¹ Iryo Yesu abwene amabumba, aire parupiri. Iryo aikereko, abakonshi bakwe baishire kuri ye. ² Aiswire akanwa no kubafunda, arandire ati, ³ ''Bariparwa abapina mu mupashi, pantu ubufumu bwa mu muru bwabo. ⁴ Bariparwa abarosha, pantu bakatararikwa. ⁵ Bariparwa abamutembo, pantu bakapyana ikyaro. ⁶ Bariparwa abansara ne kiraka kya burungami, pantu bakaraikuta. ⁷ Bariparwa abaruse, pantu bakapokerera uruse. ⁸ Bariparwa abakaere mu mutima, pantu bakamona Resa. ⁹ Bariparwa abarenga ikibote, pantu baketwa abana bakwa Resa. ¹⁰ Bariparwa abo bonse abafyengerwa pamurandu wa burungami, pantu ubufumu bwa mu muru bwabo. ¹¹ ''Mwariparwa iryo abantu bamipontera no kumipakasa no kurannda ifya kumwamba ifibi ifingi pamurandu waine. ¹² Sekerereni no kusansamuka, pantu ikirambua kyenu kikuru mu muru. Pantu muri iyi ine nshira abantu bapakese bakasesema abariko ribe mwebo tamurabako. ¹³ ''Nimwe mukere wapa kyaro. Rero nga kyakuti umukere wafumuka, kuti wapangwa umukere nakabiri? Tauwamina ikiri kyonse kanofye ukupowa no kunyantwa ku makasa ya bantu. ¹⁴ Nimwe rubuto rwe sonde. Umusumba uwakurwa pa rupiri tekuti ufisame. ¹⁵ Tekuti abantu baashe irampi no kuribika munshi ya museke, rero baribika pamuru no kusanikira onse mu ng'anda. ¹⁶ Rekeni urubuto rwenu rusanike pa bantu mu musango wakuti bamone imikitire yenu iisuma no kurumbanya shinwe uwaba mu muru. ¹⁷ Mwitontonkanya ukuti naisa mukonaura ifunde nangu bakasesema. Nteshire mukobonaura, rero mukubafikirisha. ¹⁸ Pantu ikishinka nkomweba ukuti mpaka umuru ne kyaro fikapite, tapakonaurwe akaritoni nangu akarirembo ukufuma kwi funde, mpaka ifintu fyonse fikafikirishe. ¹⁹ Eikyo uyo onse uwatobapo aka kyepesha parifi fipope no kufunda bambi ukukita ikyo aketwa uwakepesha mu bufumu bwa mu muru. Rero onse uwayasunga no kufunda aketwa umukaramba mu bufumu bwa mu muru. ²⁰ Pantu nkomweba ati kanofye uburungami bwenu bwa kira uburungami bwa bakaremba naba Farise, tamwakengire mu bufumu bwa mu muru. ²¹ Mwaryumfwa ukuti kyarandirwe kuri boo munshita yakare ati, 'Wiraipaya,'kabiri, 'Onse uwaipaya akapeshiwa mubupingushi.' ²² Rero nkomweba nati onse uwafurirwa mu nina akapeshiwa mubupingushi; na onse uwaranda kuri mu nina ati, 'We muntu wa kyabekyabe!' akapeshiwa mukirye; na onse uwaranda ati, 'We kipuba!' akapeshiwa kumuriro wa ngehena. ²³ Eikyo nga ukobika ikya bupe pa burambo eryo waibukisha ukuti mwaripusana na munonko, ²⁴ sha ikyabupe kyobe kuntanshi ya burambo, no kubwereramo. Pakubara bweshanyeni na munonko, eryo kabiri ubwerer no kubika ikyabupe kyobe. ²⁵ Suminishanyeni bwangu bwangu no wamurandu obe iryo muri munshira ya kuya ku kirye kya mirandu, ukubura ikyo uwamirandu obe kuti akurubwira mu minwe yakwa kapingura, kapingura nao mu minwe ya bakarinda, kabiri kuti waposwa mu kifungo. ²⁶ Ikishinka nkomweba, tawakafume murya mpaka ukaripire indarama ya kurekeresha iinono wakongwere. ²⁷ Muryumfwa ukuti kyarandirwe ati, 'Wirakita bukyende.' ²⁸ Rero nkomweba ukuti onse uwaroresha umwanakashi runkumbwa runkumbwa ninshi na kita akare na ye ubukyende mu mutima wakwe. ²⁹ Nga irinso rya ku kuryo kobe ryakurenga ukuipununa, ritonkore no kuriposa ukufuma kuri webo. Pantu kyawama ikirundwa kyobe kimo ukonaika ukukira umubiri onse ukuposwa mu ngehena. ³⁰ Nga ukuboko kobe ukwa ku kuryo kwa kurenga ukuipununa, kuputure no kukuposa ukufuma kuri webo. Pantu kyawama ikirundwa kyobe kimo ukonaika ukukira umubiri obe onse ukuya mu ngahana. ³¹ Nakabiri kyarandirwe ati, 'Onse uwatamfya umukashi, afwire ukumupera ikitupa kya kupwa kwa kyupo.' ³² Rero nko mweba nati onse uwatamfya umukashi, nga takitire ubupurumushi, amurenga ukuba umukyende. Onse uwa mupa panuma ya kutamfiwa akita na ye ubukende. ³³ Nakabiri, mwaryumfwa kyarandirwe kuba mu nshita yakare ukuti, 'Wirarapa ubufi, rero twara umurapo obe kumfumu.' ³⁴ Rero nkomweba, mwirarapa nangu panono, neryo umuru, pantu ekipuna kya kwa Resa; ³⁵ nangu ikyaro, pantu ekinyantiro kya kwa Resa, nangu Yerusalemu, pantu emusumba wa mfumu nkaramba. ³⁶ Wirapa na pamutwe obe, pantu tekuti urenge umushishi ukufita nangu ukubuta. ³⁷ Rero reka ukuranda kobe kube 'Ee, ee,' nangu 'Awe, awe.' Kimbi ukukira pariki kifuma kuri kiwa. ³⁸ Muryumfwa kyarandirwe ati, 'Irinso pa rinso, ne rino pa rino.' ³⁹ Rero nkomweba nati, mwirakantura umubi. Murikyo, uwakuropora kwi saya rya ku kuryo, mwarwire neri nankwe. ⁴⁰ Nga umo akofwaya ukurubura nawebo no kupoka umwingira obe, reka urya muntu apoke ne raya. ⁴¹ Uwakupatikisha ukuya umushinso umo, kabuye nankwe ibiri. ⁴² Pera kuri onse uwakuromba, kabiri witana uukofwaya ukukongora. ⁴³ Mwaryumfwa kyarandirwe ati, 'Mufwire ukutemwa abena muparamano no kupata abarwani benu.' ⁴⁴ Rero nkomweba nati, temweni abarwani benu nokupepera abamikyusha, ⁴⁵ pakurti mwingaba abana bakwa shinwe wa mumuru. Pantu arenga akasuba ukusanikira pababi na ba suma, no kurokesha imfura pabarungami na batari barungami. ⁴⁶ Pantu nga watemwafye abakutemwa, kirambu ndo wingapoka? Bushe tefyo na bakasonkesha bakita? ⁴⁷ Nga uposhafye munonko, kindo ukita ukukira bambi? Bushe tefyo na bena fyaro bakita? ⁴⁸ Eikyo beni abapwiririka, nga fintu shinwe wa mumuru aba uwapwiririka.