¹ Ibiana katsi e baito ba Polofeta ba isuma, pe iokobia e mbe ndenge emoyi katsi e ino ba lokotolo ba isuma, bane bekoholisia bilenge baito bikekeli bibitshi mbeko, pe bane feti molakesi une utetusia boo, ekeluta ngi bo bombengesami bo lipuluusa. ² Lindji li aito lionga ombe boo elo ekotsangana boo, pe molongo u liekela bekokela bo bekokitakela bo mbeko po e ibo. ³ A mbeko mbe yaibo bekahelesia baito meto e baki ba isuma, boo pe betungesami yenina yefulake bokosesi bo pe botsangani botsioko nanga liso. ⁴ Po ine Mongalima etsokeli bandjelu bowa ane etekela bo basumu, kasi ye etefilinga bo a liana li ndjima pii eiteli bo lisambesi; ⁵ la ye etsitokela mwano u felo bowa, kasi eteumesa Nowa, ye baito ye mwambe e basakoli ba bosembo, ata ngo ano elwei felo a mwano mbeko mbe, ⁶ etekosesa botsakatsaki pe akale ngia mwitu yekolo ye Sodomo pe ye Gomolo, bakaesia lokola ndakisa mbeko mbe ine yokolwa. ⁷ Pe eteumesa boyengebeni Lota, ano eteyalaka ekoka bowa a yelenge baito belumbi boyakengi pe bakatsangana. ⁸ Po ine ubayi liekela wo moyengebene uteyalaka katsi e ibo, eteaka ehelesi baose ngia motema o wae boyengebene po e bakita eteyaka ena bo pe ekoki mbeko ngia iolakabo baito. ⁹ Kolo ekoki etwesio mito a bomekami bo baito ba peto, pe ekoita baito ba mbeko mbe po ine akwesa bo yetumbu mwasa wo osambisami. ¹⁰ Bane bekia pendja mbuse e posa e bilongo pe befetsi bokundji baito baopomapomi mingi, pe baito ba ndjombo pe bobwi ndundu bokumu. Baito ba kandja pe la bane ba yahuli, betsiaeki beyanga bosekakoli kembo, ¹¹ kasi bandjelu, bane bebayi likolo a lukulu pe a nguya betsikela bo bosambesi yo ndenge i mbeko i bosekaki felo e Kolo. ¹² Kasi bo, behunganani a baito bane beyatsiki po e posa e bilongo pe bo beotami po ine basile bo pe bambengesi bo, bo yebehekeli ya ibo ye bosekakoli yene etsilembelani. betsiyalembeli pe behunga ombe po e kanyaka ya ibo angine. ¹³ Bakukola lifutsi li mbeko mbe lya ibo, behukoli yenangeli a boyaesi a yenangeli bakita ba bosoto a mwasa loola ate; baito ba yauli bembengesami; beyelanesi a mbeko ye isuma, bekokela la ino o ine bekundji onu. ¹⁴ Baiso ba ibo beyali a pite pe basumu, bekitaka baito bane betsilembeli boyambi metema mya ibo me lyali a bo palani mbela; bebayi bana a libebi. ¹⁵ Mbuse e ibo bohokoyi a ndole e wali, bo betehunga a bohongi ndole e Balama, mona o Bozolo ano etekunda lifutsi li bokeseni. ¹⁶ Kasi ano etaesia bo yetumbo po e bouni mobeko: punda ano etsiheka, akatusesia aloba ye mito, yene ekatungesia loko lo polofeta . ¹⁷ Bo baito bebayi oyine likaka lilumbe baye, ndjima pii besuseli bo yefofo yene yebila lipata. ¹⁸ Boo bopomapomi bolumbi tsina, boliali a bakita bekundji posa e bilongo, la botsangani, bo ane belwi sikane botsili baito bane bihuma katsi e bokeseni. ¹⁹ Behekeli bo ine, bobayi basomi, ainde bo angine metuke me kanyaka, po ine mito a mito ebayi motuke a mbeko ine ekundji ye. ²⁰ Po ine, la, ane akafeta oye mbeko ombe i mwano, okalembela Kolo pe Mobikesi Yesu Klisto, ye akalenga mito sika pe bo bakalonga, yelenge yaibo ye mbuse iyeteli yene ye felo. ²¹ Po ine ebayi wali po e ibo batsilembele mbeko ndjali, ine batsike mbuse e bolembeli mebeko e santu ine iteaesia bo. ²² Bekatumani a yekwe yeitanake: Mbwa akalengela bima biselaki ye, pe ndehe akayasoa akayafilinga aisia a loteke.