¹ Bomine bane bebayi seese e lumbe lo minyoko balite bakolo baibo aine bekokani la longumo, la tsina ine lina li Mongalima pe lihano bitsi tsolame. ² Pe bane beyiki bohinoli aine bakolo batsi isele boo ndundu seese e boyitami ine tobayi bango aya; Kasi ba kehele boo wali po bebayi bahinoli pe bakundami-malamu bane bayanganeli la bokeleli boo wali. Hana yo mbeko pe haesa boo mebeko. ³ La omoyi ehana bahano ba isuma pe estayanganeli la baoye baitani bo NKolo e iso Yesu Klisto pe a lihano line ibayi engebene la boyaesi a losambo, ⁴ elyaelisami a mondandalia, etsi lembeli yema, ebayi la botatsi bo mituna mbe pe bo bohelanesi baoye, ane iyotama tama, bitole, botsangani, bakanesi mbe, ⁵ bowelani bolumbi tsina o baito ba kanyaka bososoli botefetama liekela pe boinoli ine bayaesi a losambo ebayi ndole e lifutsi. ⁶ Ibayi, solo, ndole ikolongi a lifutsi ibayi bayanesi a losambo loheteli boyali la enanga, ⁷ zambi totsi te tola yema a mwano, pe ibayi liekela pe totsi okokoka botoli yema; ⁸ La osu kahe tohiki bima bi boleyi pe la tulu, iyokokoka oyo. ⁹ Kasi bane bekundji boyali e la mongumoyi bekwa katsi e bomekami, katsi e lilonga, pe katsi e bofela bo kamo ilumbi tsina pe ine bibitsi mbeko bine bifilinga baito katsi e bohungesami pe bohungesi melimo. ¹⁰ Zambi lokundo lo lisambo lobayi mosile mo mendo ko itu, pe ndambo emoyi, beyaekaniseli la yo, betehungana yesika ye bohinoli pe be te yafilnga boo mangine katsi e minyoko. ¹¹ Po yaho, mito e Mongalima, tsila i yoo mbeko, pe paana bosembo, boyaesi a losambo, bohinoli, lokundo, bonangi motema, bohai. ¹² Lana tuma ene eyitani i bohinoli, bwa bohumake boseko, po ine etemwetakela boo oye, pe ene etekela oye tubela eyitani esikani emoyi i lindji ba temo. ¹³ Le mwesa mobeko felo e Mongalima ona e yaesa bohumake ombe ombeko ko itu pe felo e Yesu Klisto, ano etekela tubela emoyi eyitani felo e Ponce Pilato, bohiti mobeko, ¹⁴ pe boumi so litono, so isemia, tee kwa botsui bo NKolo e iso Yesu Klisto. ¹⁵ Ene ekoyaenesia a tango e ahe mito e yenanga pe bokumi bomoyi, Kumi e bakumi, pe NKolo e bakolo, ¹⁶ ano eyiki ye matuke bolumbi bo loko, ano eyalakola la bongengi botsi katsuaka ene so mito omoyi etsi te enaka so bokoki boheni, ano longumo pe nguya bi seko bibayi bi yahe. Ibayi ko oyo! ¹⁷ Aesa mobeko a baito ba longumo ba ene yekeke batsi yale la mondandalia, pe batsi ise yelikia ye ibo katsi e longumo, kasi boisi yo ngi Mongalima, ano etaesa boo a ofela bima ko itu bine binangela osu la bio. ¹⁸ Aesa boo mobeko u bokeli mesala meitani, bayale la longumo lo mesala meitani baike bofaki, la bo aesi baito bima, ¹⁹ pe bosangesi oyo po e baose beyeli bima bi lohuno likolo li yeboko tsina e bohumake bo solo. ²⁰ O Timote, senzela esikani i boitsi bima, la botsili bitole bilumbi tsina, ²¹ pe bine bi bitsi kokani la molimo, pe bohelani bo mbeko bi isuma, ine bitekwa yesili ye ndambo e baito bane bete kwesa bohinoli. Mina ine ngolu eyale la ino!