¹ Ilyo Davidi apalamine ku nshita yakufwa aitile umwana wakwe Solomoni no kumweba amashiwi aya ati, ² “Ine nomba napalamina ukuya ku nshila iyilolako ifikolwe fyonse. Eico ndefwaya ube umuntu uwakosa kabili umwaume uwashipa. ³ Ufwile ukuba umuntu uwakucita ifintu fyonse ifyo Yawe Lesa obe afwaya. Uleenda mu nshila shakwe no kubaka amafunde yakwe ne fyebo fyakwe ne fipope fyakwe, na fyonse ifyo amafunde yafwaya ngefyo calembwa mu mafunde yakwa Mose. Ici cikalenga ukuti ukalepaalwa muli fyonse ifyo ulecita na konse uko uleya. ⁴ Kabili ni pakuti Yawe akabe uwakufikilisha ubulayo bwakwe kuli ine, ukulingana nefyo alandile ukuti, ‘Abana bobe nga batekanya mu bwikashi bwabo, na pa cinso candi bakaleenda abapetama ne mitima yabo elyo na mano yabo yonse, ninshi tawakatale aubulisha umwana mwaume uwakwikala pa bufumu mu Israeli.’ ⁵ “Nomba iwe walishiba bwino ifintu ifyo Yoabu mwana Seruiya acitile kuli ine ilyo aipeye abakalamba ba fita fya nkondo ifya bena Israeli babili, Abune mwana Neri na Amasa mwana Yete. Alibepeye no kusumya umulopa wabo pa nshita ya mutende kwati ni nshita ya nkondo. Abuulile no mulopa wabo ashinga ku mushipi uo afwele mu musana elyo na ku ndyato shali ku makasa yakwe. ⁶ Eico ukamucitile umwabela amano yobe, icikulufye wikaleka akaifwile imfwa yamutende. ⁷ “Lelo ukalange uluse kuli bamwana Basilai uwa ku Gileadi, no kubalenga ukuti bakalelyafye nobe petebulo lyobe. Bena balingafwile pali ilya nshita nafulumwike kuli munonko Abusalomu. ^{8 9} “Eico ibukisha Shimei mwana Gera umwina Benjamini uwa ku Baharumi ulya uwantukile insele ishingi nganshi bulya bushiku naile ku Manaimu ukuti epo acili. Ilyo aishile mukunkumanya pa mumana wa Yordani, ine nalilapile kuli ena peshina lyakwa Yawe ukuti tali nakufwa ku lupanga. Lelo nomba wimulinga ukuba uwakaele. Iwe uli muntu uwamano nganshi eico uli nokwishiba ifya kumucitila. Ukamonefye ukuti akengile mu calo ca bafwa ku mfwa yakusuuma umulopa.” ¹⁰ Elyo Davidi afwile no kuya lala ukwalola ifikolwe fyakwe, ashiikilwe mu musumba wakwa Davidi. ¹¹ Ateekele icalo ca Israeli pa myaka amakumi yane. Imyaka cine lubali yali mu Hebuloni elyo imyaka amakumi yatatu na itatu ateekele mu Yerusalemu. ¹² Efyo Solomoni abuulile amalo yakwa wishi Davidi no buteeko bwakwe bwakwata amaka nganshi. ¹³ 13Nomba Adoniya, umwana wakwa Hagiti, alimine aya kuli Batisheba, nyina wakwa Solomoni. Elyo Batisheba amwipusha ati, “Bushe waisa mu mutende?” Nao ayasuka ati, “Ee ni mu mutende.” ¹⁴ Elyo amweba ati, “Ninkwatako utumashiwi utwakulanda na iwe.” Batisheba ayasuka ati, “Landa.” ¹⁵ Asosa ati, “Ukulingana ngefyo waishiba, nine nali nokuba imfumu ya bena Israeli, na bonse balesubilafye ukuti nine ndi nokuba imfumu yabo. Nomba ifintu fyapilibuka, no bufumu nomba bwile kuli munyinane pantu Yawe eumusalile. ¹⁶ Lelo ine ninkwatakofye icintu cimo ico ndelomba ukufuma kuli iwe, wintana iyoo.” Batisheba amweba ati, “Lomba.” ¹⁷ Nao akonkanyapo ati, “Napapata kanombeleko ku mfumu Solomoni, pantu iwe takukaanine, ukuti ampeele Abishagi umwina Shunemu ukuba umukashi wandi.” ¹⁸ Batisheba nao ayasuka ati, “Cisuma, nalaya nkulandileko ku mfumu.” ¹⁹ Batisheba nao aya na ku mfumu Solomoni mukuya landilako Adoniya. Ilyo afika, imfumu yaima pa cipuna yaisa mukumanya, yakontamiko mutwe elyo yaya ikala pa cipuna. Elyo yaeba na bakuleta icipuna apakwisa ikala nyina, baciteka na ku kuboko kwa kulyo kwa cipuna ca mfumu. ²⁰ Batisheba nyina alanda ati, “Kuli icintu cimo ico ndefwaya ukulomba kuli iwe, wintana iyoo.” Imfumu yayasuka aiti, “Lombeni mayo ine nshakaane.” ²¹ Elyo Batisheba nyina ati, “Suminisha ukuti Abishagi umwina Shunemu opwe kuli munonko Adoniya.” Imfumu Solomoni yayasuka nyina aiti, “Nga cinshi waipushisha Abishagi umwina Shunemu ukuti opwe kuli Adoniya? Ici cena calangafye ukuti no bufumu bwine kuti wamulombela apofye mukalamba wandi elyo kabili na Abiyata shimapepo, na Yoabu mwana Seruiya bawila kuli ena.” ²² Imfumu Solomoni yayasuka nyina aiti, “Nga cinshi waipushisha Abishagi umwina Shunemu ukuti opwe kuli Adoniya? Ici cena calangafye ukuti no bufumu bwine kuti wamulombela apofye mukalamba wandi elyo kabili na Abiyata shimapepo, na Yoabu mwana Seruiya bawila kuli ena.” ²³ Elyo imfumu Solomoni yalapa peshina lyakwa Yawe ati, “Lesa ancitile icili conse nangufye icakuleta ishamo nga cakuti Adoniya taleke umweo pa mashiwi asosa ²⁴ Eico mu cishinkafye cakwa Yawe umumi uwambika bwino pa cipuna cakwa tata Davidi kabili ampeela ne ŋanda ngefyo alaile, lelo line Adoniya alafwa.” ²⁵ Apopene imfumu Solomoni yapeela ne cipope kuli Benaya mwana Yehoiyada ukuya ipaya Adoniya, nao aya mwipaya. ²⁶ Elyo imfumu yaebele Abiyata shimapepo ukuti, “Bwelelamo kumwenu ku Anatoti. Iwe ulingile ukufwa, lelo nshakwipaye pali ino nshita pantu walibombele umulimo wakusenda Imbokoshi ya Cipangano iya Mfumu Yawe pa cinso cakwa tata Davidi no kupita nankwe pamo mu macushi.” ²⁷ Elyo imfumu Solomoni yafumya Abiyata pa milimo ya bushimapepo bwakwa Yawe mukufikilisha amashiwi yakwa Yawe ayasoselwe ku Shilo palwa ŋanda yakwa Eli. ²⁸ Ilyo amashiwi ya fyacitike yafika kuli Yaobu, pakuba uwasuminishe Adoniya nangu tasuminisheko ifyakwa Abusalomu, ena epakubutukila mwi Tenti lyakwa Yawe no kuya konena ku nsengo sha bulambo. ²⁹ Baisa eba imfumu Solomoni ukuti Yoabu nabutukila mwi Tenti lyakwa Yawe emo ekele kumbali ya bulambo. Elyo imfumu Solomoni yapeela icipope kuli Benaya mwana Yehoiyada ukuti, “Kabiye uye umwipaye.” ³⁰ Benaya epakuya, aya ingila mwi Tenti lyakwa Yawe no kweba Yoabu ati, “Imfumu itile, ‘Fumina panse.’” Yoabu nao ayasuka ati, “Awe ine nshafume, ndefwilafye muno mwine.” Benaya epakuya eba imfumu Solomoni amashiwi yasosele Yoabu. ³¹ Elyo imfumu yapeela Benaya icipope cakuti, “Iwe kacite ifyo asosele. Kamukome, umwipaye no kumushiika, pakuti ufumye pali ine na pa ŋanda yakwa tata umulandu wa mulopa wakaele ulya Yoabu asumishe apabula umulandu ³² Yawe euli nokumukanda pa mulopa asumishe pantu, ukwabula ukuti tata Davidi eshibe, aimine no kusansa abantu babili no kubepaya ku lupanga. Aba babili, ni Abune mwana Neri uwali umukalamba wa fita fya nkondo fya bena Israeli, na Amasa mwana Yete umukalamba wa fita fya nkondo fya bena Yuda. Aba bali abantu abacishinka ukucila pali ena. ³³ No mulandu wa mulopa wa pali aba bantu uli nokutulumana pa mutwe wakwa Yoabu na ba mu lupwa lwakwe pe na pe. Lelo pali Davidi na ba mu lupwa lwakwe, pa ba ŋanda yakwe na pa cipuna cakwe, pena palebafye umutende wakwa Yawe pe na pe.” ³⁴ Elyo Benaya mwana Yehoiyada aile no kuya koma Yoabu no kumwipaya, no kuya mushiika mu mpanga iyakwe iyali mu matololo. ³⁵ Imfumu yabika Benaya mwana Yehoiyada ukuba umukalamba wa fita fya nkondo pa malo yakwa Yoabu elyo yabika na Abiyata ukuba shimapepo pa cifulo cakwa Sadoki. ³⁶ Elyo imfumu yaita Shimei no kumweba ukuti, “Kuule iŋanda mu Yerusalemu nokuti uleikala mu musumba mwine wikatala aufumamo no kuya ku ncende kumbi. ³⁷ Pantu ilyo lyonse ukafuma mu musumba no kwabuka umukonko wa Kidironi, wishibefye ukuti ukafwa no mulandu wa mulopa ukaba pa mutwe obe.” ³⁸ Shimei ayasuke imfumu ati, “Kanabesa, cabafye bwino. Umusha wenu ali nokucita ifyo imfumu kanabesa yalanda.” Na Shimei aikele mu Yerusalemu pa nshita iyitali. ³⁹ Cilya papitafye imyaka itatu, abasha babili abakwa Shimei babutuka no kuya kuli Akishi mwana Maaka, imfumu ya ku Gati. Awe bashimikila Shimei ukuti, “Abasha bobe nababutuka, bele ku Gati.” ⁴⁰ Pakumfwa ifi apekanya kabalwe wakwe anina aya na kuli Akishi ku Gati mukufwaya abasha bakwe. Shimei aimine aya, mpaka aya senda abasha bakwe ukufuma ku Gati. ⁴¹ Ilyo Solomoni bamweba ukuti Shimei nafuma mu Yerusalemu no kuya ku Gati elyo no kubwela, ⁴² imfumu epakutuma abakuya ita Shimei no kumweba ati, “Bushe iwe nshakulengele ukulapa kuli Yawe elyo no kusosa ukuti, ‘Pa bushiku ubuli bonse ukafuma muno no kuya kumbi ukeshibefye ati uli nokufwa?’ Napali ilya nshita iwe wayaswike ukuti ifyo nalanda fyabafye bwino, ‘Ndi no kubeela.’ ⁴³ Nga kanshi cinshi wafililwa ukusunga umulapo obe kuli Yawe elyo no kukanabeela icipope nakupeele?” ⁴⁴ Imfumu yakonkanyapo ukweba Shimei aiti, “Iwe nawishiba na mu mutima obe ifilubo fyonse ifyo wacitile kuli tata Davidi. Eico nomba Yawe alakukanda pa bubi bobe. ⁴⁵ Imfumu Solomoni ili no kwikala iyapaalwa, ne cipuna cakwa Davidi icabufumu cili no kwikalilila pa cinso cakwa Yawe umuyayaya.” ⁴⁶ Imfumu epakupeela icipope kuli Benaya umwana umwaume wakwa Yehoiyada nao afuma aya koma Shimei no kumwipaya. No bufumu bwaikala na maka mu minwe yakwa Solomoni.