Ulwimbo lwakwa Davidi ilyo ali mu matololo ya Yuda. ¹ We Lesa, ala niwe Lesa wandi, ine ndekufwaya, umutima wandi ulekufuluka, no mweo wandi ulekukabila, kwati mushili uwauma ndi umushaba amenshi. ² Ine nalikumona mu cifulo cobe icamushilo, natamba amaka yobe no bucindami bobe. ³ Pantu icitemwiko cobe icishifilwa caliwama ukucila ubumi, eco na kanwa kandi kakulakulumbanya. ⁴ Nakulakulumbanya ilyo ncili umumi, na mwishina lyobe nkalaimya amaboko yandi. ⁵ Umutima wandi ukalaipakisha, ngefyo ucita ku fyakulya ifyanona, nkalaimba ne nyimbo ishakukulumbanya. ⁶ Ilyo ndala pa musengele wandi ine ndakwibukisha, no kutontonkanya pali iwe ubushiku bonse. ⁷ Pantu niwe ungafwa lyonsefye, mu mapindo yobe emo ine nyimbila inyimbo shansansa. ⁸ Umweo wandi wakonena muli iwe, no kuboko kobe ukwa ku kulyo ekuntungilila pakumpususha ⁹ Lelo abafwaya ukulofya umweo wandi bakabalofya, bena bakatelemukila mu calo ca bafwa. ¹⁰ Bakafwila ku lupanga, ne mimbulu ikalya ifitumbi fyabo. ¹¹ Lelo imfumu ikasansamukila muli Lesa, na bonse abalapa mwishina lwakwa Lesa bakamulumbanya, pantu utunwa twa babepa ubufi tukacilikwa.