¹ Bikpela, yu i bin i stap ples hait bilong mipela long ol taim bilong tumbuna lain i kam inap long mipela. ² Pastaim long ol maunten i no kamap yet, o taim yu no kamapim graun na olgeta samting, yu God Yawe i stap oltaim oltaim. ³ Yu save salim man i go bek long graun na yu save tok olsem," Go bek, yu tumbuna lain bilong man tasol." ⁴ Long 1,000 yia i olsem aste tasol taim em i kam i go na i olsem wasman bilong nait i stap was yet na tulait i kam wan tu tasol. ⁵ Yu save karim ol i go olsem wara tait i kam na kisim ol i go na ol i slip, long monin taim ol i olsem nupela gras i kamap na i kam aut long graun. ⁶ Long monin taim em i save karim na kamap i go bikpela, long abinun em i save dai na i go daun na kamap drai olgeta. ⁷ Tru tumas, belhat bilong yu i pinisim mipela olgeta na bel hevi bilong yu i mekim mipela poret nogut tru. ⁸ Ol nogut insait long bel na tingting bilong mipela yu kamapim na i stap ples klia, ol hait sin bilong mipela i no inap hait long lait bilong yu. ⁹ Laip bilong mipela i save kam na abrus i go aninit long belhat bilong yu, ol yia bilong laip bilong mipela i save kam na i go kwik taim olsem man i rausim stronpela win. ¹⁰ Ol krismas bilong mipela i 70 o 80 tasol sapos mipela i nogat sik na bagarap long bodi, tasol hevi na sori tu i save banisim ol gutpela taim bilong mipela. Tru tumas, ol i save kam i go kwiktaim na laip bilong mipela tu bai i pinis hariap tru. ¹¹ Husat tru i save long olgeta stron bilong belhat bilong yu na belhat bilong yu i wankain long poret bilong yu i stap long mipela? ¹² Olsem na lainim mipela long skelim na luksave long laip bilong mipela yet olsem bai mipela inap i stap wantaim gutpela save na tingting. ¹³ Lukluk ken long mipela, God Yawe! hamas taim bai em i stap? Marimari long ol wokman bilong yu. ¹⁴ Long monin taim yu inapim mipela wantaim promis bilong stretpela pasim bilong yu, olsem bai mipela bel gut na amamas long olgeta de bilong mipela. ¹⁵ Mekim mipela i amamas long tingim ol de pastaim long yu bin givim pen long mipela na tu long ol yia we mipela i bin karim na save long ol kain kain hevi. ¹⁶ Soim ol wokman bilong yu long ol wok bilong yu bai mipela i lukim na ol pikinini bilong mipela i ken lukim olgeta gutpela bilong yu. ¹⁷ Larim bel amamas bilong God Yawe Bikpela i kamap long mipela, mekim kaikai bilong wok bilong han bilong mipela i planti moa, tru tumas, blesim tru wok bilong han bilong mipela.