Kuli kembisha mukalamba. Ulwimbo lwakwa Davidi. ¹ Nalitekele umutima ukulolela pali Yawe, nao asuka aumfwa uko ndelila. ² Anjabwile ukufuma mu cilindi icitali nganshi ukufuma mu lutikiti na matipa, elyo anjimika pa mulu wa cilibwe, akosha na makasa yandi. ³ Amfundile no lwimbo ulupya ulwakutasha Lesa wesu. Abantu abengi pakumona ici cintu, bakatendeka ukukwatila Yawe akatiina, kabili bakamutetekela. ⁴ Alishuka umuntu uutetekela muli Yawe, uushibika mano ku bantu abacilumba, abalukila mukupepa imilungu yabufi. ⁵ Ala fyalifulisha we Yawe, Lesa wandi, ifintu ifyakupapa ifyo watucitila. Walipekanya ne nshila ishingi ishakutwafwilamo, nani engafilumbula? Ine ndafwaya ukufishimika no kufilanda, nomba fyalifulisha ukufilondolola. ⁶ Amalambo ne mituulo taufifwaya, lelo wampeela amatwi ayakumfwilako. Amalambo yakoca nangu amalambo ya pa fyabubifi tayakusansamusha nakalya. ⁷ Na ine epakutila, “Mona naisa, ngefyo calembwa palwa ine mu malembo ukuti, ⁸ ukucita ubufwayo bobe ecaba mu mweo wandi we Lesa wandi, ico amafunde yobe yaba mu mutima wandi.” ⁹ Nga fintu waishiba we Yawe, ndalumbula ubulungami bobe mu lukuta lukalamba, nshitalala tondolo. ¹⁰ Nshifisa ubwafwilisho bobe ubwakupususha mu mutima wandi. Ndalondolola pa mulandu wa cishinka cobe pamo no kupususha kobe. Nshifisa ukutemwa kobe ukushifilwa ne cine cobe ku lukuta lukalamba we Yawe. ¹¹ Wileka ukumbelela uluse we Yawe; leka ukutemwa kobe pamo ne cishinka cobe filencingilila. ¹² Imintapendwa ya mafya nayanshinguluka, ububifi bwandi nabufula icakuti ndefilwa no kulolesha. Bwafulisha ukucila mishishi ya ku mutwe wandi, ecakuti no mutima nautompoka. ¹³ Napapata, we Yawe, umpokololeko, wise bwangu mukungafwa, we Yawe. ¹⁴ Uleke bonse abafwaya ukonaula umweo wandi balengwe nsoni. Uleke bafulumuke no kubwelelamo abasebana, bonse abafwaisha ukuti ngonaike. ¹⁵ Uleke bonse abanseka ukuti, “Eya, Eya!” bapeshiwe amano no kututubala. ¹⁶ Lelo leka bonse abakufwaya basangalale no kusekelela muli iwe, kabili bonse abatemwa ipusukilo lyobe inshita yonse baletila, “Yawe asumbulwe!” ¹⁷ Ine ndi mulanda kabili umupina, lekeni imfumu inangulukeko. Niwe kafwa wandi kabili kapokolola wandi, we Lesa wandi wikokola.