¹ Panuma ya mweshi umo, Nahashi umwina Amoni aishile no kwisa pokolola Yabeshi Gileadi. Elyo abantu bonse aba mu Yabeshi batile kuli ena, “Cita icipangano na ifwe, elyo na ifwe twakulakubombela.” ² Lelo Nahashi umwina Amoni ayaswike ati, “Ine kuti napanga icipangano na imwe nga twasuminishanya ukuti ine nkatonkole cila umo ilinso lya ku kulyo pakuti nkalete umusebanya pali Israeli onse.” ³ Abakalamba ba mu Yabeshi epakumweba abati, “Tupeeleko inshiku cine lubali pakuti tutume inkombe ku bena Israeli bonse, elyo nga cakuti takuli nangu umo uwakwisa tupususha, lyena tuli nokucimba kuli iwe.” ⁴ Ilyo inkombe shaishile ku Gibea umushi wakwa Saulo no kutula umulandu onse ku bantu, bonse batendeke ukulila imisowa iyikalamba. ⁵ Califye ilyo Saulo alebwela ukufuma ku mabala, ninshi nakonka iŋombe shakulima panuma, elyo aipwishe ati, “Bushe cinshi cilubene ku bantu? Ni cinshi ico balelila?” Abantu epakumulondolwela ifyo abaume ba ku Yabeshi basosele ⁶ Ilyo Saulo aumfwile amashiwi yabo, umupashi wakwa Lesa waishile pali ena na maka, icakuti aikatwa no bukali. ⁷ Abuulile iŋombe shibili ishakuliminako ashiputaula mu fipimfya, no kutumina bonse abena Israeli mu ncende shonse. Atuma inkombe ishakuyalanda ukuti, “Ifi efyo cili nokucitika ku ŋombe iyilima iya muntufye onse uushakonke Saulo na Samwele.” Elyo umwenso wakwa Yawe waishile pa bantu bonse, nabo baima capamo ngo muntu umo. ⁸ Ilyo Saulo abalongenye abantu ku Beseki, abaume ba mu Israeli bali amakana imyanda itatu elyo na baume bakwa Yuda amakana yatatu. ⁹ Baebele inkombe ishaishile abati, “Kabiyeni kasoseni ku baume ba ku Yabeshi Gileadi amuti, ‘Mailo ilyofye akasuba kakabalikisha, ninshi mwalubulwa.’” Ilyo inkombe shaile no kuyatula ilyashi ili ku baume ba ku Yabeshi, nabo balisaminwe. ¹⁰ Kanshi abaleikala ku Yabeshi epakweba abena Amoni ati, “Mailo tuli nokucimba kuli imwe elyo na imwe kuti mwatucitilafye conse icingaba icisuma kuli imwe.” ¹¹ Ubushiku bwakonkelepo Saulo ayakanya abaume bakwe mu fipani fitatu. Elyo ulucelo ku macaca baingilile abena Amoni mu nkambi yabo no kubakomaula mpaka ukufika na pa nshita akasuba kabalikishe. Kabili bonse abapusunswikeko balisalangene icakuti nangufye babili tabashele pamo iyoo ¹² Abantu epakwipusha Samwele abati, “Nga ni bani abaipwishe ati, ‘Bushe Saulo ewingateeka ifwe? Baleteni kuli ifwe pakuti tubepaye.’” ¹³ Lelo Saulo atile, “Takwabe nangu umo uuli nokwipaiwa mu bushiku bwa lelo, pantu ubushiku bwa lelo Yawe napususha Israeli.” ¹⁴ Elyo Samwele aeba abantu ati, “Iseni, natuleya ku Giligali kabili kulya kwine eko tuleya lumbula cipya cipya ifyabufumu.” ¹⁵ Kanshi abantu bonse epakuya ku Giligali no kuya bilisha Saulo nge mfumu pa cinso cakwa Yawe. Kulya kwine eko baile tuula imutuulo yakwampana pa cinso cakwa Yawe, elyo Saulo na bena Israeli bonse basansamuka nganshi.