¹ Tifac tionano, iyeci manda andakin yandintenafi, Acyun Aunic awacwac namakaci ofauranaci yeweken ukukano. Ayokuficure daficdewaci wano, eyandawakac mamam makantin yandinono. ² Enaic umani ofaureqaci Jisasin awayani awkurono. ³ Maya warani amoyinaniwe, weyani umaci tintemi. ⁴ Maya wenic yokarani amoyemi iyewakaci ena tamino. ⁵ Maya maya weni umani wenafoyaci marano. ⁶ Iyeci ayokuc waric ukano wani tamintenafi, wen namakaci ayokuc waraci marano. ⁷ Eyani umac iyewaci teno, Koctimi iyewaci umac tiankanonamino. Wanta weni ne yunan ayunaci yokantenafi, mini yunan akam manami kicdinonamino. ⁸ Manda anda uwandei manda ayaci anankayini wanami maranonamino. Iyeci Acyun Aunic indintac anecne intefono, weni ayokuc andanda wanana wam wani amintemino. ⁹ Ayokuc anda uwararani iyewakaci afokano, wemi ukackenin nurami mini anomi koyinona mino. ¹⁰ Maken ayokuc waric mukekuna kakakci, Koctinkimi yinduni munkeyouni umacdemi ikeunamac ayokuc andawaci uwanyinkano. ¹¹ Tiyamponi mana iyena afaruci tarecumpe. ¹² Mana wukac yimoyeyouni anda ackecyanowani tamintenono. Mini andan uwareyomi, Jisasin awitac umar iye mararani mini uwarantenono. ¹³ Yinda akecyeyouni lo iyewaci awakurenono, iken yinda akecyarayaci miniwan yimoyiranono. ¹⁴ Teni iyewaci timoyonuntecumpe, teni timoyonunai Jisasinic pukirani timoyontecumpe, micnenimponi mana makakackena manda andauci tinduntimi weninuc kipasinkemino. ¹⁵ Yinda akecyantekafe iyec akecyantekafe mini anon onaric iyewakac oko. Wanta wen anduni waecdemi oyam wani afakanona, minin anon andandaino. ¹⁶ Mini andandauci yinduntinke awakureyouni, nanayin namac akun anecne yen nanamaci wantemino. Yeni puka Israiriuci weni Koctin indam wantenono. ¹⁷ Ten tukaci wenin tifuruci micnuraci teni Jisasinic yokar intam wecumpo, ena umaruwac iyewaci timeko. ¹⁸ Tifaconano Iyenonic awacwaci iken namaci wantemino. Pukawe.