¹ Elyo intungulushi sha mitundu yabena Lebi baile kuli Elease shimapepo, kuli Yoshua mwana Nuni, na ku ntungulushi sha ndupwa sha nko mu bantu ba bena Israeli. ² Balandile kuli bena mu Shilo mu mpanga ya Kenani, ''Yawe akonkomeshe imwe ukupitila mukuboko kwakwa Mose ku kupela kuli ifwe imisumba ku kwikalamo, umuli mpanga ya kucemenamo ifitekwa fyesu.'' ³ Kabili ku fipope fya kwa Yawe, abena Israeli bapele ukukonka no bupyani ne misumba iya kokelepo, ukubika ne mpanga ya mulemfwe kuben Lebi. ⁴ Icipendwilo bapendwile ica mukowa bena Koati bapele ubwasuko: bashimapepo--nemfyalwa yakwa Aaroni uyo uwafumine kubena Lebi-- bapokelele ikumi limo na fitatu imisumba iyapelwe ukufuma ku mutundu waba Yuda, ukufuma ku mutundu wakwa Simeoni, no kufuma ku mutundu wakwa Benjamini. ⁵ Abasheleko imfyalwa yakwa Koati baikele mu misumba ikumi ukufuma mu mukowa mu mitundu yakwa Efulemo, Dani, nokufuma citika wa mitundu yakwa Manase. ⁶ Eico abantu balupwa ukufuma kuli Gershoni bapelwe ifitungu fya misumba ikumi limo na fitatu imisumbva ukufuma mu mukowa wa mitundu ya Isaka, Asheri, Nafitali, na citika wa mukowa wakwa Manase mu Bashani. ⁷ Abantu abali mu mfyalwa yakwa Merali, ulupwa no lupwa, bapokelele imisumba amakumi yabili ukufuma mu mukowa wakwa Rubeni, Gandi, na Sebuloni. ⁸ Kabili abantu mu Israeli bapele, icipendwilo ifitungu fya misumba (pamo pene ne mpanga ya kucemenamo) ku bena Lebi, ngefyo Yawe akonkomeshe ukupitila mukuboko kwa kwa Mose. ⁹ Ukufuma mu mukowa waba Yuda na Simeoni, bayakenye mpanga ku misumba yakonkelepo, efyo yakanishiwe mu mashina. ¹⁰ Iyi misumba yapelwe ku bufyashi bwa kwa Aaroni, abafumine ku mutundu wabena Koati, abo abapilibwike ukufuma ku mitundu yabena Lebi. Pantu icipendwilo ca kubalilapo caponene kuli bena. ¹¹ Abena Israeli babapele Kiriati Arba (Arba ali wishi wakwa Anaki), icifulo cimo cine nga Hebroni, mu calo ca lupili ulwa kwa Yuda, iya shingulwike ne mpanga ya mucemenamo. ¹² Nomba mabala ya mu musumba, ukubikapo ne mishi yabo, fya nafipelwa kuli Kalebu mwana Yefune, nge cikwatwa. ¹³ Ku bufyashi bwakwa Aaroni shimapepo bapele Hebroni impanga ya mulemfwe-- uwali umusumba wa kufisamamo pantu onse uwaipaya umunankwe ukwabula ukwishiba-- na Libina ne mpanga ya mulemfwe, ¹⁴ Yatiri yali ne mpanga ya mulemfwe yaiko. Na Eshitemoa ne mpanga ya mulemfwe yaiko. ¹⁵ Elyo bapele Holoni impanga iya mulemfwe, Dabile iya ne mpanga ya mulemfwe, ¹⁶ Aimu ne mpanga ya mulemfwe, Yuta ne mpanga ya mulemfwe, Beti Shemeshi ne mpanga ya mulemfwe, kwali imisumba pabula iyapelwe ukufuma kuli iyi mitundu ibili. ¹⁷ Ukufuma ku mutundu wakwa Benjamini bapelwe Gibeoni impanga ya mulemfwe, Geba ne mpanga ya mulemfwe, ¹⁸ Anatoti ne mpanga ua mulemfwe, na Alimoni ne mpanga yauko iya mulemfwe--imisumba ine. ¹⁹ Imisumba yapelwe kuli bashimapepo, ubufyashi bwakwa Aaroni, imisumba yali ikumi limo na itatu yonse mulya. ²⁰ Pantu bamo abakwa Kohati abali kulubali lwa kwa Kohati umukowa wakwa Lebi-- bali ne misumba iyo bapelwe kuli bena ukufuma ku mutundu wakwa Efraimu panuma ya fipendwilo. ²¹ Kuli bena kwapelwe Shekemu ne mpanga ya mulemfwe mu lupili lwa calo ca Efraimu--umusumba wa mbutushi pantu uli onse uwaipaya umuntu ukwabula ukwishiba--Gesere ne mpanga yauko iya mulemfwe--imisumba ine yonse pamo. ²² Kibisaimu ne mpanga yakwe iya mulemfwe, na Bete Horone ne mpanga yauko iya mulemfwe--imisumba ine muli yonse. ²³ Ukufuma mu mutundu wakwa Dani, umukowa wakwa Koati wapelwe Elteke ne mpanga yauko iya mulemfwe, Gibetone ne mpanga yauko iya mulemfwe, ²⁴ Ayalone ne mpanga yauko iya mulemfwe, na Gatirimone ne mpanga ya uko iya mulemfwe-imisumba ine muli yonse. ²⁵ Ukufuma citika wa mutundu wakwa Manase, umukowa wakwa Kohati wapelwe tanaki ne mpanga yauko iya mulemfwe na Gati Rimone ne mpanga yauko iya mulemfwe-imisumba ibili. ²⁶ Kulya kwali imisumba muli yonse iyashele iya mukowa wakwa Kohati, ukubikapo ne mpanga shabo isha mulemfwe. ²⁷ Ukufuma citika wa mutundu wakwa Manase, ku mukowa wakwa Gershoni , aba bali ba mukowa wabena Lebi, bapele Golani mu Bashani ne mpanga yaiko iya mulemfwe-umusumba wa mbutushi pantu onse uwaipaya umunankwe mukukana ishiba, mumbali na Beeshetera ne mpanga yauko iya mulemfwe--imisumba ibili muli yonse. ²⁸ Ku mikowa yakwa Gershoni nayo ine bapele Kishoni ukufuma ku mutundu wa Isaka, mumbali ya mpanga yabo iya mulemfwe, Daberati ne mpanga yaiko iya mulemfwe, ²⁹ Yarimuti ne mpanga yaiko iya mulemfwe, Eneganimu ne mpanga yaiko iya mulemfwe-imisumba ine. ³⁰ Ukufuma ku mutundu wakwa Ashere, bapele m=Mishali ne mpanga yaiko iya mulemfwe, Abudone ne mpanga yaiko iya mulemfwe, ³¹ Helkati ne mpanga yaiko iya mulemfwe, na Rehobu ne mpanga yaiko iya mulemfwe-imisumba ine muli yonse. ³² Ukufuma ku mutundu wakwa Nafitali, bapele imikowa yakwa Gershoni Kedeshi mu Galili ne mpanga yaiko iya mulemfwe-- umusumba wa mbutushi pantu uuli onse uwaipaya umunankwe mukukana ishiba; Hamote Dore ne mpanga yaiko iya mulemfwe, na Kartani ne mpanga yaiko iya mulemfwe-- imisumba itatu muli yonse. ³³ Mwali imisumba ikumi limo na itatu muli yonse, ukufuma mu mikowa yakwa Gershoni, ukubikapo ne mpanga shabo isha mulemfwe. ³⁴ Ku bashele abena Lebi--imikowa yakwa Merari--yapelwe ukufuma mu mitundu yabena Sebuluni: Yokeneamu ne mpanga yaiko iya mulemfwe, Karta ne mpanga yaiko iya mulemfwe, ³⁵ Dimuni ne mpanga yaiko iya mulemfwe, na Halali ne mpanga yaiko iya mulemfwe- imisumba ine muli yonse. ³⁶ Ku Mikowa yakwa Melali yapelwe ukufuma ku mutundu wakwa Rubeni: Beserene ne mpanga yaiko iya mulemfwe, Yahasi ne mpanga yaiko iya mulemfwe. ³⁷ Kedemote ne mpanga yaiko iya mulemfwe, na Mefaati ne mpanga yaiko iya mulemfwe--imisumba ine. ³⁸ Ukufuma mu mutundu wakwa Gati bapelwe Ramote mu Gileadi ne mpanga yaiko iya mulemfwe--umusumba wa mbutushi pantu onse uwaipaya umunankwe ukwabula ukwishiba- na Mahanaimu ne mpanga yaiko iya mulemfwe. ³⁹ Umukowa wakwa Merari yapelwe Heshebone ne mpanga yaiko iya mulemfwe, na Yesele ne mpanga yaiko iyo mulemfwe. Imisumba yonse yali ine. ⁴⁰ Iyo eyali imisumba iya kwete imikowa yalekana iya Merari, abafumine mu mutundu wabe Lebi-- imisumba ikumi na ibili yonse iyapelwe kuli bena ukupitila mukupendula. ⁴¹ Imisumba iya bena Lebi yasendele ukufuma pakati kampanga iyapinwa nabantu ba Israeli ya makumi yane na cine konse konse imisumba, ukubikapo ne mpanga yabo iya mulemfwe. ⁴² Imisumba yonse yashingulweke impanga ya mulemfwe. Efyo imisumba yonse iyi yali. ⁴³ Efyo Yawe apele ku Israeli impanga yonse iyo alapile ku kupela ifikolwe fyabo. Abena Israeli basendele ifikwatwa fya fiko no kwikala. ⁴⁴ Kabili Yawe abapele bena ukutusha mumbali shonse, nge fyo alapile ku fikolwe. Takwali nangu umo paba lwani balya uwingaba cimfya bena. Yawe apele bonse balya abalwani muminwe yabo. ⁴⁵ Nangula cintu mukati ka fintu ifisuma ifyo Yawe alandile kuba Ng'anda yakwa Israeli tapabapo icishabapo icishinka, fyonse fye fyali citike.