¹ Tema u'a waini katari bauro, ti Obama naho bira oba baibo. ² Bibama eka waini katari kara bano ti'a baiharo kia kara iraina a'ini barakanarobe. Bibama eka waini katari kara te'ake abu abu'a tairo katari bano airu kara iranarorabe. ³ Ne taku'uma buabo, bira nanare, ne baka te uba tuna ne iriarabe. ⁴ Ne ti'a tataubi'ema, te bata ni'a tatauma birabe. Katari karabano kiama kara iranarobe biba kia waini katari'a tataubiro bairaba. Boha'ariroma baibo, ne bata airu karama irebarabe ne ti'ata tataubi baibera. ⁵ Te tentama waini kataribe, nema waini katari kara bo'arama bariabo, Mintiro bo bainti bano ti'a tataubi'e te bira'a tatau buaina, biba airu karama iranarobe. Ne kia ti'a tataubi baibera, kiama ne bohika bata obarai'i barabe. ⁶ Mintiro bo bainti bano kia ti'a tatau biraba, bika katari karabano aharu'a bina temakema bira a'u kebarabe, bika bi karara iha'ira a'u kaibaroma ihabano bira ekama ita kanarobe. ⁷ Mintira ne ti'a bata ti uba'a bata tatau bibo ti uba bano ni'ira baira ne nanahikara antu'ari iraira, ne barebarabe. ⁸ Bi okararama ti Oba nora autuma baranarobe, ne airu kara irehama ti kai'a bainti baibariate. ⁹ Ti Oba ti antu'arima te bata niara antu'aruro. Mintira ne bata ti antu'arira bira'i bariate. ¹⁰ Ne ti lo abatairara, ne ti antu arira'i baihama te ti Ora lo abateha bira antu'arira'i baunatebi baibarabe. ¹¹ Te bi ubara niara tuna ti uahara hikabano ni hampata baira ne uahara hika'a pmi'ama bibarabe. ¹² Ma bira ti lobe, te niara antu'aruna boha 'arakema ne bata bokara antu'aruate. ¹³ Kiama bo bainti bano nora antu'a batero nai ara'ora nai mara'ura kaka'iairaba baibo. ¹⁴ Ekahika te niara mintiate tunahikara ne mintiha baibera ne ti ara'oma baibarabe. ¹⁵ Kiama te niara kai'a baintibe tirabe, bira nanare, kai'a bainti bano kiama tabaibo bira nora bainti bano nanahika mintira. Te niara ti ara'obema turo, bira nanare, ekahika te ti Orai hai iruna bihairama te ni tiba nimibauro. ¹⁶ Kiama ne ti makimi'a tabo, mintima tema ni makimi'a tauro ne biha kara ira terabe, ni kara biba babo. Mintiboma ne nanahikare ti autu'a ti Ora iraibo, biba ni nimianarobe. ¹⁷ Ma bi ubara ni nimuna, ne bainti nahenti bokara bo'akema antu'aruatema turo. ¹⁸ Mintira bainti nahenti bataihai ni nabutai irama, ne tabate baka bika ti nabutai iakama ni bata mintiabo. ¹⁹ Mintira ne ma batarai haina bainti nahenti bo'ara baibera, batai haina bainti niara antu'aribaima ne bika okarama minti baibarabe. Iboma kia ne ma batarai haina kaube te ni makimi'ate niara ma baraihai a'ini aitarate turaukabe bi okararama bika ni nabutai ibariabo. ²⁰ Ne anirante iriate te baka ni uba tibanimuna, "Kai'a bainti bano kiama nai ra'ikirara atara kaibo.' Mintira bika ti orai'a timitaika, bika ni bata orai'ama nimitebarabe; bika ti uba iriareti ni uba bata iria tirio. ²¹ Bira ekahika bika nini mintira ti autuarama mintibarabe, bira nanare, bika kiama tababo tabae ti atitamanta tubuna. ²² Kia te tubi bika tibanimiare tura, kiama bika kumi batatirio; iboma bate bika nai kumi kuke'e araba kiama barianarobe. ²³ Mintiro bo bainti bano ti nabutai'iraba, biba ti Ora batama nabutai'ibo. ²⁴ Minti'e te bo bainti bano kia mintina kai'ara bika abutana kia te mintiai, kiama bika kumi batebarabe, iboma bate bika tabehama tihanta Oka nabutai'i bariabo. ²⁵ Bi okaraba obarai'ira baka nai lo'ira uba araruataba bibama bate a'ira'a obarai'a bibo. Bi ubaba mintiroma baibo, 'Bika ti uminama nabutai ibaibarabe tia ubaba. ²⁶ Kaha'ira hikabano ani'ema, te tenta Orai hai barakairoma ni inaini tubuanarobe. Bira U'a Uba'i tibai Aihorabe, biba ti Orai hairo tubiroma bibama ti kai'ara bata tiba o'ai ianarobe. ²⁷ Ne batama ti kai'ara hiniki bainti nahenti kaini tiba o'ai inabe, bira nanare, ne baka tibatake bariakabe.