¹ Kaga yakarandondova, tigeva Tave Yagarama kina taema pigo ema tigeva tinorivagi kasava aviyoma. ² "Tinorivagi imendapindi mikenae." Mapa amarusa puvaya kasa utamaranda kasae Anutu va iye, ³ "Tigeva avima aegara kive kagava tigeva mambarapa e'ero kanata mikivewe." ⁴ Tigeva tava varava, tigeva yakarandondomi indava a'a egu yioma ayugu imoena pusanagaya. Kamba ema, tigeva araketa ena puitama Tavemanda posenda kasa oimiyoma. ⁵ Tige eriya kina mitava, tigeva mambavisa evarimba ikivi kasava ogima egara kenaema mo tiyekuru enayaga imendapindi mima, kanda maema araketa eriya ando pikena ema. Tigeva ige ikive kasava ogima egara kenae mo kamasamba Mesia kasa egaravesamba. ⁶ Tigeva eva kinami kasava aviyoma mo tipasa pundiginipa, a'a iyorata eriyapa apiyoma e'e musepota kenamapa. Kamba ema, tigeva amenda pindi mima mo Mesia da eriya wakina kandama, pigo ema tigeva Anutu auma egama tinda maima egara kenae. ⁷ Tigeva kaga tindarasa eriyatipa piyoma, tigeva Tavemati puvesamba mo mambavisa yagara mamdava kambaya. ⁸ Tigeva mayamba napiyiyoma, mo nana ogiena kakawina pikivipa, mo kaumeyanda kinano mo wasuwa kinano, eva Tave matisa amudanava maekie. ⁹ Piyamba kana tigeva eva kinapa, tigeva ogiena poitaiyoma kaomeyanda kina kapa. Tigeva iyekuruenava a'a poitaiyoma. Tigeva napiyiyoma Taveremba manda kumati mindemipa eva ige tape tae tape evarene pigo ema kagapa kamasamba ayikikie mo aukaga enava kamba wikie. ¹⁰ Pigo kamana ayavi kenava, tigeva Tavema esegiena wapindi esegima asikenae. ¹¹ Tigeva Anutu da kaga ayaema maena kukena wapa maema igi kenae, pigo tigeva sata da toma toma kaka eriya napiena wapa ogai kivewe, ¹² Nana viema, taeva kamba mambavisa yagara migeva maenava punema, kamba ema, taeva inda waemage, mo toma toma kambaraga awamusa amage, mo inata minda awamusa mima toma toma tunusu wanda mo mandari migaite eva vumamima. ¹³ Pigo ema Anutu da kaga ayamaena kukena wapa maema igi yiyoma, kaeva pindagava esegima asikivenema ivasa kambaraga kana pindiva. Tigeva piya piyoma, pigo ema tigeva esegima asikive ema. ¹⁴ Asima ka maena yagarama maena vindi wakena ogerita asima miyemisamba. Tigeva taga kasava maema kandi igina kisuma kiyoma, pigo araketa agova maema kaivirasa ilegu dana pikenae. ¹⁵ Pigo asi asiyagava asimamima agoya agoya kasa utamaranda isukenara, pipa maema kagisa visa sugakandama igima. ¹⁶ Kanayaga toma toma dana avorakinapa, kamatitienava yawa tekandama u'urima, pindanava mo kambaraga yagara manda yaku giriwa maema igasu ikenae. ¹⁷ Tigeva napi kenaema Anutu va ago metivavuritaema mo tave tavaremba kandama pigo tigeva Anutu kasava u'urikena ema, pipa Awamusa amanda agasuga makara gane. ¹⁸ Asi asiyagava nunu uma Awamusa Yagara manda esegiena wakaga ga aviga kenae. Asi asiyagava tigeva kavima mima ogima apasa vikenaema, mo Anutu kinata nunumu undinipa. ¹⁹ Tigeva naekagava nunumuva undini, kanayaga Anutu kamana namikivi dagava pigo nawamupa awima,naeva esegi puma asima kakanda isapisa kamanapa avorama ukuema. ²⁰ Naeva Mesia da awamu dagara minduema pina agoga naeva kalavusi naman gama akaena vindi minduema. Pinyambaka naeva isapisa kamanapa esegima ukuema pipa pavigo pikenaena puema. ²¹ Nagana rakane Taikikus, Tavemanda ogi eriya puvie, kaga ena mandaga urimikie, tigeva aga kive ema ayamba miduema. ²² Naeva pina agoga epa tigeva isa gauwagana kanatae, tigeva agakive ema tasigeva ayamba paya mindusema, pipa tige ena tinda esegi venoma. ²³ Paruvaru tindava nagana tigege wikiema, timatiti enavindisa wasana avuga kenaenava Anutu Tavaremba tisa mekana kiema mo Tave remba Isu Mesia tisage. ²⁴ Anutu da ago yaenawapa tigege wikiema kendo Taveremba Isu Mesia kaga avugavemi nageva kamba asorisaripuma mo wasana avugakenae nawake.