¹ Ane aka tsua bo kelekele e Yelusaleme, pe kelekele Bethphagé, pe e Betania muku yetsikolo ye mete me Olivier, Yesu aka toma bayele ba bayekoli ba ahe. ² La bobekeli boo: boke a lohialo felo lobayi felo e ino kelekele,ane e oko hola onu, bo oko ukola mona o punda enangemi, likolo lia ye ata mito ete yalaka, bo mo uwele meliki, pe bolwe ahe. ³ La mito aka bekela onu: Po embi ekela onu oyo? bo inesi: kolo ebai la kamo e lahe. Pe, ko emoli tango be eko momina bolui ane. ⁴ Bayekoli ete kia boo, baka hena mona o punda be monangi a eholo kelekele e yetutu, a libunu li ndole, pe baka mwandola meliki. ⁵ Emoyi ndambo ene ete yalaka aho baka bekela boo: mbi ikela onu? po embi e andola onu mona o punda? ⁶ Baka inesa ene ndenge ete bekaka Yesu. Pe baka mina boo bokei. ⁷ Baka tolela Yesu emotsi mona o punda, likolo li ahe baka motolesa tulu ya ibo, pe Yesu aka yala likolo. ⁸ Lindji li baito baka tanda tulu ya ibo a ndole, pe basiaka ba mbambu bane biteni bio a bihua. ⁹ Bane bete yalaka felo pe bane bete yalaka bo moongi Yesu be sumba mehui: ozana, a hambolame ano elui a lina li Kolo. ¹⁰ A hambolame bokonzi bo Dawidi, Aha o iso, ozana bisikani bi likolo. ¹¹ Yesu aka hola a Yelusaleme, momolo e Tepelo, ane aka lita ye ko itu, ane ete eta ngonga, aka kia a Betania la laho la bayele. ¹² Akombe, mbuse e botsui boo a Betania, Yesu aka tata semba. ¹³ Akena ye a esika mote u figuier une iyali yo la kasi, aka kia bokaliti ambi emba ukola mai yema, pe, aka ya fila aka ukola saka kasi po ine itsi te yalaka yeleko ye figue. ¹⁴ Bosili lioyi aka mobekela: ta isia mito etsokolia mbuma eyaho.Bayekoli baka mokoka. ¹⁵ Baka ya tsua Yelusaleme, pe Yesu aka hola a momolo e Tepelo, aka filinga mesa i ba ongoli, pe keka i ba tambi bibenga. ¹⁶ Pe etsi minaki mito omoyi atsua yema emoyi a eholo e Tepelo. ¹⁷ Pe e hana pe e beka: eti komami ine: mbele ela be eko etaka mbele e losambo po e miki ngia? kasi onu, boka kela yo mbele e bwiba. ¹⁸ Banganga ba fulaku pe bakomi baka mokoka pe baka paana ndole e bo moalaki; nzambi bete o angaka po ine lindji ko litu bete inola ba hano ba ahe. ¹⁹ Ane aka lua likose aka tsua a lohia lokolongi. ²⁰ Akombe, a boetsi bayekoli baka ena mote u figuier uk'omela tee kwa mesile. ²¹ Petelo, aka tongola ine ite etaka akabeka a Yesu: molakisi,lita, mote u figuier une ete sehaka oye uk'omela. ²² Yesu aka sila liohi pe aka bekela boo: boyale la boinoli la Mongalima. ²³ Le bekela onu la bosolo, la mito omoyi aka bekela yo itsikolo: okowa aho pe ya lifinga a libange li mokwa, la etsi isi moonga a motema, kasi aka inola ine ibeka ye lua, yee eko ena ine ikokesane. ²⁴ Tsina emoli le bekela onu: ko itu ine lio kolonga onu la bosambeli, bo inole ine boka ukola, pe bo koena ine iokokisama. ²⁵ Pe, la bo emali likolo bokela losambo, la boyali la yema emoyi ye wango, la muinina o wao, bo limbesi, po ine Ato o ino ano eyali a liklo a limbesi pe basumu ba ino. ²⁶ Kasi la botsi limbesi, Ato o ino ano ebayi a likolo etsi limbesa pe basumu ba ino. ²⁷ Baka kia a lituta a Yelusaleme, pe ene ngonga ete yalaka Yesu boyeli momolo e Petelo, ba nganga bafulaki, ba komi pe meoholo, baka lua ngwahe. ²⁸ pe baka mo bekela: la lokulu lo nda lokela oye yo mbeko? pe nda e mwaesi lokulu bi bokeli bio? ²⁹ Yesu aka inesa: le ekolembelesa onu pe kola mwiho: bo ineseli ngo pe leko bekela onu a lokulu li nda ekele ngo byo mbeko. ³⁰ Batisimo ba Yoane bilui likolo, too bi baito? bo ineseli ngo. ³¹ Kasi baka tongola boo la ibo: la osu toka inesa: bi likilo yee eko beka: po embi etsi te mo'inoela onu? ³² La toka inesa bi baito ... be anga baito, zambi kowatu belembeli penza Yoane Profeta. ³³ Sikane baka inesela Yesu: totsi lembeli. Pe Yesu aka bekela boo: ngo pe ndji oko bekela onu lokulu lo nda lokele ngo bio mbeko.