¹ God Yawe, yu helpim mi, long wanem ol birua i makim laip bilong mi long painim bagarap. ² Mi go insait long ples malomalom, we nogat ples bilong sanap, mi kam insait long wara i daun tru, we wara tait i karamapim mi. ³ Mi krai i go na nogat stron moa, nek bilong mi drai olgeta, ai bilong mi i no inap lukluk moa taim mi weit long yu God Yawe bilong mi. ⁴ Ol lain husat i birua long mi i planti moa olsem het gras bilong mi, ol birua husat i laik rausim mi long yu, ol i birua long mi nating; mi bai givim bek wanem samting mi no stilim. ⁵ God Yawe yu save long olgeta giaman tingting na pasin bilong mi, ol sin bilong mi i no hait long ai bilong yu. ⁶ I no ken larim ol lain husat i putim tingting long yu i kisim sem long ol pasin bilong mi, Bikpela God Yawe antap long ol ensel na noken larim ol lain husat i painim yu i kisim sem long ol pasin bilong mi, God Yawe bilong ol Israel. ⁷ Long gutpela bilong nem bilong yu ol man i tok hat na daunim mi, sem i karamapim pes bilong mi olgeta. ⁸ Mi kamap olsem narapela man long ai bilong ol brata bilong mi, mi kamap olsem man bilong narapela hap long ol pikinini bilong mama bilong mi. ⁹ Bel kirap bilong haus bilong yu i pulimapim mi, tok hat bilong ol lain husat i tok stron long yu i pundaun antap long mi. ¹⁰ Taim mi krai na i no kisim kaikai, ol i tok nogutim mi. ¹¹ Taim mi kisim hap laplap na wokim klos bilong mi, mi kamap wanpela kain stori long ol. ¹² Ol lain husat i save sindaun long dua bilong banis i go insait long biktaun i save stori planti long mi, nem bilong mi i kamap song ol spakman i save singim. ¹³ Tasol prea bilong mi bai i go antap long yu, long dispela taim bai yu harim, God Yawe, long dispela taim bai yu tok orait, bai yu bekim mi insait long trupela na pasin bilong kisim bek. ¹⁴ Pulim mi kam aut long graun malomalom, noken larim mi lus insait long en, kisim mi i go longwe long ol lain husat i belhat long mi na kisim bek mi long ol wara i daun tumas. ¹⁵ Noken larim wara tait i karamapim mi na noken larim daun bilong wara i daunim mi. Noken larim hul bilong graun i pasim maus bilong em taim mi stap insait. ¹⁶ Bekim askim bilong mi, God Yawe, bilong wanem pasin bilong yu long stap tru long kontrak bilong yu i gutpela, bilong wanem marimari bilong yu i planti tumas, tanim pes bilong yu kam long mi. ¹⁷ Noken haitim pes bilong yu long wokman bilong yu, bilong wanem mi stap long bikpela bagarap tru, bekim tok bilong mi kwiktaim. ¹⁸ Yu kam long mi na baim bek mi. Long han bilong ol birua bilong mi, yu kisim bek mi. ¹⁹ Yu save long ol tok hat bilong mi, ol sem bilong mi na ol tok i daunim mi, olgeta birua bilong mi i stap long pes bilong yu. ²⁰ Tok hat i brukim bel bilong mi na mi pulap wantaim planti hevi, mi painim wanpela long tok sori long mi tasol i nogat wanpela, mi painim wanpela i mas mekim gut long mi, tasol mi no painim. ²¹ Ol i putim posin long kaikai na givim mi na taim nek bilong mi i drai ol i givim mi wara i pait long mi drin. ²² Mekim tebol bilong ol i kamap olsem kalabus bilong ol, larim taim ol i ting ol i stap gut, larim ol i stap kalabus. ²³ Larim tudak i pasim ai bilong ol bai ol i no inap lukim, oltaim mekim sangana bilong ol i seksek planti. ²⁴ Kapsaitim hevi bilong bel nogut bilong yu antap long ol, larim paia bilong bel hat bilong yu i painim na daunim ol. ²⁵ Larim ples bilong ol i kamap ples nating, noken larim wanpela man i stap insait long haus sel bilong ol. ²⁶ Bilong wanem ol i givim pen na bagarapim dispela husat yu daunim, ol i mekim ken ol pasin bilong givim hevi. Yu mekim long ol lain yu givim sua na pen long ol. ²⁷ Sutim tok long ol long ol bin mekim planti sin i hait long bel bilong ol, noken larim ol i kam insait long stretpela pait yu winim pinis. ²⁸ Rausim ol long Buk bilong Laip na bai nem bilong ol i no ken stap wantaim ol stretpela man. ²⁹ Tasol mi i no gat planti samting na mi pulap long sori; larim sori bilong yu i kisim bek mi, God Yawe i apim mi i go antap tru. ³⁰ Bai mi litimapim nem bilong GodYawe wantaim song na bai mi apim em wantaim tok tenkyu. ³¹ Dispela bai i givim bikpela amamas long God Yawe moa long ol bulmakau i gat kom na lek i bruk long en. ³² Bel bilong ol lain husat i stap stret i bin lukim na ol i amamas, yupela ol husat i painim God Yawe, larim bel bilong yupela i stap stret. ³³ God Yawe i save harim krai bilong ol lain husait i sot na em i no save givim baksait long ol man husat i stap kalabus man bilong em. ³⁴ Heven na Graun i mas litimapim nem bilong em, wantaim ol solwara na olgeta ol samting i go i kam insait long em. ³⁵ God Yawe bai kisim bek Saion na wokim ken ol biktaun bilong Juda, ol manmeri bai i stap insait long en na bai i kamap olgeta bilong ol. ³⁶ Ol lain tumbuna bilong ol wokman bilong em bai i kisim, ol lain husat i laikim nem bilong ol bai i stap insait long em.