¹ Keráwáqá íma Ísiraeriq-annabike-kayukao, kúmiqa akátuwe Îtogo-ní a ámáan-aimma akatépoaq Îtogo-ní aúrakaq pukáa-wayukaraa umá máqe-uraae. ² Naayóbáqá maa márágón-áaimma wakááne. Sáqtaanima waátá-aaikoni kawáá-nákó maéna abo wemá waayúkama Îtogo-ní ámáan-aimma akáte-kayukama yeráwáqtí yúyánámmá Sáqtaanima yabitiráiye. ³ Naayóbáqá ketáámá máqtemma Ítíráaeo-wayukagaraq Sááqtaani aammá waréqtaa abo túgoma iqtábáé téqtaa miráráá-uráunataae. Túgoma wenápáqá koyágu-yayagu umá táwî-aaimma pááq uráunatae. Miráiqtaba Îtogoma keqtááyábágáráq aatáá tiwááguraiqtaae. ⁴ Áqibo Áánûqtuni paru-yátááqá ôriq-kéena wemá keqtááyábá ôrikaa-umá kákaiye. ⁵ Ketááí kúmiqtababowana anónná táwî-meyamma mamé yínaqtaa puyónúnataa-manibo Îtogo wení tiwiránîn-naqa tímikaiqtaae. Abo minnáyabama wekáq náawabi warénama íbêqa wemá íma puyínîbo Îtogo ókaraq aúwaraimma wemmá amíniye. Ítáaro. Îtogo-ni paru-yátááqtábábóana íbêqa ketáámá ítaa puyónúnataae. ⁶ Îtogo yagaroqtamá wení tiwiraín-náqá Îtu-te min-nákámá keqtááyábá naayóbáqá tirááye, “Anaaékaq yemmá kerátámá atínikeka yabíkáin-akoqnaama Îtogoma yabíkái-marupaqa yiméyúye,” téta tirááyamma íbêqa pááq uráiye. ⁷ Miráitana Îtogo máqte-kayukati yináábútáábi yirááráómmá wení íánatai-iraqo-tataaqa yiráátiniye. Minnâ wení íráqô-tataaqa mimórá íráqô-tataaqa wení tiwiraí-náqá Îtuma keqtáámá timénataa tirátiniye. ⁸ Keráwáqá wemmá itáíq-itaiq-uráápowata Îtogo-ní íráqô-tataaqa keráwáqtí kúmiq-yataapikekaraq puí-yátáápíkégáráq tiwíkaiye. Îtogo-ní íráqô-tataakoma íma mayaíráké matááe. Ímiye. Îtogo keráwáqá ákaq paá tímikaiye. ⁹ Îtogo-ní íráqô-tataaqa anónnáma-étama arawaamá ye-túyánápí “ketááí táaimma uyátáraiye” téta ye-túma múte yauyínômanibo, ¹⁰ Îtogo paá aá tiqtábá aúgeniq-umátíkaraiqtaae. Ketáámá áaimma átáma Îtu-te mánae téqtaama íráqô-mayaimo Îtogomma ákáinaikaa-umá mami-máyáímá aúyaqtikaraiqtaa íbêqa mayánatae. ¹¹ Túyánámmá ítáaro. Keráwáqô matíkaraamma Yéntariq-wayukamowe. Mi-káyúkámá íma Ísíráeriq-wayukae. Ísíráariq-wayukama amégaa yúmáraq ubayammá umáyikaraa kayukae. ¹² Taákaq máráaro. Naayóbáqá kerawáqá Ísíráeriq-annabike Îtuma Mesáíya-nopake nékaq máqe-uraae. Máqte-kayukama yeqtí aúkáapike Ísíráeriq-wayukama Áánûqtuma timáyíkaraimanibo keráwáqá mi-kánááráqá Îtogo-ní timú-timun-aimma Ísíráeriq-wayuka-te wení akoqnáá-aikaraq keráwáqá íma yaímma kéyainaae. Keráwáqá íma móra-yataakaq awé-uréq abo íma Îtogo-te máqe-uraae. ¹³ Miráimanibo íbêqa Îtogo-ní aara iyápóraa-umá mááe. Îtuni naaénápó keráwáqá yabititaq Îtogo-ní waaqókáq irááe. ¹⁴ Mirá téqtaa kétunatae. Îtu Káríqtoma kaayoné-yátáákón áaine. Miráitana wemá Ísíraeriq-wayukagaraq Yéntairiq-wayukagaraq mórabi mamá áíkuyikaraiye. Yéntairiq-wayukagaraq Ísíráaeriq-wayukagaraq yeráwáqtí aúkáapimma naayóbáqá kurumá íma kanaaráq aónai-kuruma Îtuma íbêqa mi-kúrúmmá yawarápatukaiye. Wemá yeráwáqtí kaayoné-yátááqá aúkáiye. ¹⁵ Wemá pukáimma Ísíraeriq-wayukati anón-nakoni ámáan-aimma wemá yawarápama ánatatukaiye. wemá Îtuma Ísíraeriq-wayukagaraq Yéntairiq-wayukati aúkáapi kaayoné-yátááqá mamá yíkaraiye. Wemá aúgekaa-kama tarôq-uréna íma kaayaqíbo kímora tarôq éna pááq uráiye. ¹⁶ Kaapaq-yátáq wenaúma keqtááyábá tiména Ítíráaeo-wayukagaraqYéntairiq-wayukagaraq móra-yubi yíkaraiye. Miráitana ketáámá máqtemma Îtogo tiwíkai-kayukatae. Îtuma yeráwáqtí kaayoné-yátááqá aúkáiye. ¹⁷ Wení kumína-kanaaraq íráqôn-augen-aimma mayaína minnáe. Keráwáqá Yéntairiq-wayukama Îtogo-ní népaq-awaataq máqe-uraamanibo ketáámá Ísíráeriq-wayukama Îtogo-ní waaqókáq máqe-uraunatae. Îtogo-ní kaayoné-yátááqá máqtemma keqtáábí maména tímikaiqtaae. ¹⁸ Îtu Káríqtoma keqtáábí kuménataabowana keráwáqá Yéntairiq-wayukagaraq ketáámá Ísíráeriq-wayukama mimórá-Áókáq-Áágómá mamá matéqtaa ketibotáámá Îtogo-nopaqa yagaroqtamá kanaaráq yenúnatae. ¹⁹ Miráinaq keráwáqá Yéqtaaeo-wayukama íma namuq-wáyúkáráá umá káqo-kayukati marabáqá mááe. Ímiye. íbêqa keráwáqá yabíkái-qtataakoni aménáápáqá keqtááráá éq keráwáqá Îtogo-ní ánná-wayukaraa mááe. ²⁰ Naakáá umá Îtogo-ní Ápótoro-anna wáyúkágáráq Páropeti wayuka yeráwáqá nameyáákan--umá máawaq keráwáqá mitáyaraa-umá mááe. Min-nákóní ábomma Îtu Káríqtowe. ²¹ Îtuma ábokaa kéiteqtaa ketáámá wekáq timammá amúnanataa wemá keqtáá máqtemma yagaroqtamá tíkaraiqtaae. Miráitaqtaa ketáámá yagaroqtamá Îtogo-ní aokaq anó-monoq-nakaa kéunatae. ²² Îtuma keráwáqnápó anó-monoq-namma kéitana Îtogo-ní Aokaq-Áágómá min-ánó-mónóq-náúpáq kémaiye.