¹ Cikwone wehe, oderhe ebintu bishinganine n'enyigirizo zokuli. ² Oderhe oku abashosi bagwasirwe bâbe balembu, n'obwinja bwoshi, ba lugero, bagumaguma omu bwemere, omu buzigire, n'omu bushibirizi. ³ Oderhwe oku abagikulu bagwasirwe bâbe n'olugenzi lukwânine obutakatifu, barhabe bakushombanya, erhi baku kanywa amanvu; okubabe bakukahana enyigirizo nyinja, ⁴ lyo bayigiriza abahya kazi oku zigira abalume bâbo n'abana bâbo, ⁵ n'okuba n'obwenge, bacire, okukola emikolo yo munyumpa zâbo, bâbe binja, bakenge abalume bâbo lyo akanwa ka Nnamahanga karhaki jacirwa. ⁶ Ohanule ntyo emisole okuba n'obwenge, ⁷ okaciyerekana wene omu myanzi yoshi lwiganyo ly'ebijiro binja, n'okuhana enyigirizo zicire, zikwânine, ⁸ n'omwanzi gushinganine, gurhali kw'ishembo, ly'owakadali abana nshonyi, arhabe n'ecibi arhuderhera ⁹ Ohanule abakozi bakenge banahamwabo, babazigize omubintu byoshi, arhabe bakadali, ¹⁰ barhazimbe, cibakayerekana obwemezi bwinja, lyo bakengesa muli byoshi enyigirizo za Nnamahanga Mciza wirhu. ¹¹ Bulya, olukogo lwa Nnamahanga, nshoko yo bucunguke e mw'abantu boshi, lwa bonekine. ¹² Lurhwigirizize okulahira obubi n'irala ly'en'ingulu n'okulama omw'akano kasanzi kushimbana n'obukengukwe, bushinganya n'obucèse, ¹³ omukulindirira obulangalire bw'emigisho, n'okuonekana n'irenge lya Mungu Mukulu n'okw'omuciza wirhu Yezu Kristu, ¹⁴ ......olya w'acihanaga yene enyanya zirhu, lwo arhucungula kurhenga omu mâbi goshi, n'okuijirira olubaga luguma kuba lwage yene, lushukwirwe naye yene, n'abashibirire bwenene omu mikolo minja. ¹⁵ Oderhe eyi myanzi, ohanule, n'okukaliha, n'obuhashe bwoshi. Ciru n'omuntu muguma arhagi kuganyagusa.