¹ Pita nuc Yoni nuc banta anasiuc mam baya siyimami, prisiuc namac mam mac kac dafitam bainta namac Sadusiuc namaci ye van kac yeraeno. ² Pita nuc Yoni nuc banta anasiuc tisin eni Jisasi fukagen ukukanani siyimanani, yeni anon umani mareno. ³ Acdekac ayufun karani ini, ena banuran antegarani yeni makantanda fakareni karavusi mac kimi dumuman deno. ⁴ Amucna inimbaintauc mini baya indireni birivic eno, birivic on inimbaintauc amucnaice ureni 5,000 amami undaeno. ⁵ Ena banurami yenyic dafisiruc namac, anonic ugam baintauc namac lo gin indin dukam baintauc namac Yerusaremi magusim baguyeno. ⁶ Yicnom prisi Anasi minigaci bami, Kaiafasi na Yoni na Aleksenda na yicnom prisin ankun kinke macde minigaci bano. ⁷ Yeni Pita nuc Yoni nuc ye yicbanac kim mandan deni, indaeno, "Iyenic eran poyafi haca iyen avic kinaci mána anecne uvaregafono?" ⁸ Afo Pita, Ayo Inta ben kin uvikaimi, beni siyimemi, "Yigeni banta anasiu yic acnam baintauc namac yicnom baintauci bamino, ⁹ Afo mage mana nurane, bende koc kac ukukaunai, avoguc avucavac ac bainta uankarec, inkenic urenaci mana bainta ayofan marenafino sirec yigena inda ane. ¹⁰ Ecanaci yige macde Israeriuc inimbaintauc yigeni yic indintim bino, mana bainta yigen yugampac ac bac iye duken ukukagane, beni Jisas kraisi Nasareti kena bainta avic kimi ayofan mandemi ukukagemino, bemi yigeni dunkin yasac iyemponi aruman fucdami, afo fukan kinke Koti bemi ukuka ankemino. ¹¹ Mana mini onacbami Jisas Kraisi mini onacbam baci yigeni mac uvaram baintauci yicnaenic urami, bemi apurintinkena onacbanici ugemino. ¹² Iye kipan yaum marani ena bainta vac iyem bemino, nevaraino, inarun agantim ena yivic bac iyem bemino." ¹³ Afo Yeni yonani Pita nuc Yoni nuc iye fegani eran namaci baya seno, yeni fayam baintauci beni, siguru vac iye sigauni bami yeni mini van indemi, yemi yigan dani, Pita nuc Yoni nuc yonani bani Jisasi namaci bageno. ¹⁴ Nevarai, yeni yonani ayofan mandukam bainta yenamac ukukagani, yeni mini van a sinayonic iyen uyinkemi. ¹⁵ Afo yeni kansoro bagusinke yekanda siyinkareni, ye yiran baya seno. ¹⁶ Yeni seni, "Ne anecne mána bainta ganda uvanyinkanuno? nevaraino, yeni enac ugan avucavaci uvadani macde Yerusaremi magusinke onarukenone, afo yigeunamac amankac iyen ayofantecumpe. ¹⁷ Afo mini baya banta anasiuc kim ben yen iye ino vani, yicya yigeunamac yen yiman yimic dana mini avic kac sire banta anasiuc iye siyimego." ¹⁸ Afo yekanda yaraman deni Jisasin avic kim banta anasiuc iye siyimegovani yiman yimeno. ¹⁹ Afo Pita nuc Yoni nuc yemi yevege siyimeno, "Yigenafo daindec onago. Koti ogan kac amankagigac intenafino yigen yivaya avakundec Kotin avaya ecanane? ²⁰ Yenamac onarec induna anecneu gana siyimenuna asapac amankac iyen ecantecumpe." ²¹ Ena yacbac Pita nuc Yoni nuc yiman yimicdeni, ecani yeni beno. Yeni mána anecne mandaic urukanayon afakare uman yimirani indemifo iyen afakeno, nevarai, Pita nuc Yoni nuc mini avucavac uvaranani macden inimbaintauc Kotin avic yanic evano. ²² Ayofana maram bainta beni 40 orande vaci yankagarem bami. ²³ Pita nuc Yoni nuc utuc dani yeyic bantauc kimi oraeni yicnom prisiuc namac yicnom baintauc macden baya yema siyimenuci yemi maro siyimeno. ²⁴ Yeni mini bayauc indireni, managimi yivan deni Kotin areno, Iyeno o, eni inaruna, magava, nona, macden anecne minigim banuc bac uvaranamino. ²⁵ Eni Ayo Inta gimi eyic yogam bainta Devitim mayau sifon avantaic senamino, "Nevaraci mapac baintauc yiran anecne mareyafono, afo banta anasiuc manda anecneugan indeyafono? ²⁶ Eni senamino, 'Mana magagakena kinuc namac yicnom baintauc Iyenon nuc Kraisi nuc namac yiruirani managim baguyeno.' ²⁷ Fuga ugamino, Heroti nuc Pontius Pailatin nuc namac mapac inimbaintauc namac Israeri inimbaintauc mana taoni gimi baguyenone. Yeni enic anteckan yogam bainta, ben anon kac basafem bacyirukano, Jisasi namac yiruirani. ²⁸ Ena acnantapac eyic eran po eyic indintim macden anecne micnogo vana uvandukana uvararani managin ye baguyenone. ²⁹ Afo Iyeno o, yeni yiman yimem bayauc naroc onare eyic yogam baintauc eran yimina en avaya siyimago. ³⁰ Ey ayan yiyofanovan agucdanam bevana, enac ugan avucavaguc enic anteckan yogam bainta Jisasin avic kim yimino." ³¹ Afo yeni yugam mukure kiparami, yena baguyugam magugac magun dimi, masicden kimi Ayo Inta uvikani, yeni eram baya ginke Kotin avaya siyimeno. ³² Amucna birivican inimbaintauc mána indintac bac mána yirakaci bano. ³³ Mayavac bena dukan anecneugani beyindave iyen semi, afo yeni macden anecneuc managim bàguyureni, dainde mána mararic manan eno. Aposoriuc onama Iyeno Jisasi fukagen kinke ukukeninani yeni anon eramponi siyimemi, afo benic anon avacbac macden inimbaintauc kimi uvikemi. ³⁴ Macden inimbainta mana mana anecne vandac iroc iyen eno, nevarai, macdem magava maguc sarin ureni mini anecneuc kakena monoc ³⁵ mare aposoriuc yigantimi dani, yeni monoc mandeni dainde macden birivi inimbaintauc iyeuyafi yena amankagic iye ugauni yimimani amankagic uyinkeno. ³⁶ Mána bainta Yosepi, aposoriuc benani Banabasi nen sire avic devano (mini baecdanami Eran Indin Yimevam Baintai), beni Livai ankun kinkenom bemi, Saiprusi magusapaci bagemi, ³⁷ beyic maga sarin uremi monoc mare aposoriuc yigantimi demi.