Îtu Káríqton-aama wáráanna-wayukataama Îtogo-te watáá-wataa kanaaráq tenanatáá Îtogo keqtáámá ítátikaniqtaae. ¹³ Abo kemá kaarabútimo wéqo tútiqo matáunayabamibo keráwáqá Îtumma íma ayuwéraq yáqtóráaro. Kemá mami-tútíq-yátááqtábá keráwáqá uyátá-maqma akoqnáá ígáae-téqa kémayaune. Keráwáqô akoqnáá-umá máiyana Îtogo keráwáqtábá amuqá matikániye. ¹⁴ Ketibotáámá Îtogoma wení aúpáq-áúyánámmá kemá túyánámmá kéiteq wekáq tiraayutaúmmá káyaone. ¹⁵ Máqten-annama maa-márábíkáráq Îtogo-ní márûpakaraq yeqtíwîqa yeqtí náápaakaraq Îtogoma yímikaiye. ¹⁶ Îtogoma wení akoqnáábike tirunóbáqá wení Aokaq-Áágómmá mayaígáae-téqa keráwáqtí tíyaqa akoqnáá umátikeq minnáyaba nunamupí keráwáqtábá kétune. ¹⁷ Kemo nunamupí kétune, minnâ keráwáti timaakakíraq Îtuma keráwáte tirupimmá máinaq abo keráwáqtí mái-yataakoma Îtu-ni akaí-yátáápí tínuqa yaamá aqkoqnáá-inowe. ¹⁸ Mirá-ínaq Îtu-ní akáígómá keráwátábáá-garaq máqtemma Îtogo-ní árai-kayukaraaqo náaraqo ínnaama, wení ayáátááqo utái-karaq, mémánóbáqo kukái-karaq abo wení awaara-karaq ayáátáqa ítaama táágainowe. ¹⁹ Mirá-ínaq keráwáq-pímmá Îtogo-ni íráqó tataagoma anóniq-ikae-teq nunamupí kétune. ²⁰ Îtogo-ní akoqnáá-yataakoma ketáábímmô kéinanama mamin-ákóqnáá-ráq ketááí túyánákáráq ketááí inaa tí-yátáákáráq uyátá-maqma tarôq-íniye. ²¹ Ketáámá Îtogo-ní ánnábike-kayukama Îtu Káríqtoqtabama wekáq “tíkáiye” téqtaa wenáwîqa aati-aatimá matúq-matuq-umá múte kéyauyunatae. Araine.