¹ Kuli kembisha mukalamba. Ulwimbo lwakwa Davidi kuli Yedutuni. Ine natile, “Nakulasunga imibeele yandi, no kusunga ululimi lwandi ku bubifi. Nalabika inkobelo pa kanwa kandi, mu nshita ndi mu cinso ca babifi.” ² Lelo ilintu nali tondolo, kabili mukutekanya ukwabula ukusosa icisuma nelyo cimo, ukukalipwa kwa mutima muli ine kwalekulilako. ³ Umutima wandi watendeka ukucushiwa, ilintu ncili ndetontonkanya, umutima wakalipa, elyo naisula akanwa nasosa nati, ⁴ “We Yawe leka njishibe impela ya mweo wandi, ne nshiku ishishele ku kupwa kwa mweo wandi, njishibe nefyo ubumi bwandi bucepele. ⁵ Nawipifya inshita yandi iyakwikala pano isonde, pa cinso cobe ubumi bwandi bulifye ubwipi, kuli iwe umweo wa muntu waba ngo mupu.(Selah) ⁶ Umuntu abafye pamo nge cinshingwa, na fyonse fyo acita fyafye, alaitulikila ifyuma ukwabula ukwishiba uukafilya. ⁷ “Nga nomba we mfumu ni cinshi ndelolela, apo isubilo lyandi niwe? ⁸ Mpususha ku mampulu yandi yonse, wileka mbe uwakusebana ku bantu abapumbu. ⁹ Nalaikala tondolo ukwabula ukusosa, pantu niwe wacita ici. ¹⁰ Witwalilila kunkanda, pantu nalafwa ku mpumo sha kuboko kobe. ¹¹ Ulebaula no kukanda umuntu, pa mulandu wa kubifya kwakwe. Ulonaula na fyonse ifisekesha umubifi, kuli iwe umuntu aba ngo mupu.(Selah) ¹² “Kutika ku nkuuta yandi iyabwafwilisho we Yawe, wikomeka matwi yobe ku kulila kwandi. Ico ine ndifye umulendo uulepita, ¹³ umwenifye nga filya ifikolwe fyandi fyali. Uleke ukundolesha no bukali, pakuti mpemwineko ilintu nshilafwa.”