¹ "Kia ne kaibo ni auha bano mararaire. Ne Kotira'a mara'ura utiha ti'a bata mara'ura utuate. ² Ti Ora nabu'i airu kaba'arama baibo, kia mintiro baimanta, te ni tibama nimurai tiri, bira nanare te ni batuka heno'irema buro. ³ Minti'e te ni batuka oru heno'ate, te orurante ni tubu bitakai ne ti batakema oru bibareabe. Taie te bariainanaima, ne bata tibatake baibarabe. ⁴ Ne te buina arara tabatabo, " ⁵ Tomasiba Ihurara tiharo, "Nora baubo tiro, kiama tenabu tabauro taie are bireba iananai. Tenabu bi arara nantiakee tabarabe?" ⁶ Ihuba bira tibamiro tiharo, te tentama ara bauro, te tentama u'a uba tibariaka bahama te tenta'ima mara'ura nimi bariaka bata bauro. Kiama bo bainti bano ti Oba inanaini anianarobe, bika ti'a nane anima ti Oba inanai bibarabe. ⁷ Ne ti tabareti, ne ti Ora bata tabatirima. Bate ne bira tabema bira taba kankoma tabo." ⁸ Pilipiba Ihura tibamiro tiharo, Norabaubo, are nena Ora tinabu umi'airoma tinabu antu'a bata ho'ama timitaire tiro. ⁹ Ihuba birara tiharo, Pilipio tiro, te aikanti bukai enta baurama kiama are ti taba kanko iaro tiro? Ta baintibae ti tabairaba, biba ti Ora bata tabama taibo. Nantie ne tiha, 'Nena Ora tinabu umi'ane tiabo'? ¹⁰ Kiama are mara'ura utuaro te ti Ora'ira bauro ti Oba ti'ira baira? Eka uba te ni tibanimi bauna, kia te tenta irirahika ihai ni tiba nimuro. Kiabe. Ti Oba ti'ira baiba bibama bi kai'ara barebaibo. ¹¹ Ne ti'a ara'ura utireka tiriara nai Ora'i baibo tibake mara'ura utuate, ti Oba ti'ira baibo tiate. Kiairera, te kai'a barauna'a ne mara'ura utuate. ¹² U'ai'akema, te ni tibanimuro, bainti tabae ti'a mara'ura utiraba, biba te baraina kai'arama baranarobe. Biba bo'abatama nora kai'a baranarobe, bira nanare te tenta Oba inainima buro. ¹³ Ne bohikara ti autu'a irai'e, te mitiairoma ti Oba nora autu Baiinti'a hiroma baranarobe. ¹⁴ Mintira nanahikara ne ti irai'e te mintirabe. ¹⁵ Mintira ne tiriara u'ai'ake antu'aribera, ti uba lo'ira baira ne abatebarabe. ¹⁶ Te tenta Orai nunabu tiairoma biba bo Kaha'ira hika ni nimiro kempu kai'a nimiteroma ni hampata eka enta barianarobe. ¹⁷ Bira u'a uba tibai Aihorabe. Bainti nahenti bataihai kiama bika bira barebarabe bira nanare kiama bika kankomake bira tabebarabe. Mintima ne bira tabamatabo, bira nanare biba ni batakero baiharoma biba ni'irama barianarobe. ¹⁸ Te kiama ni a'ira kai umina baibarabe. Te ni inaini orurante tubuainabe. ¹⁹ Abo enta baibo bainti nahenti bataihai kia ti tabera iboma ne'aima ti tabebarabe. Bira nanare, te mara'urama bauro mintima ne bata mara'urama baibarbe. ²⁰ Bi entarama ne tabebarabe te tenta Okanti baura. Ne ti'ira bari amanta, te ni'irama bauro. ²¹ Bainti bano ti lo tataukero uatero abataina, bi baintiba ti bo'akeroma antu'aribo, bainti bano ti antu'arira ti Oba bata birara antu'ama aruanarobe. Te birara antu'arima bira te tentama umi'arabe." ²² Judasiba (kia Iskarioti baube) Ihurara tiharo, "Nora baubo tiro, nantibae are nena tinabu umi'era bataihaina bainti nahenti kia numi'enabe?" ²³ Ihuba bira uba anirante tibamiro tiharo, "Mintiro bainti bano ti u'ai'akero antu ariraba biba ti uba abatanarobe. Ti Oba bata birara antu ari'ema tehanta bira batakema tubu bairabe. ²⁴ Bainti bano kia tiriara antu ariraba kiama biba ti uba bata abatanarobe. Bi ubara ne iriara kia ti ubaube. kiabe, ti Oba ti atitaimanta tubuna bira ubabe. ²⁵ Te ni batake baiha, te ni bi haikarara tibama nimuro. ²⁶ Iboma, Aiho Bainti ni kaha'iana Baintira ti Oba ti autu'ama barakairo tubuanarobe. Biba ni numi'ero mintirama ne ekahika te ni tiba nimunarara iribabe. ²⁷ Te iha'ara auhama ni batake kema te tenta iha'ara auhama ni nimuro. Te kia batai haina bainti nahenti nimia tekeauma nimuro. Mintira kia ne kaibo ni auha bano mararaira, ne etarahika'a mpi'a buate. ²⁸ Ne iriabo bi ubara te ni tibanimi tiha, 'Te ni kema buro te orurantema ni inaini tubuainabe tuna.' Ne tiriara antu'aribera, ne tiriara uahebarabe bira nanare te tenta Oba inaima buainabe. Ti Oba abuni baiharoma ti bata atarama kaibo. ²⁹ Bihaikaba kia obarai'i manta te baka ni tiba nimunabe, bihaikaba obarai'irama, ne mara'ura utibabe ti. ³⁰ Kiama te airi uba bo'abata ni batake tiainabe, ma batarai haina iata bainti bano bate anibo. Kiama aikaro bira baibo ti baramuntubi kaina. ³¹ Iboma batai haina bainti nahenti tabebarabe te tenta Orara antu arihama ti Oba nanahika mintiane ti haikarama te minti bauro. Mintira, ne himpi'e tenabu ma batukara tutare."