¹ Ora ikasijakeri kara ikebatsiteke irasi imatsigenga José iake irooti jorikanke, yokaganaga irooti Jericoke, kara iniateke irasi Jerigosati, ikaigonake kara inintagakeri, irooti Jerigoke kara pini poeboro aronisati otisi Beterike. ² Aike yokaganaga Beterike irooti Luz yabisane irooti kanta janta yorega Ataroke, kara ikebatsiteke irasi akitasati. ³ Yogakanaga aikero kara iki paba irooti kara ikebatsiteke jafletitasati, yokaganaga irooti igebatsitike. Betel Horon iake irooti Gezer, tsoganka kara onamijage angaare. ⁴ Aike yobetsikanaka iraeki imatsigenga José, Manasés aisati Efraín yakobero ora ipaberi. ⁵ Kara igebatsiteke imatsigenga Efraín kara initakageri ora ikaneri iake yokiataaneri: kara okarati aro ipabari ora ikasijakeri. Aike iake iraooti Atarot aisati ojita Adar irooti Bet Horón aikero kara tonge ⁶ aike iake yokaganaga irooti kara onamijake agare yokaganaga irooti poeboroge jitacha Micmetat, aikero kara iki paba, yapatoitaiga ikegaigaka iriate irooti tanake aisati Siló aike yabisanake janta aronisati Janoake. ⁷ Ipaniaka Janoake yanohanaka irooti Atarot aisati ojita Naarat irooti yarekitega Jericó, aro okarake Joriranke. ⁸ Irooti Tapúa, kara ikebatsiteke iake aikero kara iki paba yareka nijake Caná aro okarape kara onamijake agare. Aro okarape kara ikasijakeri ira imatsigengejeki Efraín, ora initagakeri kara ikasijakeri, ⁹ ikarataiganakeri ira pasiniati kibatsisati ira jaikentsine ikoigakeri irasi imatsigenga Efraín katigasati ikangeri ora igasijakeri imatsigenga Manasés, antakaisati ira poeborokeni aisati kanta janta. ¹⁰ irirojegi teni iriokaigeri ira kananeosati timabetatsa Gezer, irooti itimake kananeosati kara aganisatike irasi Efraín iroto yamaika, karari ira matsigengajegi imerasetaigakari intagaketaikeri yosintsiteri.