¹ Kwaliko umwaume mu calo cakumulundu ku Efulemu, ne shina lyakwe ali ni Mika. ² Alilandile kuli Banyina ati, "Ikana limo no mwanda umo (1,100) uwa silfere balisendele ukufuma kuli mwebo apo mwalandile itipo, lilya naumfwileko-moneni apa! Ndikwete silfere nalibile." Nyina alandile, "Yawe akupale, we mwana wandi!" ³ Alibweseshe ikana limo no mwanda umo (1,100) utupimfya twa Silfere kuli nyina na nyina alilandile ati "Nali shishishe iyi silfere kuli Yawe, ukweba ati umwana wandi umwaume apangemo nokufukulamo ifibumbwa fya cela. Eco nomba nalibwesesha kuli webo." ⁴ Ulo abweseshe nyina indalama nyina alibulile imyanda ibili iya tupimfya twa silfere no kupela kuli kafula wa fyela uwapangilemo ifya kufukula ne fibumbwa fya fyela, kabili fyali bikilwe mu nganda yakwa Mika. ⁵ Uyu mwaume Mika alikwete inganda ya filubi alipangile icakufwala ca kwa shimapepo elo notulubi twa mu nganda nokwingisha umo umwana wakwe umwaume ukuba shimapepo wakwe. ⁶ Munshiku isho takwali imfumu mu Isreali, no muntu onse alikucita ifya lungeme mu menso yakwe. ⁷ Nomba kwali umulumendo uwa ku Betelehemu mu Yuda, pa cikota caci Yuda, uyo uwali mwina Lebi. Alikele kulya kukufikilisha incito yakwe. ⁸ Uyu muntu alifumine ku Betelehemu mu Yuda nokuya kukufwaya icifulo apakwikala. Ulo aleya alifikile pa nganda yakwa Mika mu calo ca milundu ku Efulemu. ⁹ Mika alilandile kuli ena, "wafuma kwisa?" umwaume alilandile kuli ena, "Ndi mwina Lebi waku Betelehemu mu Yuda, ndi palwendo ukufwaya icifulo apo ningekala." ¹⁰ Mika alilandile kuli ena, "ikala naine kokuba tata kuli ine kabili shimapepo. Nkalakupela utupimfya twa silfere ikumi pamwaka ifyakufwala nefya kulya." Eco umwina Lebi alingile mu nganda yakwe. ¹¹ Umwina Lebi alikwanishe ukwikaa noyu mwaume, ano umulumendo alishile kuba kuli Mika kubati ni umo pa bana bakwe abaume. ¹² Mika alipatwile umwina Lerbi ukubomba incito sha shishiwa no mulumendo aishile kuba shimapepo wakwe, no kuba mu nganda yakwa Mika. ¹³ Elo Mika alilandile ati, "Nomba naishiba ukuti Yawe ali nokucita ubune kuli nebo pantu uyu mwina Lebi aba shimapepo wandi"