¹ Paulo alolekeshe pali bashicilye no kusosa ati, "bamunyinane, ine nalikala pacinso cakwa Lesa muli Fyonse nakapingu umusuma ukufika na pabushiku buno." ² Shimapepo mukalamba Anania akonkomeshe abo abaiminine mupepi na wene ukumuma pakanwa. ³ Elyo Paulo atile kuli wene ati, "Lesa akakuma naiwe, we cibumba cashingulwa ne mpemba shabuta we. Bushe nawikala kukumupingula umwabela ifunde, lelo uleba ine ukuti ba ngume, ukupinkana ne funde?" ⁴ Abo abaiminine mupepi batile ati, "Bushe ifi efyo uletuka shimapepo mukalamba wakwa Lesa?" ⁵ Paulo atile, "Nshacishiba, mweba munyinane, ukuti aciba nishimapepo mukalamba. Pantu calilembwa aciti, Tawakasose ububi pali kateeka wa bantu bobe." ⁶ Ilyo Paulo amwene ukuti ulubali lumo ulwa cilye bali ba saduki bambi nabo ba Falise, asosele mwishiwi ilikalamba mucilye, "mweba munyinane, ine ndi mu Falise, umwana mwaume waba Falise. Nipa mulandu wakuti alikwata isubilo lya ku bushiwa kwa bafwa eco ndepingwilwa." ⁷ Ilyo asosele ifi, ifikansa fyalitendeke pakati kaba Falise naba Saduki, ne bumba lyali patukenemo. ⁸ Pantu aba Saduki batila takwaba ukubushiwa ku bafwa takwaba ba malaika, kabili takwaba mipashi, lelo aba Falise bena balifishiba ifi fyonse. ⁹ Eico icongo icikalamba calimine na bambi bamo bakalrmba kulubali lwa ba Falise balimine no kutalika, ukusosa, "Ifwe tatusangile ububi nangu bumo noyu mwaume. Nga cakuti mupashi nangu malaika eusosele kuli ena?" ¹⁰ Ilyo palya paimine ifikansa ifikalamba, mushika wafita alitinine ukuti Paulo alasantaulwa mu tupimfya kuli bena, Eico akonkomeshe abashilka ukutentemukila ko no ku musenda ku maka uku mufumya mu cilye, no kumuleta munkambi yabashilika. ¹¹ Ubushiku bwa konkelepo shikulu aiminine mupepi na ena no kusosa, "Ushipefye, nga fintu upele ifishinka pali ine mu Yelusalemu, efyo ufwile wapela ifishinka na mu Roma." ¹² Ilyo bwa cele, aba Yuda bamo bali pangile ibumba mubumfisolo no ku ibika abene mu mulapo, ukusosa abati tabakalye nangu ukunwa icili conse mpaka bakepaye Paulo. ¹³ Bali ubwingi ukucila pa baume amakumi yane aba pangile ili bumba lya mubumfisolo. ¹⁴ Baile kuli bashimapepo mukalamba naba kalamba no kusosa abati, "fwebo natulapa umulapo uukalamba ukukana ilya icili conse pakafye tukepaye Paulo. ¹⁵ Nomba eico bashi cilye bepushe mushika mukalamba wafita. Ukumuleta panshi kuli imwe, kwati mulefwaya ukushininkisha umulandu wakwe bwino bwino. Lelo ifwe, natuiteyanya uku mwipaya ilyo talaisa kuno. ¹⁶ Lelo umwipwa wakwa Paulo umwaume alayumfwile ukuti naba mwikalila balemulolela eico aile kabili aingile munkambi yabashilika no kweba Paulo. ¹⁷ Paulo aitile umo uwamubakalamba bafita no kusosa, "Twala uyu umulumendo kuli mushika wafita pantu nakwata fimo ifya kufisha kuli ena." ¹⁸ Eico mushika wafita abulile umulumendo nokumutwala kuli mushika mukalamba wafita no kusosa, "Paulo umufungwa acinjita, no kunjipusha ukuleta uyu umulumendo kuli imwe. Nakwata ifya kusosa kuli imwe." ¹⁹ Mushika mukalamba wafita amusendele pakuboko ku ncende iya fisemeko noku mwipusha, "Finshi ifyo ukwete ifya kufisha kuli ine?" ²⁰ Umulumendo atile, "Aba Yuda naba suminishanya ukwipusha imwe ukutente musha Paulo mailo ku cilye, bakacita kwati balefwaya ukwipusha bwino bwino pali uyu umulandu. ²¹ Nomba mwikacita ici kuli bena, pantu bali abacilapo amakumi yane abaume aba mulalile ukulolela ena. Nanomba line nabaipekanya, balelolelafye musuminishe." ²² Eico mushika wafita alekele umulumendo ukuya, panuma namu kambisha ukuti, "Wiebako nangu umo ukuti naufisha ifi fintu kuli ine." ²³ Elyo aitile kuli ena bamushika elyo atile, "Pekanyeni abashilika imyanda ibili abapekanishiwa ukuya ku Kesalia na cine lubali abaume bapali bakabalwe, na baume bamafumo imyanda ibili. Mwalaya pa nsa iyalenga shitatu iya bushiku. ²⁴ Kabili alibebele ukupekanya inama iyo Paulo enga bomfya ukwendapo no kumufisha umutende kuli Felikisi umulashi. ²⁵ Elyo alembele inkalata ngefi: ²⁶ "Kilaudi Lusia kuli shimu cindikwa umulashi Felikisi mwapoleni. ²⁷ Uyu umwaume balimwikete aba Yuda kabili bali pakumwipaya elyo nafikile pali bena na bashilika no kumu pusushako, pantu nasangile ukuti ali mwina Roma inkoko. ²⁸ Nafwaile ukwishiba nionshi bamupelele umulandu, eico namusendele ukumutentemusisha kulu bashicilye babo. ²⁹ Nasangile ukuti alipelwe umulandu pa fipusho ifyakumine ifunde lyabo, lelo ukuti takwali umulandu kuli ena uwakumulenga ukufwa nangu ukuposwa mucifungi. ³⁰ Elyo cafishiwe kuli ine ukuti kwali ukumupangila uyu umwaume eico bwangu bwangu mutumine kuli iwe no kukonkomesha abalemupela umulandu ukuleta ifyakushinina fyabo pali ena mu ceni cenu. Shalenipo." ³¹ Eico abashilika bacitile ngo mo baebelwe. Basendele Paulo nokumutwala mu bushiku ku Antipa. ³² Ubushiku bwakonkelepo, abashilika abengi bashile abaume bapali bakabalwe ukuya nankwe kabili bena babwelela mo ku nkambi ya bashika. ³³ Ilyo abaume bapali bakabalwe bafikile ku Kesalia no ku fisha inkalata ku mulashi, kabili ba letele paulo kuli ena. ³⁴ Ilyo umulashi abelengele inkalata, aipwishe citungu nshi paulo afumineko. Ilyo aishibe ukuti afumine ku Kilikia, ³⁵ atile ati, "Ndi noku kumfwikisha bwino ilyo aba lekupeela umulandu nga baisa pano." Elyo akonkomeshe ukumusungila mwisano lya kwa Herodi.