¹ Devit i wokim ol haus bilong em yet long biktaun bilong Devit. Em i redim wanpela ples long wokim haus sel long putim bokis kontrak bilong God Yawe. ² Bihain Devit i tokim ol olsem, ol Livai tasol bai karim bokis kontrak, long wanem God Yawe i makim ol long karim bokis kontrak bilong God Yawe na mekim ol wok i go long em oltaim oltaim. ³ Bihain Devit i bungim olgeta Israel long Jerusalem, long karim bokis kontrak bilong God Yawe i kam antap long ples em i redim long en. ⁴ Devit i bungim ol lain tumbuna pikinini bilong Aron na ol Livai. ⁵ Long lain tumbuna pikinini bilong Kohat, i gat wanpela het man nem bilong em Uriel wantaim 120 man long lain famili bilong em. ⁶ Long lain tumbuna pikinini bilong Merari, i gat wanpela het man nem bilong em Asaia wantaim 220 man long lain famili bilong em. ⁷ Long lain tumbuna pikinini bilong Gesom, i gat wanpela hetman nem bilong em Joel wantaim 130 man long lain famili bilong em. ⁸ Long lain tumbuna pikinini bilong Elisapan, i gat wanpela hetman nem bilong em Semaia wantaim 200 man long lain famili bilong em. ⁹ Long lain tumbuna pikinini bilong Ebron, i gat wanpela hetman nem bilong em Eliel wantaim 80 man long lain famili bilong em. ¹⁰ Long lain tumbuna pikinini bilong Usiel, i gat wanpela hetman, nem bilong em Aminadab wantaim 112 man long lain famili bilong em. ¹¹ Devit i singautim tupela pris, Sadok na Abiata na ol Livai Uriel, Asiaia, Joel, Shemaia, Eliel na Aminadab. ¹² Na em i tokim ol olsem, yupela i hetman bilong ol lain pikinini tumbuna bilong Livai. Yupela i mas stretim na mekim yupela yet i klin, yupela wantaim ol brata bilong yupela bilong wanem, bai yupela i kisim bokis kontrak bilong God Yawe, em God Yawe bilong Israel, i kam long ples mi redim long en. ¹³ Namba wan taim yupela i no karim. Long dispela as tasol God Yawe, God yawe bilong yumi i bel hevi na birua long yumi bilong wanem, yumi no painim em na bihainim tok promis bilong em. ¹⁴ Olsem na ol pris na ol Livai i stretim na mekim ol yet klin long karim bokis kontrak bilong God Yawe, em i God Yawe bilong ol Israel. ¹⁵ Olsem na ol Livai i karim bokis kontrak bilong God wantaim ol diwai bilong sanapim, long solda bilong ol, olsem God i tokim Moses,long bihainim olsem lo bilong God Yawe i tok. ¹⁶ Devit i tokim ol het man bilong ol Livai long makim ol brata bilong ol, husat i save mekim musik wantaim ol samting bilong mekim musik, na ol musik i gat string na ol hap na plet kapa bras long mekim bikpela nois long musik na song bilong amamas na singaut bikpela. ¹⁷ Na ol Livai i makim Heman pikinini man bilong Joel na wanpela brata bilong em , Asaf em pikinini bilong Berekia. Na tu ol makim ol lain tumbuna bilong Merari na Etan, Pikinini bilong Kusaia. ¹⁸ Wantaim ol em namba two lain man olsem Sakaria, Jasiel, Semiramot, Jaiel, Uni, Eliab, Benaiah, Messeia, Matitia, Elipelehu, Mikaneia, Obet Idom na Jaiel, ol man bilong was long geit. ¹⁹ Heman, Asap na Etan em ol lain bilong mekim musik, ol i makim ol long mekim bikpela nois long bras pleit. ²⁰ Sakaria, Asiel, Semiramot, Jaiel, Uni, Eliab, Maseia na Benaia i mekim musik i gat string, ol i makim long Alamot. ²¹ Matitia, Elipelehu, Mikneia, Obet Idom, Jeiel na Asasia em ol lain i go pas wantaim ol hap ol i makim long Seminit. ²² Kenania em hetman bilong ol Livai, em i go pas long mekim song long wanem em tisa bilong lainim ol man long mekim musik. ²³ Berekia na Elkana tupela i stap wasman bilong bokis kontrak. ²⁴ Sebania, Josapat, Nataniel, Amasai, Sekaria, Benaia na Eliesa em ol pris i go pas long bokis kontrak bilong God Yawe na winim biugel. Obet, Idom na Jehiah i stap wasman bilong bokis kontrak. ²⁵ Olsem na Devit, ol hetman bilong Israel na ol ofisa husat i bosim ol 1000 moa soldia, ol i go long haus bilong Obet Idom na kisim bokis kontrak bilong God Yawe i kam aut wantaim amamas. ²⁶ Taim God i helpim ol Livai husat i wok long karim bokis kontrak bilong God Yawe, ol i kilim 7- pela man bulmakau na 7- pela man sipsip long givim ofa long God Yawe. ²⁷ Devit i bilas wantaim longpela naispela kolos, wankain long ol Livai husat i karim bokis kontrak, ol man bilong singim song na Kenania, hetman bilong singim song wantaim ol man bilong singim song. Devit i putim naispela kolos. ²⁸ Na olgeta Israel i kisim bokis kontrak bilong God Yawe i kam antap wantaim bikpela singaut amamas na mekim nois bilong hon na biugel wantaim ol plet na tu ol gita i gat string na ol hap. ²⁹ Taim ol Israel i kisim bokis kontrak bilong God Yawe i kam insait long biktaun bilong Devit, Misel pikinini meri bilong king Sol i lukluk i go autsait long windua bilong haus bilong em. Na em i lukim king Devit i amamas na danis. Em i les tru long em long bel bilong em.