¹ King Hiram bilong taun Tair i salim sampela ofisa bilong em i kam long Devit. Na tu em i salim ol diwai sida, ol kamda na man bilong wok long ston, bilong ol i ken wokim haus bilong Devit. ² Devit i save olsem God Yawe yet i bin makim em olsem king bilong ol manmeri bilong Israel na God yet i laik litimapim na lukautim ol manmeri bilong Israel. ³ Devit i stap long taun Jerusalem, Devit i kisim planti meri na em i kamap papa bilong planti pikinini man na meri. ⁴ Dispela em ol nem bilong ol pikinini man bilong Devit husat i bin kamap long em long Jerusalem, Nem bilong ol i olsem Samua, Sobap, Natan, Solomon, ⁵ Iphar, Elisua, Elpelet ⁶ Nagah, Naphegi, Japhia ⁷ Elisam, Beeliada na Eliphelet. ⁸ Taim ol Filistia i harim olsem ol Israel i makim Devit i kamap king bilong ol, ol i kam long painim king Devit, tasol Devit i kisim ol soldia na i go pait long ol. ⁹ Na ol Filistia i kam long ples daun Refaim na ol i mekim nogut long ol manmeri long dispela hap. ¹⁰ Orait Devit i askim God Yawe na i tok " Inap mi i go pait long ol Filistia o nogat? Bai yu givim ol birua long han bilong mi o nogat? God Yawe i tokim em, "Yes, yu ken i go na pait wantaim ol, mi bai helpim yu long winim pait" ¹¹ Ol i kam antap long wanpela ples ol i kolim Baal Perasi na Devit i winim ol Filistia. Na Davit i tok olsem "God Yawe bilong mi em i kam olsem, tait wara na i brukim ol birua bilong mi long han bilong mi. "Olsem na em i kolim dispela ples Baal Perasi. ¹² Ol Filistia i lusim ol giaman god bilong ol na i ranawe i go na Devit i tok na ol i kukim ol dispela ol giaman god. ¹³ Tasol bihain ol Filistia i kam bek long dispela ples daun Refaim na i bagarapim ol manmeri ken. ¹⁴ Orait na Devit i askim God Yawe ken. Na God Yawe i tok," Nau yupela i noken go stret, tasol yupela i mas go long baksait bilong ol na redi long pait long ples ol diwai balsam i stap long en. ¹⁵ Taim yupela i harim nois bilong ol man i wokabaut antap long het bilong ol diwai balsam, yupela i mas save olsem mi God Yawe bilong yupela i go paslain long yupela. Olsem na yupela i mas go na pait long ol Filistia." ¹⁶ Orait Devit i mekim olsem God Yawe i bin tokim em long en. Na em i ronim ol Filistia long ples Gibeon i go inap long ples Gesa. ¹⁷ Olsem na biknem bilong Devit i go kamap long olgeta hap graun na God Yawe i mekim olgeta manmeri i pret long Devit.