¹ Mu nshiku shilya Abafilisiti balongenye ifita fyabo kukulwisha abena Israeli. Akishi atile kuli Davidi, “Ufwile ukwibukisha ukuti iwe na bantu bobe muli nokunshindika ku bulwi.” ² Dabidi nao atile, “Nomba muli nokuimwena mwe bene ifyo umubomfi wenu ali nokucita.” Elyo nao Akishi ayasuka ati, “Wawamya nganshi, kanshi ine ndi nokukucita ukuba uwakuninda inshiku pe.” ³ Nomba Samwele alifwile, na bena Israeli bonse balimulooseshe, bamushiika na mu mushi wakwe ku Rama. Saulo ninshi natamfya bakabuka elyo na babomba ne mipashi bonse ukufuma mu calo. ⁴ Abafilisiti balongene pamo mukucita inkambi ku Shunemu, ninshi Saulo nao nalonganya abena Israeli bonse no kucita inkambi ku Giliboa. ⁵ Ilyo Saulo amona impuka ya Bafilisiti, atiina. Umwenso waikete umutima wakwe, alatutuma nganshi. ⁶ Saulo epakwipusha Yawe, lelo Yawe akaana ukumwasuka mu filoto nangu muli Urimu nangu muli bakasesema. ⁷ Elyo Saulo atile ku babomfi bakwe, “Mfwaileniko umwanakashi umo uwaishiba ukubuka pakuti eko nje mukwipusha.” Elyo batila, “Moneni, eko aba umo umwanakashi ku Eni Dori uubuka.” ⁸ Kanshi Saulo epakuifulunganya afwala insalu shimbi. Elyo ubushiku, wena na bantu babili baima baya na ku mwanakashi. Saulo amweba ati, “Njipushishako ku mipashi, elyo undetelepo umuntu uo nalakweba ishina.” ⁹ Lelo umwanakashi atile kuli ena, “Icine cine walishibafye bwino ifyo Saulo acita. Uyu muntu alitamfya bonse bakabuka na babomba ne mipashi mu calo cakwe. ¹⁰ Nga cinshi uletele iciteyo pa bumi bwandi icingandetela imfwa?” Saulo epakulapa kuli ena muli Yawe ati, “Mu cishinkafye cakwa Yawe uwamweo, iwe tawakapeelelwepo umulandu pali ici cintu.” ¹¹ Elyo umwanakashi aipusha ati, “Bushe ni nani uo ndekwimisha ku bafwa?” Nao atile “Ndefwaya Samwele.” ¹² Ilyo umwanakashi amwene Samwele, alilile umusowa uukalamba nokutila kuli Saulo, “Bushe cinshi umbepele? Ilyo niwe Saulo!” ¹³ Elyo imfumu yatile ku mwanakashi, “Witiina. Bushe cinshi wamona?” Umwanakashi ati, “Namona umulungu ulefuma mu mushili.” ¹⁴ ku mwanakashi ati, “Bushe ulemoneka shani?” Nao atile, “Ulemoneka kwati mwaume umukote uufwele umwingila alefumina pamulu.” Nomba Saulo elyo aishiba ukuti ni Samwele, elyo akontamina panshi amupakata. ¹⁵ Samwele epakutila kuli Saulo, “Bushe mulandu nshi wamfulunganishisha ukutuusha pakumbusha?” Saulo atile, “Ine ndi ne sakamika ilikalamba. Abafilisiti bali pa bulwi na ine, kabili Lesa nao naleka ukunjasuka nangu kupitila muli bakasesema nangu ni mu filoto. E mulandu wine njishile kuli iwe pakuti unjebeko ifyo ningacita.” ¹⁶ Samwele nao atile, “Nomba mulandu nshi uleipushisha ine, ilyo Yawe nakufutatila nasanguka no mulwani obe? ¹⁷ Yawe ena nabomba ifyo asobele ukupitila muli ine. Yawe napokolola ubufumu mu maboko yobe no kubupeela kuli umo umwina mupalamano obe, kuli Davidi. ¹⁸ Pa mulandu wakukanabeela ifyo Yawe akwebele, elyo wakaana nokucita icifukushi cabukali bwakwe pali Amaleki, Yawe nacita ici kuli iwe mu bushiku bwa lelo. ¹⁹ Yawe ali nokupeela bonse abena Israeli pamo na iwe mu maboko ya Bafilisiti. Kabili mailo iwe pamo na bana bobe muli nokuba pamo na ine. Yawe kabili ali nokupeela ifita fya bena Israeli ku Bafilisiti.” ²⁰ Awe bwangu bwangu Saulo awa panshi atambalala ku mwenso ukalamba, pa mulandu wa mashiwi Samwele amwebele. Amaka yapwa kuli Saulo, pantu akasuba konse talile elyo no bushiku bwine. ²¹ Ilyo umwanakashi aishile kuli Saulo no kumona ifyo ali uwacushiwa nganshi, amweba ati, “Mona, umubomfi obe umwanakashi nakubeela. Nshacisakamana kufwa iyoo, nati awe kancitefye ifyo unjebele. ²² Nomba napapata umfwa ku mubomfi obe no kuleka nkupeelekofye utwakulya tumo, pakuti ulye no kukwata amaka uko uleya mu nshila yobe.” ²³ Nao alikene ati, “Nshalye.” Lelo ababomfi bakwe no mwanakashi bamupatikisha, elyo asumina ifyo balemweba. Awe aima panshi no kwikala pa busanshi. ²⁴ Umwanakashi ali ne ciponti icaina pa ŋanda pamwakwe, aya bwangu bwangu acipaya. Asenda no bunga ubwakandawilwa no kupangako umukate uushitutumuka. ²⁵ Elyo apalamika kuli Saulo pamo na babomfi bakwe, nabo balya. Bulya bwine bushiku baima no kuya.