¹ Mucihebe haguma, muna cirhanye, mwe bantu murhaba kw'onshonyi; ² Oku lirhaciburha lirya irhegeko, oku lurhacigera lulya lusiku nka , embere oburhe bunene bwa Nnamahanga burha cibayishira, embere lurha cibayishira olusiku lw'oburhe bwa Nnamahanga. ³ Mulongereze Nnamahanga, mweshi muli balembu b'omw'igulu, mwe mwakenzire amarhegeko gage! mulongereze okuli, mulongereze n'obwirhonzi, nkaba mwahasha oku fulikwa olusiku lw'oburhe bwa Nnamahanga. ⁴ Bulya Gaza yasigala, na Askeloni yasigala mwerwe, baheba hali Ashdodi akasanzi ka Ashuhuri, Ekroni yahongolwa! ⁵ Obuhanya okubo balamire hofi n'enyanja, olubaga lw'Abakereti! Akanwa ka Nnamahanga kali enyanya zinyu, kanani, cihugo ca bafilisti, nyehe nakushereza, harhabe ciru muntu muguma wasigala muli we. ⁶ N'olwo lugo lw'oku nyanja lwaba bulambo bwa bengere, n'engulube haguma n'ebibuzi. ⁷ N'olwo lugo kw'oku nyanja lwaba lwa bantu ba Yuda basigire, bakalikiza ebishwekwa byabo eyo, bakalala omu nyumba za Ashkeoni bijingo; bulya Nnamahanaga wabo abagalula n'okubagalula abashwekwa babo. ⁸ Niehe nayunvirhe olubaga lwa Moabu, n'akadali k'abana ba Amoni, kugerera byo bajacire abantu bani, n'okuci kuza enyanya ly'olubibi lwabo. ⁹ Ntyo, nk'oku nyorha ndama, kw'adesire Nnamahanga w'olubaga, Nyamuzinda wa Israeli, okuli Moabu aba nka Sodoma, n'abana ba Amoni nka Gomora, kwo kuderha , na mina ya munyu, mwerwe gwa nsiku zoshi, abantu bani basigire babagwarha mpira, n'abantu b'olubaga lwani basigire b'aba bimikwa. ¹⁰ Ebyo bintu byabagwarha enyanya ly'enzizi zabo, bulya bajacire abantu ba Nnamahanga w'olubaga, n'okucikuza enyanya lyabo. ¹¹ Nnamahanga aba waku bakanga bwenene, bulya ayirha n'ishali enyungu zoshi z'omw'igulu, n'abantu boshi bacikumba ye, ngasi muntu ahanali, n'ebihugo byoshi by'olubaga. ¹² Na ninyu b'e Etiopiya, mwanigwa kugerera omugushu gwani. ¹³ Naye alambula okuboko kwage enyanya ly'olunda ,n'oku shereza Ashuru, ajira n'e Ninawi kuba mwerwe, habe hantu nka irungu. ¹⁴ N'ebishwekwa byaka lala muli co, ebishwekwa byoshi by'olubaga , izu lyabo lyayunvikana omu madirisha, ¹⁵ Eco co cirya cihugo c'obushagaluke, cali lamire buzira kurhanya, cali ciderhera emurhima erhi, "nie hondi, nta windi kundusha". Nk'oku cabire irungu, ahantu h'okugwishira h'ebishwekwa, ngasi agera akasomerwa n'oku dundaganya okuboko kwage.