¹ ku ng'omba ankalamba, mu mubela wa kwa Yedutuni. ilumbo lya kwa Dabidi. Ndolela Lesa eka mu mutalalila; ipusukilo lyandi lifuma kuli ena. ² Ena eka ecilibwe candi kabili ipisukilo lyandi; ecubo candi; kabili nshakatilentenshiwa. ³ Bushe iwe ukaposa inshita shinga ishakucenenapo umuntu, pakuti bonse imwe mumupose panshi, pakumuwisha nge cibumba icatundama, elyo ne cibumba icisokona? ⁴ Bena bafwailishafye inshila shakumufumya pa bukankala bwakwe, no kutemwishafye ukulabepa ubufi. Mu tunwa twabo balelanda amashiwi ya mapaalo, lelo mu mitima yabo ninshi balelapisha.(Selah) ⁵ Sanga ukutuusha muli Lesa eka we mweo wandi, pantu isubilo lyandi litula kuli ena. ⁶ Ena ekafye e cilibwe candi, kabili e pusukilo lyandi, e linga lyandi kabili teti ntelentenshiwe. ⁷ Ipusukilo lyandi no mucinshi wandi fyaba muli Lesa, Lesa e cilibwe candi icamaka ukwakubutukila. ⁸ Mwe bantu, ala lyonsefye mulecetekela Lesa, mulemwishibisha ifili mu mitima yenu, pantu eo tubutukilako. (Selah) ⁹ Abantu yaweyawe baba ngo mupu, abakankala nabo baba ngo bufi. Nga cakuti bonse mwabapima pesekelo tababa nangu cimo, bonse bayanguka ngo mupu. ¹⁰ Mwicetekela mu fyabukakashi, mwilacankilwa fyuma fyabupupu, nangu ifyuma fyenu nga fyafulisha, imwe mwilafibikishako umutima. ¹¹ Kwaba icintu cimo ico Lesa akomailapo, ifintu fibili ifyo naumfwa ifyakutila, niwe Lesa uwamaka yonse, ¹² ne cakuti iwe we Mfumu uli wa citemwiko icishipwa. Cinefye niwe ulambula umuntu ukulingana nefyo acita.