¹ Ihuba bi ubara tibakero bira nantiara, biba nai kai'a bainti hampata Kidoroni batuka u'itaini bura. Mini bo naho baubaro biba nai kai'a bainti hampata bira'i uri'etora. ² Bi baintiba Judasiba tabae bira nabutaka kau'u'ira batairaba, biba bata bi nahora taboba, bira nanare airu enta Ihura batakeha bira kai'a bainti bira'i bibaubo taboba. ³ Mintubo, Judasiba i'oka bainti batakero mono nabu'i ra'ikiaka kai'a bainti bata Parisi bainti bata tintakero bi batukara'i bura. Bika i'oka hika batake iha umpi bare bira'ira bura. ⁴ Bi entara, Ihuba baka tabora nanahika bira'a obarai'iaina, biba abu abu'akero bi baintikaini biro tiharo, "Ne tarare rantebariabo?" ⁵ Tumanta bika bira tibami tiha, "Nasaretini haina Ihurama rante bauro ti." Tubaro Ihuba bika tiba nimiro tiharo, "Te ma bikabe tiro." Judasiba bata i'oka bainti hampata himpiro baura tabae Ihura bitakero nabutaka kau'u'ira kairaba. ⁶ Ihuba bika tibanimiro tiharo, "Te ma bikabe tiro," Bika anirante araihai bii bataini hi'irubabura. ⁷ Mintubo biba e'a anirante bika irero tiharo, "Ne tarare rante bariabo?" Tumanta bika anirante tiha, "Nasaretini haina Ihurabe." ⁸ Ihuba anirante tibanimiro tiharo. Te baka ni tibanimi tiha te ma bikabema turo. Ne tiriara rantaibera, ma hinikia baintika a'ira kaimanta buate." ⁹ Bihaikaba obarai'ira baka ubabano baira'ama aitaraibo, biba nai anirante tintekerobe, "Kiama te boru bata are ti timiana a'ira kauro." ¹⁰ Saimoni Pitaba nai ihai bataira lo'ikero pirisi iata bainti kai'a bainti kau'u tanarai bai atora te'a kora. Bi kai'a baintira autu Marakusirabe. ¹¹ Ihuba Pitara tibamiro tiharo, "ihai nai uta'i rubatane tiro. Bi kapura ti Oba ti timirabe, kiae te bira'i narabe nane?" ¹² Mintumanta Romuni haina i'oka bainti bata iata bainti bata, Juda i'oka bainti Ihura uata bare na'unta barake bira rumpa tora. ¹³ Bika bira bitabare Anasi binaini bura, bira nanare biba baireba Kaiapasira oba aituaba baumanta. Bi Kaiapasiba bi ihira'ira iata bainti baumanta. ¹⁴ Kaiapasiba Juda batanaka irarahika nimiro tiharo bo'abata ko'eha boha bainti bano utira eka bainti nahenti kia orai'iate tibauba baumnta. ¹⁵ Saimoni Pitaba bata bo kai'a bainti bano Ihura abata bare bura. Bi kai'a baintika Ihura abata bare pirisi iata bainti baura'i ori'etora, bira nanare, pirisi iata bainti bano baka bira tabatobabe. ¹⁶ Mintubo Pitaba enta'ahiro baha'ai baubaro bi pirisira iata bainti bano bira tabatoba, biba anirantero enta'a ra'iki nahentira buru tibamura. Bi nahentiba Pitara bitatero ubika bira'ira berakora. ¹⁷ Mintibo kai'a nahenti enta'a ra'ikiba Pitara tiharo, "Are, ma kia bi baintira kai'a bainti banoe iaro?" BIba tiharo, kia te bi bainti kaube tiro." ¹⁸ Bi entara batuka bano antomanta iata bainti kai'a bainti bata huru bainti bata himpi baiha iha bo uara tara'a tari baubaro. Pitaba bata bika hampata himpi baiharo iha tari baura. ¹⁹ Pirisi iata bainti Ihura nai kai'a baintiara ireha biba nai uba bika tiba nimibau ubara bata irora. ²⁰ Ihuba bira tibamiro tiharo, "Te a'ira'ama ma batara turo. Eka entama te Juda batanaka mono nabu'i bata tempoli'i bata ruba'ua bibaria manta te tibanimi bauro. Kiama te bo uba bata kuke'ake turo." ²¹ Nanahare are ti iraro? Ma bainti nahentika irane taukae ti uba iriaka. Tabane, ma bainti nanahika te tibanimuna bika tabama tabo. ²² Ihuba bi ubara tibo, huru uatai bantiba bira aumanto himpi baiba nai kau'u nohai Ihura ariharo tiharo, "Are nantibae pirisi iata bainti bano uba tira kia iriaro?" ²³ Ihuba bira anirantero tibamiro tiharo, "Te tenta uba'a kia ko'eirera, bohika kia te ko'eiaina ne tiate. Mintima, te ko'e ubama turo, ne nanahare ti ariuabo?" 24 Mintibo Anasiba Ihura iata bainti Kaiapasiraini atitobaro bura. Biba na'unta rumpatara ariraba Kaipasi binaini bura. ²⁵ Bi entara Saimoni Pitaba bira'a himpiro iha uaratara'a nai baata auri baura. Baubaro bo banti bano birara tiharo, "Are bata bika ihaina bobanoe iaro?" Biba nai irikero tiharo, "Kia te bi baintikaube." ²⁶ Pirisi iata bainti kai'a banti bobano tiharo, biba bata Pitaba ato te'a kaira bi antura'i hainababe tiro, "Te kiae ai naho'ira bira batake tabauro?" ²⁷ Pitaba anirantero iribaro kokoraba uba tubaro. ²⁸ Bika Ihura Kaipasira nabu'ihai bitabare Romuni haina kabanara nora nabu'ira bura. To'a tabara umata bika kia kabanara nora nabu'ira ori'etora, bira nanare bika kia orai'abi Nora Pasoba Entai haina kara a'ira kareka. ²⁹ Mintibo Pairati bano bebarero bika irero tiharo, "Nana okara baie ne bi baintira ko amireka iabo?" ³⁰ Bika bira anirante tibami tiha, "Mintiro ma baintiba kia ahu'arira okarara minti'e, kiama tenabu bira ai ka'u'ira amuraitiri." ³¹ Pairati bano bika tibanimiro tiharo, "Ne nenta bira bitaburuke nenta lo'ata bira ko amiate tiro." Juda batanaka bira anirante tibami tiha, kiama tenabu bo bainti aru utuinabe." ³² Bika bi ubara tura bira nanare Ihuba nai tunteke obarai ura, bi ubaba umi'ero nana utira hika banoe bira'a obarai iaina. ³³ Pairati bano kabanara nora nabu'i ori'etero Ihura arobaro orubibo bira irero tiharo, "Are Juda batanaka kini banoe iaro, nanabe?" ³⁴ Ihuba bira anirantero tibamiro tiharo, "Bi irara hikara ti irana are nena irirahika ihairae ti iraro o hinikiaka ai tibamiabae are ti iraro?" ³⁵ Pairati bano bira tibamiro tiharo, "Te Juda batana baintie uro? Ai nina nabuna bainti nahenti bata iata bainti batama ai ti ka'u'ira timiabo. Are nanahika barare bika mintiabo?" ³⁶ Ihuba bira tibamiro tiharo, "Ti kindomu kia ma bataraiauma baibo. Ti kindomu ma batarai bariare timanta, ti kai'a bainti tiriara i'oka ra'uke kiama ti bitake Juda batanaka kau'ira nimiatirio. Iboma, Ti kindomu, kia ma bataraiaube." ³⁷ Pairati bano bira tibamiro tiharo, "Are kini banoe iaro?" Ihuba bira tibamiro tiharo, "Are nenama tiriara kinirabe tiaro. Bi kai'ara ti noba ti batataikabe, te ma batarai tubuna boha kai'a birara tubunabe, u'a uba tiaina birarabe. Eka bainti u'a uba abatakama ti uba iri bariabo." ³⁸ Pairati bano bira irero tiharo, "U'a uba bira nanahabe tiro?" Biba bi ubara tibo, biba anirantero baha'a Juda batanaka unaini bebarero bika tibanimiro tiharo, "Kiama te bo a'u haika bi baintira'ira ranteke tabauro tiro. ³⁹ Iboma ne nenta okara batara te bata abate baunabe eka nora pasoba enta. Bo karabusi bainti a'ira atite bauro bibaira. Mintima te Juda kinirae barakairo ni inaini buanarobe?" ⁴⁰ Bika anirante naberai tibake tiha, "Kia bi baintiraube, Barabasira barabeba kane." Barabasiba bainti iahikara muara raraukeharo barebai baintibabe.