¹ Ndenge emotsi, Klisto enyokolamaki a monyo, unu pe boyale a makanisi imoli. po ine ano enaki lumbe a monyo akatunga nga lisumu, ² a tsina e bohuni, ta ndenge e bokundakundi i baito, kasi ngo a bokundji o Mongalima, banda yo ngonga emotsikaheli a bohumi a monyo. ³ Eyali efela, po e bofakanifakani, bokundji ofela, bonwei bana, bohetesi boleyi la bonwei pe la bosambeli yekeko. ⁴ Pe behukola unu ngemba po ine unu botsihaesia a bawo a bokekelaka bonduba pe beholahola unu. ⁵ Be koyahesia a la ano eyali po e bosambesi bane biyali a bomoyi la bane beweyi. ⁶ Po ine mboli itani betehekelaka baweyi, mbuse e bohukoli lisambi ine baito tango e moyo; behuma ndenge e Mongalima katsi e molimo. ⁷ Suka e bima kwitu yangani. Yala a weli la boyahisesi po okolomge abohondeli. ⁸ Felo e kwetu, yala a lokundo lofulake ba moyi la basiaka, po ine lokundo lohuwaka bofela bo basumu. ⁹ Boyale la boyambani bamoyi ngi basiaka, so opoma. ¹⁰ A ine bafaki ba lindji e bohumi bo Mongalima; po ine mito la mito ayahese a yesili e basiaka yene ehukoli ye, ¹¹ la mito omoyi eheka, eyele ndenge etehekaka baito ba weli e Mongalima, la mito omoyi elialesi lotomo bomoyi, a lialese a lokulu lone Mongalima e hekela, po ine Mongalima eyale a lokumu a bima ngia la Yesu Klisto, ano eyali a lokumu pe a nguya e bikeke bikeke. Kooyo! ¹² Bakundani, so yala a wango, la yema e ngemba ine itwela unu, la bitumbu li yohe ine eyali momolo e unu, po e bohengesi. ¹³ La hoyo, bonangele, aine bohukoli unu a menyoko me Yesu a tsina te boyale aisiaka katsi yenanga la monamu tango ene lokumu lokolua. ¹⁴ La betangakulu unu po e lina li Klisto, bonangele, po ine molimo u lokumu la molimo u Mongalima ebayi likolo ya ino. ¹⁵ Ta mito omoyi e unu, atsinyokwame a ine moholaki, wiya, mito o mesala bibe pe atsiyaholesa a mesala i bangine. ¹⁶ Kasi la mito enyokwama a ine moklisto, atsiyale a osembo nga ine ekumesa Mongalima po e lina lilahe. ¹⁷ Po ine tango e bosambisami ekobanda nga a mbele e Mongalima. Kasi, la nga usu ekobanda, iya ekoyala mwasa u suka po e bane betsitosa liohi li monamu e Mongalima? ¹⁸ Pe la mito o semba akahuma a lumbe, mito e basumu ekoyala ndenge mbi? ¹⁹ Kwa isiaka, bane behena lumbe po e bohumi bo Mongalima bahulesi bomito bo ibo ngi mokeli, la bokelake ine iyali wali.