¹ Eryo Yesu atungurwirwe mu matororo ku kweshiwa kuri kiwa. ² Iryo arekere ukurya panshiku amakumi yane na makumi yane ubushiku, ariumfwa insara. ³ Awe katunka aishire kuri o no kuranda kuri o, "Ngori Mwana wakwa Resa, nakweba bura iribwe ribe umukate." ⁴ Rero Yesu aryaswike ati, "Kyarirembwa akiti, 'Umuntu teti ekarire ku mukate weka, rero ku kyebo ikifuma ku kanwa ka kwa Resa."' ⁵ Eryo katunka amutwere ku musumba uwashira no kumutwara pamuru we tempere yakikurwa, ⁶ no kuranda kuri o, "Ngori Mwana wa kwa Resa, uiponye panshi, pantu kyarirembwa akiti, 'Akakonkomesha bamaraika bakwe urwa iwe; na, 'Kabiri bakakusendera pa minwi yabo, pakuti wikaipununa urukasa kwibwe."' ⁷ Yesu arandire kuri o, "Kabiri kyarirembwa akiti, 'Wiraesha Shikuru Resa obe."' ⁸ Kabiri, kiwa amutwere pa rupiri urwarepesha no kumuranga yonse amafumu ya pano isonde no bukata bwa yako. ⁹ Arandire kuri o, Fyonse ndekupera, nga wawa no kumpepa." ¹⁰ Eryo Yesu arandire kuri o, "Fuma pa, we kiwa! Pantu kyarirembwa akiti, 'Urepepa Shikuru Resa obe, eo ukaratumika eka. ¹¹ Iryo kiwa amureka, awe apopene, bamaraika baisa no kumutumika. ¹² Nomba iryo Yesu aumfwire ati Yoani bamubika mu munyororo, aya naku Gariri. ¹³ Ati afume ku Nazaret no kuya no kwikara mu Kapenamu, ku ruramba rwa bemba mu Gariri mu mpanga ya Seburoni na Nafutari. ¹⁴ Ifi efyari no kukitikira ifyarandire Isaya kasesema, ¹⁵ "Impanga yakwa Seburoni ne mpanga yakwa Nafutari, inshira ya kuri bemba, kwishirya rya Yodani, Gariri wa bena fyaro! ¹⁶ Abantu abaikere mu mfimfi na bamona urubuto urukaramba, na baikere mu kyaro ne mfimfi ya mfwa, urubuto rwabekirira." ¹⁷ Ukufuma pari irya ine nshita Yesu atampa ukuranda ati, "Rapireni, pantu ubufumu bwa mumuru buri mupepi." ¹⁸ Awe rwareenda mu ruramba rwa bemba wa Gariri, amwene abaume babiri, Simoni uo bakuta Petero, na Andereo ndume yakwe, bareteya amasumbu muri bemba, pantu baparu banswi. ¹⁹ Yesu arandire kuri bo, "Iseni, munkonke, naramipanga abarondo babantu." ²⁰ Parya pene basha amasumbu no kumukonka. ²¹ Awe Yesu ati afumeko kinono amona babiri bambi ba ndume, Yakobo mwana Zebede na Yoani ndume yakwe. Bari mu bwange na wishi Zebede barerundira amasumbu. Abakuta, ²² nabo apopene basha ubwange na wishi wine no kumukonka. ²³ Yesu aire mu Gariri monse, arefunda mu ma Sinagogo, areshimikira imbira nsuma ya bufumu no kuposha amarwere yonse ne fyarekaripa mu bantu. ²⁴ Ururumbi rwakwe rwafika monse mu Sirya, bamuretera abantu bonse abari na marwere yarekana rekana no bukari, na bari nefiwa, na barwere nshisa, na baburebe. Yesu nao abondapa. ²⁵ Nebumba irikuru ryaremukonka abarefuma ku Gariri, ku Dekapori, ku Yerusaremu, ku Yudeya nakwishirya rya Yodan.