¹ God Yawe, yu God bilong mi na mi bai liptimapim nem bilong yu, long wanem, yu bin mekim ol gutpela samting long mi, ol samting yu bin tingting long mekim long taim i go pinis, wantaim strongpela bel na tingting. ² Yu i bin mekim biktaun i bagarap nogut tru, nogat man i stap long en na ol man long narapela hap i no pret long kam long dispela biktaun. ³ Olsem na ol strongpela manmeri bai i givim biknem long yu na biktaun bilong ol kantri i nogat marimari bai i pret long yu. ⁴ Yu bin kamap olsem ples hait bilong ol trangu lain na kamap haus bilong ol lain husait i save sot long planti samting. Yu stap olsem haus long taim bilong bikpela ren na strongpela win na haitim ol long hot bilong san. Taim ol lain i nogat strong i pulim win olsem bikpela ren na strongpela win long banis, ⁵ na i kamap olsem hot bilong san long ples drai, yu daunim nois bilong ol lain bilong narapela hap, olsem klaut i pasim ai bilong san na daunim hot bilong en. Dispela em i bekim singsing bilong ol lain i no gat marimari. ⁶ Long dispela maunten Saion bai God Yawe papa bilong olgeta samting i mekim bikpela kaikai wantaim ol fatpela kaikai samting, wantaim ol gutpela ol wain, wantaim ol gutpela abus mit na ol gutpela dring, long olgeta manmeri. ⁷ Antap long dispela maunten Saion, em bai i bagarapim olgeta samting i save karamapim na haitim ol manmeri, dispela laplap ol i samapim na karamapim olgeta kantri. ⁸ Em bai i daunim dai na bai i pinis olgeta na Bikpela God Yawe bai i rausim ai wara long ai bilong olgeta, dispela bel hevi bilong ol manmeri bilong em, em bai i rausim long graun olsem God Yawe i tok. ⁹ Long dispela taim ol bai i tok olsem, "Lukim, dispela em i God bilong mipela, mipela i bin weit long em na em bai kisim bek mipela. Dispela em God Yawe, mipela i bin wetim em, bai mipela i kalap kalap na amamas long em i kisim bek mipela." ¹⁰ Long dispela maunten Saion long Jerusalem han bilong God Yawe bai i kam daun na ol lain Moab bai i pundaun long lek bilong ol birua olsem hap klos i pundaun insait long hul i pulap wantaim pekpek. ¹¹ Ol bai i opim han bilong ol namel long dispela pekpek olsem ol lain bilong swim i redi long swim tasol God Yawe bai i putim biknem na ol kainkain save bilong ol i go daun. ¹² Dispela strongpela banis bilong yu i go antap tru, bai em i brukim i go daun long graun na bai i kamap das.