¹ Panuma yesu nafyalwa ku Betelehemu mu Yudeya panshita Herodi aleteka ici calo, Abamano bamo bafumine ku kabanga bafika mu Yelusalemu abati, ² "Bushe umwana afyalwa imfumu yaba Yuda alikwi? Twamwene ulutanda lwakwe kukabanga eico twaisa mukumu pepako ?" ³ Elyo imfumu Herodi yaumfwile ifi yasakamana nganshi, elyo nabena Yelusalemu nabo lumo lwine. ⁴ Elyo Herodi akolonganika bonse bashimapepo mukalamba naba kalemba elyo alabepusha, "Nikwi Kristu ali nofyalilwa?" ⁵ Nabo bamweba abati, "ni mu betelehemu wa mu Yudeya. Pantu efyo nakasesema alemba, ⁶ 'na iwe Betelehemu, wa mucalo cakwa Yuda, tewe wacepesha nakalya muli bakateka bakwa Yuda, pantu ni muli iwe mukafuma intungulushi, iyakucema abantu bandu abena Israelo."' ⁷ Elyo Herodi aita abamano mubumfisolo alabepukisha na panshita ilyo ulutanda lwamonekele. ⁸ Elyo abatuma ukuya ku betelehemu, abeba ati, "Muye ipukisisha bwino bwino palwa uyu mwana. Elyo ngamwamusanga, mukese njishibisha pakuti naine nkaye mupepako." ⁹ Panuma yakumfwa kumfumu, baima balaya elyo ulutanda bamwene ku kabanga lwalaba tangilila lwasuka lwaisa iminina na paali umwana. ¹⁰ Cilya bamona ulutanda, basansamuka nganshi. ¹¹ Baingile mu nga'anda nokumona umwana na nina Maria, Bafukama balamupepa. Bakakula ifyabupe ifikankala basendele bamituula golide, ifyacena cisuma na muri. ¹² Lesa abasoka muciloto abati bebwelela kuli Herodi, eico batola nenshila imbi babwelelamo na kumwabo. ¹³ Cilya abamano abafumine ku kabanga baya, malaika kwakwa shikuli amonekela kuli Yosefu muciloto mikumweba ati, "ima, buula umwana na nyinam butukila ku Egupto. Eko uli nokwikala mpaka nkakwebe, pantu Herodi alefwaya ukonaula umwana." ¹⁴ Nao Yosefu aima abuula umwana na nyina ubushiku alola ku Egupto. ¹⁵ Eko aikele mpaka nemfwa yakwa Herodi. Ifi fyafikilishe efyo imfumu yasosele ukupitila muli kasesema, "Naitile umwana wandi umwaume ukufuma mu Egupto." ¹⁶ Elyo Herodi, amwene ukuti abamano bacenjela, afulwa nganshi. Atuma mu Betelehemu na mu miishi iyali mumbali yonse abakwipaya abana baume bonse abali nemyaka yakufyalwa ibili no kucepapo, ukulingana nomo aumfwilile palwa nshita ku bamano. ¹⁷ Epakufikilisha amasiwi ayo kasesema Yeremia asosele, ¹⁸ "mu Rama mwaumfwika ishiwi lile shinshimukila lyapunama no musowa, Ni Rakeli eulelosha bamwane, nakana nokumutalalika, ico bashilipo." ¹⁹ Ilyo Herodi afwile, moneni, malaika wa mfumu amonekele kuli Yosefe muciloto mu Egupto, amweba ati, ²⁰ "Ima buula umwana na nyina ubwelele ku calo ca Israeli, pantu abalefwaya ukwipaya umwana nabafwa." ²¹ Yosefe epakwima, abula umwana na nyina abwelela na ku calo ca Israeli. ²² Nomba ilyo aumfwile ukuti Akeleo euleteeka mu Yudeya pa malo yakwa wishi Herodi, atiina ukuyako. Elyo kabili Lesa acimusokako mu ciloto, aile ku calo ca Galili ²³ elyo aya ikala na mu musumba uyo batila Nasaleti. Ici cafikilishe ifyasoselwe na bakasesema ukuti, Bakalamwita umwina Nasaleti."