¹ Kara yogeneri igebitsite imatsigenga ira Manasés (pairi ika iriro yoge irisita itomi irasi José), ika iritisati yoge ijita Maquir, pairi ijita obagentsi itomi Manasés irierisati yogege iriri Galaad. Aisati itomigegi Maquir ika sërari sintsirisonori kara intobekari. ² Imatsigengajegi Manasés ikarataigi, Abiazer, Helec, Asriel, Siquem, Hefer aike Semida. Ika iririjegi jitacha serarijegi irasi Manasés itomi José yoñagantagaber kara inirori. ³ Yamëka Zelofeah, itomi irasi Hefer, itomi Galaad, itomi Maquir, aisati itomi Manasés teni paniro irine sërari aisati pini tsinane. Ora obairojegi irisintojegi ojita Malaa, Noa, Hogla, Milka aike Tirsa. ⁴ Oka paretogagari Eleazar ira obantasantatsi, ijita Josué itomi Num, aike ikaratira ikantiri inta obatironta: ikantagenani Moisés pomenaro patiro pigogera nangarageri nirentijegi aroka nagiateri. Ora ikokakena ira natingomi irironta përo tsinanejegi ora pigoge antagasati okarageri ojaririegi aisati iri. ⁵ 10 imonkarage igibatsite imatsigenga Manasés kanta Galaad aike inagetatsi antati nija ojita Jordán, ⁶ ora irisintojegi Manasés pagero patiro omanajiri antagasati otomijegi. Kanta kibatsi ojita Galaad iroro pogegani iragi imatsigengajegi Manasés. ⁷ Ora ikibatsite irasi Manasés yogero arota iraretimaro kanta okaratiri igebitsite inatsi kanta Siquem. Yamë kanta okarati igibatsite kanta tonkegite irianti timatsi aitoni itimagi Tapúa. ⁸ Ora okibatsite Tapúa ironti irasi Manasés yama ora poeboro asi Tapúa katingasati kara ini Manasés ironti pinabeta irasi imatsigengajegi Efraín. ⁹ Kanta okarati pini nija otiomijani kanta Caná. Iriro yomisantagiri imeraroegi antagasati iboeborote Manasés aisati irasigite Efraín. Iritisati ikarati Manasés kanta pasinisotage kara nija otsomijani aro pitsonka ora angaare. ¹⁰ Kanta pitsonka aike ironti irasi Efraín, aike ora kibatsi iroti okarati ini Manasés; aro okaranomiti nija aitomi pitsonka aronibati oretimaro kara Isacar. ¹¹ Aisati aike Isacar aisati Aser, Manasés ikantiro Bet Seán obiro irotoke pasi pogotsi, aisati Ibleam iroti poëborotejegi, ironti irasijegi matsigenga inatsi poëboro ojita Dor aisati ibangojegi, aisati matsigenga aisati Endor aisati pogotsi, aisati matsigengajegi aisati Taanac aisati pogotsi, aisati matsigengajegi Meguido aisati pogotsi (aisati ora mabatatsira ora omisantiro ojita Náfet). ¹² Aisati ira imatsigengajegi Manasés teni irinintagero irakero omisantaigiri, aike itsorokageri kananeosati poeborosati itimaigi kara kibatsige. ¹³ Kara inatsi matsigengajegi Israel ika isintsitasantaganake irirojeki igataigeri ira kananeosati imeratakaro pomirinchiro, aike teni iromonkaratagero antagasati. ¹⁴ Yame ikantiri imatsigengajegi irasi José ikantiri ira Josué, aike: ikane te pomabiritanenaro patiro oka kibatsi patiro pomena pomenaro naroegi tojainina naro antagaisati nagantaigero ira pabati tosorintsi ipenaro ora nigogera. ¹⁵ Josué ikantagiri: obiroka timatsi poeboroke okibe iroronta okibeatsi pijataige kanta anchatosige aro pinetsaige kibatsi pasisonori kanta pinaigi irasi ferezeos aike pingatiro kanta ikebatsitekëra Efraín aike otyomijani pasiegi. ¹⁶ Ira yogometaigi José ikanti onta anchatosi teni ogantomatai eroeki. Aike kananeosati itimi kara jantasonori aike igaroneeki antabagantsi aike koshoro aisati ira timatsi kara Bet Seán irasi timatsi poeboroke aike irirojegi inagatsi kara kibatsige ojita Jezreel. ¹⁷ Yamë Josué ikantiri ibangoke José aisati Efraín aike Manasés: obiro pasi iboeborote okibesonori obairo aike tojaiti pisintsire obiro kero pini paniro kibatsigë arogenta pasinkaro obiro. ¹⁸ Oka Kibatsika irosati pasi aro inabetema anchatosi noporogemiro aike pagabëra obiro iroti okaratiri jantasonori pijogapëri ira kananeosati aro inabetema igaroneegi asi antabagantsi ora koshorisonori aro irinabetena sintsirisonori.