¹ Baali, boyisesi ngi balome baino, a tsina ine ba bomoyi betsitosi liohi, baukolame so ine ba okoke liohi la yesaleli ye baali baibo, ² la bweni yelenge ya ino ye bumi petoo pe boyabateli. ³ Yala, la ta wo boyatolesi bo yewolo bone bolitsi ngwele ilowami, botoli wolo, to tulu yo toli, ⁴ kasi boyatolesi bo momolo pe bwitami katsi e motema, bopeto bolumbi kanyaka bo Molimo u fio pe hai, une uyali a louno lofulake felo e Mongalima. ⁵ La oyo nde baali basanto ba kala bane beteyalaka a yelikia ngi Mongalima, beyisesi ngi blome baiyo, ⁶ Aine Sala, ano etetosaka Abalayama pe etemwetakaka nkolo e la. Nga e nga elwei onu bana ba owali, a bokeli ine ibayi wali, so ine boyamine botungesi a boangi. ⁷ Balome enesia a likelemba li aino weli katsi e botumani bwa ino a baali ba ino, aine mito o bolembu; kumesa wo, aine baito bekoki bosangoli la ino ngolu e bumake. Mina ine iyale kooyo, tsina ine yema ta yemoyi ye lwe boyaliki sambo ya ino. ⁸ Po esuka, boyale onu kwatu a lokundo lo banginena, bowaowa, boyiselesi. ⁹ So ulesia mbeko mbe la mbeko mbe, yeliko la yeliko, hambola, la ta oyo, tsina ine la yo nga itetakamaka onu tsina e bosangoli mohambo. ¹⁰ La mito omoyi, la oyo, ekundji bumake pe bweni baose ba yenanga, mina abatele lolame lo lahe boheki mbeko mbembe pe bihulu bi ya he la baoyi ba bokosi. ¹¹ Mina ine akie yesika la mbeko mbembe pe akele mbeko ndjali, apale bo hai pe abile wo bo hai. ¹² Po ine baise ba Nkolo bebayi likolo li bayengebeni pe batoi ba wae bebayi la kengekenge a losambo bwa ibo, kasi botsio bo Nkolo botsikunda bane bekela mbeko mbe. ¹³ Pe nda ekonyokola ombe onu la bobayi a loondo bweteli lo mbeko ndjali? ¹⁴ Po ine tango ekena onu lumbe po e boyengebeni, bokoyala a enanga. So yala a boangi bwa iso, pe so bulungana. ¹⁵ Kasi Klisto Kumi ayale Mosanto a metema mya ino, boyali kwa ane a boyafetesi la fio pe botosi, felo e mito akamwihola tsina e yelikia yene yebayi nga ho. ¹⁶ Pe boyali la likanesi li mwali, tsina ine leelo ata kohe betongesa onu aine nde boyalaki bakeli ba mbeko mbe, bane bepoma po e boyali wali bwa ino katsi e Klisto basambwe. ¹⁷ Po ine ikoki wali bweni paima la yo ibayi mokano u Mongalima, la bokeli mbeko ndjali koliko mbeko mbembe. ¹⁸ Klisto pe etena paima mbala emoyi po e basumo, ye moyebeni po e baito belumbi boyengebeni, tsina e botwonise ngi Mongalima, bakamolaka a loteto, kasi akuma a Molimo. ¹⁹ Katsi emoli lokola akakia bosakoli ngi melimo mebayi a linga, ²⁰ Mene, emoyi mbala metsiteyalaka a bwinoli, tango ene etesondamaka bwambeli bo Mongalima, a baose ba Nowa, tango e bokeli mokoka ufulaku; katsi emoli motango peeni u baito, ikaeka ine olimbongayele, bakuma a loye. ²¹ Wo baye beteyalaka yelembo ye batisimo, yetsiyali bopetolami bo litsi bilongo, kasi boyaesi bo motema ngi Mongalima, pe bone bokumesa onu sika ene, onu pe, la bosekwi bo Yesu Klisto. ²² Ano ebayi a lifindji lilome li Mongalima, kala kwetekia ye likolo, pe ine bandjelu, bakondji pe bane ba lokulu, beteyiselesia ngae.