¹ Elyo Samwele aebele abena Israeli bonse ati, “Ine nalyumfwa fyonse ifyo mwasosa kuli ine kabili nalimupeela ne mfumu iyakumuteeka. ² Moneni, ala nomba ni mfumu eyakulamutungulula. Pantu nomba ine ninkota kabili ndi ne mfwi, lelo abana bandi abaume bena muli nabo. Ine nali intungulushi yenu ukufuma ku bulumendo bwandi ukufika na ku bushiku bwa lelo. ³ Ine naiminina pano, nshinineni pa cinso cakwa Yawe elyo na ku wasubwa wakwe. Bushe nani nasendelapo iŋombe iyilima? Ni punda wakwa nani ine nasendapo? Ninani uo nacenjeshapo? Nani uo nafyengelepo? Bushe ni ku minwe yakwa nani nafumishe amafisakanwa pakulenga amenso yandi yashibate? Nga cakuti nalicitapo cimo pali ifi, ine ndi nokumubwesesha.” ⁴ Nabo abantu bayaswike abati, “Tawatala autucenjesha nangu ukutufyenga. Kabili tawatala aupoka akantu ku minwe ya muntu nangu umo.” ⁵ Samwele atile kuli bena, “Yawe e kambone pali imwe kabili no musubwa wakwe wine ni kambone mu bushiku bwa lelo ukuti tamusangilepo akantu nangu kamo mu minwe yandi.” Nabo batile, “Ni kambone.” ⁶ Elyo Samwele atile ku bantu, “Yawe e kambone uwasalile Mose na Aroni kabili afumya ne fikolwe fyenu mu calo ca ku Egupto. ⁷ Eico nomba palameni bonse pakuti mwebe ifishinka pa cinso cakwa Yawe pali fyonse ifya bulungami bwakwa Yawe, ifyo amucitila pamo na bashinwe. ⁸ “Ilyo Yakobo aingile mu Egupto, na bena Egupto bayamba ukubacusha, ifikolwe fyenu fyalilile kuli Yawe ukuti abafwe. Elyo Yawe epakutuma Mose na Aroni abafumishe ifikolwe fyenu muli cilya calo, no kubaleta ukuti baleikala mu cifulo cino. ⁹ Lelo bena balaba kuli Yawe Lesa wabo, nao epakubashitisha mu minwe yakwa Sisera umukalamba wa fita fya mfumu Yabini uwa ku Hasoli, elyo na mu minwe ya Bafilisiti, kabili na mu minwe ya mfumu ya ku Moabu ababalwishishe. ¹⁰ Elyo balilile kuli Yawe nokutila, ‘Natubifya pantu natusangukila Yawe no kulabombela imilungu ba Baali na ba Ashitoreti. Lelo nomba, tupokololeniko ku minwe ya balwani besu, elyo na ifwe twakulamubombela.’ ¹¹ Elyo Yawe atumine Yerubibaali, Baraki, Yefuta na Samwele abamupokolwele ukufuma mu minwe ya balwani benu mu ncendefye shonse, pakuti mwikale umutende. ¹² “Lelo imwe ilyo mwamwene Nahashi imfumu ya bena Amoni aisa mukumusansa, mwatile kuli ine, ‘Iyoo ifwe tulefwaya imfumu iyakuti iletuteeka,’ nangu pali ilya nshita Yawe Lesa wenu ewali mfumu yenu. ¹³ Nomba moneni, imfumu iyi iyo mwasalile, iyo mwe bene mwalombele. Eico Yawe naimika imfumu pali imwe. ¹⁴ Eico nomba nga cakuti muli nokuba na katiina kuli Yawe, mulemubombela no kumubeela elyo no kukanasangukila amafunde yakwe. Kabili nga cakuti imwe bonse pamo pene ne mfumu yakulamuteeka mwakulakonka Yawe Lesa wenu, ninshi cili nokumuwamina! ¹⁵ Lelo nga cakuti mwakaana ukubeela ishiwi lyakwa Yawe, kabili mwasangukila na mafunde yakwa Yawe, lyena ninshi ukuboko kwakwa Yawe kuli nokuba pali imwe elyo na pa mfumu yenu ngefyo cali pali bashinwe. ¹⁶ “Eico nomba, iminineni ifyo fine no kumona icintu icikalamba ico Yawe alacita mu menso yenu! ¹⁷ Bushe ino te nshita yakusombola iŋanu? Ine nalalomba kuli Yawe alete ukubulukuta ne mfula. Kabili muli nokushininkisha no kwishiba ukuti cintu icibi mwacita ku cinso cakwa Yawe icakwipusha ukumupeela imfumu.” ¹⁸ Elyo Samwele alombele kuli Yawe, na pa bushiku bwine bulya Yawe atumine ukubulukuta ne mfula, icakuti abantu bonse baiketwe no mwenso uukalamba uwa kuli Yawe na Samwele. ¹⁹ Elyo abantu bonse batile kuli Samwele, “Pepeleniko fwe babomfi benu kuli Yawe Lesa wenu pakuti twifwa, pantu natulundapo pa bubifi bumbi bonse twacita, ububifi bwakwipusha ukutupeela imfumu.” ²⁰ Samwele nao atile kuli bena, “Mwitiina. Imwe mwalicita ububifi bonse ubu, nomba mwileka ukukonka Yawe, lelo mulemutumika ne mitima yenu yonse. ²¹ Mwiyalukila ukukonka ifyaciwelewele ifilubi ifishingamwafwa. Tafibomba busuma nakalya, nangu ukumupususha teti fimupusushe, pantu fyaciwelewele. ²² Pa mulandu we shina lyakwe ilicindami, Yawe takalekeleshe abantu bakwe, pantu Yawe alitemenwe ukumucita abantu bakwe. ²³ Elyo palwa ine, nshingatemwa nangu panono icakuti nkabe uwakubifya kuli Yawe mukufilwa ukumupepelako. Kabili ndi nokumufunda inshila isuma kabili iyalungama. ²⁴ Lelo imwe mukwatilefye Yawe akatiina no kulamubombela mu cishinka ne mitima yenu yonse. Mufwile ukuba abakwibukisha ifintu ifikankala ifyo amucitila. ²⁵ Nomba nga cakuti mwakonkanyapo ukulabifya, bonse imwe pamo ne mfumu yenu mukaloba.”