¹ Elyo Yoshua Umwana mwaume wakwa Nuni munkama atumine abaume babili ukufuma ku Shitimu nge nengu. Atile, ''Kabiyeni, nokumona pa calo nakucilisha Yeriko.'' Balile nokwisa kung'anda yakwa cilende weshina lya Rahabu, nokwikala kulya. ² Caebelwe ku mfumu ya Yeriko, ''Moneni, abaume bakwa Israeli nabesa kuno ku kulengula icalo.'' ³ Imfumu ya Yeriko yatumine ishiwi kuli Rahabu nokutila, ''Fumya abaume abeshile kuli iwe abengile mu ng'anda yobe, pantu beshile ku kulengula icalo conse.'' ⁴ Leelo namayo alisendele abaume ba bili nokubafisa. Ayaswike, ''Ee, abaume balishile kuli ine, leelo nshaishibe uko bafumine. ⁵ Baile ninshi nakufita, ilyo yali ninshita yakwisala kwa mpongolo shamusumba. Nshishibe uko baile. Limbi kuti mwabekata nga cakuti mwabakonka bwangu.'' ⁶ Leelo ninshi nabaninika pamutenge nokubafisa mutumuti twa bukonge uto atantike pamutenge. ⁷ Eico abaume babakonkele kumusebo walola kufyabu fya Yodani. Impongolo yaliselwe bwangu panuma aba bakonkele bafumine. ⁸ Libe abaume tabalasendama ubushiku, aishile kuli bena pamutenge. ⁹ Atile, ''Ningishiba ukuti Yawe namipela icalo kabili nomwenso wakumutina nawisa pali ifwe. Bonse abekala mu calo bakasungulika kumwenso pamenso yenu. ¹⁰ Twalyumfwa ifyo Yawe amukamishe amanshi yamuli bemba wakashika ilyo mwafumine mu Egypto. Kabili twalyumfwa ifyo mwacitile ku mfumu shibili isha bena Amori mwishilya lya mumana wa Yodani-Sihoni na Ogi--uo mwaonawile umupwilapo. ¹¹ Panuma yakumfwa ici, imitima yesu yalisungulwike kabili tamwali nakushima mu uli onse--pantu Yawe Lesa wenu, ni Lesa uwamu mulu napesamba lya calo. ¹² Nomba kanshi, lapeni kuli ine mwishina lyakwa Yawe ukuti, apo ncitile uluse kuli imwe, nemwe mukacita uluse ku ng'anda yakwa tata. Mpeni icishibilo cacishinka ¹³ ukuti mukalekelela umweo wamuli tata, mayo, indume, inkashi nendupwa shabo shonse, nokutila mukatupususha kufwa.'' ¹⁴ Abaume batile kuli ena, ''Imyeo yesu ili kuli iwe, nangu nikumfwa! Ngataulandile pafyo twakonka, ninshi, ilyo Yawe akapela ici calo kuli ifwe tukaba nenkumbu necishinka kuli iwe.'' ¹⁵ Eico abekishishe kumwando pansolokoto. Ing'anda aleikalamo yakulilwe mucibumba ca musumba. ¹⁶ Atile kuli bena, ''Kabiyeni kutupili nokubelama limbi abalemukonka kuti bamusanga. Mubelame kulya panshiku shitatu mpaka abaelmukonka bakabweleko. Elyo mukakonkanyepo ubulendo bwenu.'' ¹⁷ Abaume batile kuli ena, ''Tukaba abakaele ku kulaya kumulapo watuleenga ukulapa, ngataucitile ici. ¹⁸ Elyo tukesa mu calo, ufwile ukukaka umwando wakashika pansolokoto watwikishishepo, kabili ukakolonganika mung'anda ba wiso naba noko, bandume yobe na bonse abamung'anda yaba wiso. ¹⁹ Na onse ukafuma pafibi fya ng'anda yobe ukuya mu musebo, umulopa wabo ukaba pamitwe yabo kabili tatwakabe abamulandu. Leelo ukuboko ngakwabikwa paukaba naiwe mung'anda, umulopa ukaba pamitwe yesu. ²⁰ Leelo ngawalanda pafyo twakonka, tukaba abakaele kumulapo watulengele ukulapa.'' ²¹ Rahabu ayaswike, ''Nacibe ifyo fine mwasosa.'' Alibalekele baya. Elyo akakile nomwando wakashika pansolokoto. ²² Balile nokuyanina utupili kabili baikele kulya inshiku shitatu mpaka ilyo abalebakonka babweleleko. Abalebakonka bafwaile monse mu musebo nokubasanga iyo. ²³ Abaume babili babweleleko nokwabuka nokubwelele kuli Yoshua mwana mwaume wakwa Nuni, kabili bamwebele fyonse ifyabacitikile. ²⁴ Batile kuli Yoshua, ''Mucine Yawe napela ici calo kuli ifwe. Bonse abekashi bamu calo balesungulika ku mwenso pamulandu waifwe.''