¹ Elyo Dabidi atontonkanya mu mutima wakwe ati, “Ubushiku bumo ndi nokonaulwa ku maboko yakwa Saulo. Icintufye icisuma ico ningacita cakufyukila ku calo ca Bafilisiti. Elyo Saulo ali nokuleka ukumfwaya mu calo conse ica Israeli, na ine nkapusuka ukufuma mu maboko yakwe.” ² Kanshi Dabidi pamo na bantu imyanda mutanda abali nankwe baima nokuya kuli Akishi mwana Maoki imfumu ya ku Gati. ³ Dabidi pamo na bantu bakwe epakwikala mu Gati kuli Akishi. Cila muntu aikele no lupwa lwakwe. Elyo Dabidi nao ali na bakashi bakwe babili Ainoamu uwa ku Yesireli elyo na Abigaili uwa ku Kameli, uwafwililwe umulume Nabali. ⁴ Ilyo bamwebele Saulo ukuti Davidi nafyukila ku Gati, alekele no kumufwaya fwaya. ⁵ Elyo Davidi aebele Akishi ati, “Nga cakuti ninsanga ukusekelelwa mu menso yenu, mumpeeleko incende imo mu mushi umo uwa mu calo cenu, umwakuti ndeikala. ⁶ Nga mulandu nshi umubomfi wenu engekalila mu musumba wa mfumu umo na imwe mwikala?” Kanshi pa bushiku bwine ubu, Akishi amupeela Sikilagi. Kanshi e mulandu wine Sikilagi abela ku mfumu sha bena Yuda ukufumafye na pakale. ⁷ Dabidi aikele mu calo ca Bafilisiti umwaka umo ne myeshi ine. ⁸ Elyo Dabidi na bantu bakwe bafumine baya sansa abena Geshuri, abena Girisi na bena Amaleki. Pantu ukufuma ku nshita yakale aba bantu baleikala mu calo icasuntinkene ku Shuri elyo na ku Egupto. ⁹ Kanshi lyonse ilyo Dabidi alesansa incende, taleshako umuntu nelyo umo umwaume nangu umwanakashi umumi. Lelo alesenda impaanga, iŋombe, bapunda, ingamila elyo ne fyakufwala, elyo abwelelamo ku Akishi. ¹⁰ Ilyo lyonse Akishi amwipusha ati, “Bushe ni ncende nshi wile sansa ilelo?” Dabidi aleyasuka ati, “Ni ku matololo ya ku Yuda nangu ku matololo ya ku Yerameli nangu ku matololo ya ku bena Keni.” ¹¹ Davidi tapuswishepo nangu umo umwaume nangu umwanakashi umutuntulu uwakusenda ku Gati, pantu aletontonkanya ati, “Pantu limbi kuti baya tusoselela, nokulanda ati, ‘Ifi efyo Davidi acita.’” Kabili ifi efyo Davidi alecita mu nshiku shonse isho aikele mu calo ca Bafilisiti. ¹² Akishi alicetekele Davidi, elyo atile, “Davidi nabamupata ku bantu bakwe abena Israeli, eico kanshi ali nokuba umubomfi wandi pee.”