¹ Mána nuran 3 kiroki ayinkagic emi, yugam mukir acna yimi Pita nuc Yoni nuc mam mac kugusimi umpegeno. ² Afo mana bainta bey anon arac kin agar ayam fukanimi doye mam mac ona Avoguge sire avic dan kaci maro reno. Masicden nurami bemi donare minigac maro ram bemi mam mac kugusin umpegaran uron inimbaintauc pate monoga anecneugani inantevami. ³ Beni yonani Pita nuc Yoni nuc mam mac kin umpegarani uromi, beni anecneugani inantemi. ⁴ Pita nuc Yoni nuc ben ogampen kagacomi, Pita bemi samemi, ''Bende sonano.'' ⁵ Mini bainta anecneuci simintenone indiric uremi ye kanda yonemi. ⁶ Afo Pita semi, ''Seni silva namac kori namac iyen dukecumpe, afo sena dukauna anecne, emi amentecumpe. Jisas Kraisi Nasareti bainta avic kin, ukuke bono." ⁷ Pita ben ayan ugampac, fakaremi kun difitamar ukukarami, eseci mini bainta agar ayan erar uankemi ⁸ karusacen ukukemi mini karere bainta kugandem bemi, Pita nuc Yoni nuc namaci mam mac kimi umpegemi, beni yan karusacen undae gundaue om bemi, Kocti avic yanic emi. ⁹ Macden inimbaintauc bemi onami beni agan darem bemi Kocti avic yanic evami. ¹⁰ Yeni onami Beni Masicden nuram mam magic Avoguc Onagac kumantem banta anasiuc pac anecneugan inantagenim bainta bami. Mini anecne benkac ampamin onarami anonic uremi yemi yigan demi. ¹¹ Masicden inimbaintauc managin iyaye orae onami anonic uremi yemi yogan demi, beni Soromoninic varanda gage sire avic dan kaci Pita nuc Yoni nuc namaci ukukagami. ¹² Afo Pita mini onaremi, banta anasiuc yevegen siyimemi, "Yigeni Israeri inimbaintago, yigeni yinduc iye dogo. Bende kagakec iye bago. Mana anecne bendesic magagakena avucavagic eran poya ukuka ankaunana agan darem benaino. ¹³ Beni Abrahami na, Aisaki na, Jekopiu yic Koctim bemi, yenamac sifo unan yic Koctim, beni beyic yogam bainta Jisasin anon avici amemi. Yigeni bemi yicnaen amicdeci fakaman Pailatin ayan kin dami, beni ecanam bino vani indemino. ¹⁴ Beni Avogugic ugen, Antecken, umandac iye dukam Bainta yigeni yicnaen amicdeci, banta yiruman fugevam bainta yigen yimino vani inantemino. ¹⁵ Yigeni iye kipan yaun yimevam bainta aruman fugomino, bemi Koti fukagenin kinke ukuka ankaraci, mini ic witnasiuci yenamac becyamumumpe. ¹⁶ Micnugami, ben avic poni mana bainta eran mandukaci mage yigeni bemi onamino. Jisasin kim birivicim poni mána bainta ben o avogugic uankarukaci macde yigeni onamino. ¹⁷ Micnugemifo, sifactiva unano, seni indecumpe yigeni iye indirukeci mini anda uvaramino, yigen yinom baintau baci micnenone. ¹⁸ Micnugami, mini anecneugani Koti profetiuc yivantaci benic Kraisi anavisic marananinani bani sirukagenimi, mage minim facbar emino. ¹⁹ Micugemifo yige yindun baegago, Iyenon avakurinaci yigenyic manda andauc ugic yinkano. ²⁰ Micnuranaci Iyeno yige banagon kac yeraenaci eran yimino, beni Kraisin sankanami yintemino, yigema ugacman yinkarukeni, beni Jisasi ino. ²¹ Bem Mánan inarum magu mandan dukanami amankac yevegem macden anecne mandan ukukananin yamuc yintemi, Koti mini vani feyampac beyic anteckan profetiuc yivantac siram bagenimi. ²² Mosasi fuga siremi semi, 'Koti mána sen kacnac ugam profeti yigen yifacyiva unan yicbanac kinke mandani ukukantemino. Yigeni macden anecneugana bena sinaninuc anufaregac indego. ²³ Beni yigen yicbanac bainta bantemino, afo iyefi mini profeti sinanin indiren iye avakuremi, beni mandam marantemino.' ²⁴ Fuga ugane, macden profetiuc Samueri banin kake yemi managac yeraimi, macde anecne mage mana yamuc kin ampaminaninani senone. ²⁵ Yigeni profetiuc yigafandauc bami Koti yigen yinafu unan kaci beyic kontraki simani uyac dukemino, beni Abraheminani semi, 'En agac kinke manan umacdem mána magagakena inimbaintauc avoguc marantenone.' ²⁶ Icnaemi Koti beyic yogam bainta mandan ukukaremi sankarami yigempac nare yemino, avoguc yigen yiminanin ani uvisemi, yigenyic manda andauc ugic yinkemino."