¹ A tina emoli, bakundami bansatu, bane bebayi a lokundo e bwetami a likolo, bokumesi ntoma ko la nganga efulaku e boyambi bwinoli osu, ² Yesu, ano eyalaki sembo, ano emotomi kune eyalaki Mose a mbele elae ngia, ³ po ine etesambisama bolumbi mbeko mbe la kembo efulaku boeteli Mose pe ano efuki mbele ebayi a lokumu bweteli mbele. ⁴ mbele la mbele efukami la mito, kasi ano efuki bima kwetu ebay Mongalima. ⁵ Po e Mose eyalaki sembo a mbele e Mongalima ngia, aine mosali, po e botatoli yene yekokaki boekami! ⁶ Kasi Kilisito emoi, aine mona katsi e mbele eibo: pe mbele eibo, nde osu, a tina 'te tombwe tee a suka bokokani pe bomalitangeli bone bokokumesa osu. ⁷ Po emoli, ene ndenge eeki Molimo monsatu; bonoombe, la okokoka lolaka lolae, ⁸ so luesa motema makasi bwa ino kune mwasa o otomboki, mwasa e bomekami a mbu elumbi mete; ⁹ Eelo baise baino betemekake ngo, po balembele kune ebayi ngo, pe beenaki mesala meha mbuka tuku mekeleka. ¹⁰ Alingina inde angowaka po e libota line, pe nga eka: bobayi yekeleko ngia a motema meungi. Betelembelaki ndole meha; ¹¹ nga tena ndahi a bwango boha! ¹² Sila bokengi bangwaya, 'te omoi eino ebayi a motema ubitake pe bone bolumbi bolengi, bolenge ngi Mongalima e bomoi. ¹³ Kasi bolendisame bamoi la basiaka baose ngia, alingina une eeki boo: bonoombe! po ine omoi atiise motema makasi bopengwi a lisumu. ¹⁴ Po tokakwa bane besangani la Kilisito, a tina 'te tombwe bonangi tee a suke a bokofesi bohangi bone boyalaki a iso a felo felo. ¹⁵ Ata ngo, eeki ye: bonoombe, la bokokoka lolaka lolae, so luesaka motema lotsili, aine mwasa u otomboki. ¹⁶ Bane beyalaki, mbuse e bane beangowaki mbuse e bookoki oyoo, boo ngia bane betwei a Ezipito sese e bokambemi e Mose? ¹⁷ pe bwemaeli botangweli Mongalima baose tuku mekeleka, la bane bekeli lisumu, pe la bane melonda mekwei a nduhu elumbi mete? ¹⁸ pe a ano eteni ndayi ine etiokofuka katsi e bumake bowae, ko la bane betsitosaki? ¹⁹ Alingina lita osu totsikoki boholi a bolumbake u bolengesi motema eibo.