¹ Paolo na Timoteyo bambali ba Kristu Yezu, oku bacesibwe muli Kristu Yezu bali e Filipi, haguma na balungere b'abashamasi: ² olukogo n'omurhula gwa Nnâmahanga Larha na Nnâhamwirhu Yezu Kristu gube e mwinyu! ³ Ngasi kumukengera, nnavuge Nnâmahanga wani omunkwa, ⁴ nakurhaleka oku musengerera, omu ngasi mahuno gani goshi kuli mweshi, ⁵ bulya mwantabire omu kuyalagaza emyanzi ya Kalembe, kurhenga olusiku lurhanzi kuhika buno. ⁶ Manyire oku owarhondereraga ogu mukolo mwinja muli mwe aguyukiriza lwoshi kuhika olusiku lwa Kristu Yezu. ⁷ Kushinganine mmulongize ntyo mweshi, bulya omu murhima gwani muba, abe omu nkoba zani, abe omu kundwira n'okujajira emyanzi y'Akalembe, mweshi kushangira enshokano nahîrwe. ⁸ Bulya Nnâmahanga yeri muhamirizi wani mmusima mweshi n'omurhima gwa Yezu Kristu. ⁹ N'omu nsengero zani ebimpuna, mpu obuzigire bwinyu buyushuke bwenene kandi bwenene omu bumanye n'omu burhimanye ¹⁰ lyo mukabona ebiri binja kulusha, lyo muba bacèse na beru-kweru kuhika olusiku lwa Kristu, ¹¹ mmuyunjwire malehe gw'okuli muli Yezu Kristu, oku irenge n'obukuze bwa Nnâmahanga. ¹² Nnonzize mumanye, balumuna bani, oku ngasi olya waja emunda ndi duba akwanine Emyanzi y'Akalembe. ¹³ Bulya, omu bwami na handi hoshi, ntaye ocihabire oku kuli Kristu ncishwekire, ¹⁴ na banji muli bene wirhu bayunvirhe oburhwali muli Nnâhamwirhu, erhi kucishweka muli ye kurhuma, bacisèza okuyalagaza omwanzi gwa Nnâmahanga buzira bwoba. ¹⁵ Baguma muli-bo, kuli kwinja, rhuyalagazé Kristu okubwalagalwa n'okulonz'ilushana; cikone abandi banakayihamiriza n'omurhima nkana. ¹⁶ Abola bakujira n'obuzigire, bulyala bamanyire oku omukolo gwani kuli kulwira Emyanzi y'Akalembe, ¹⁷ ci abandi bôhe, banaka yigiriza Kristu omu kuciberula, bakujira n'omurhima gw'obulyalya na mpu bulya banyushulira agandi malumwa omu kushwekwa kwani. ¹⁸ Kugwerhe bunguke buci? Bulya nkaba kwoshi, akaba n'omurhima gw'obulyalya, akaba n'omurhima nkana, caziga Kristu amanyikane: okwola kwo kunsimisize, kwo kwanashub'insimisa. ¹⁹ Bulya mmanyire oku ebyo byankwanana okuyokola, amahano ginyu garhumiren'olukogo lya Mûka gwa Yezu Kristu, ²⁰ Co ncikubagire ecola, co nangalire: ntako naka bulabula, ci mmanyirebwinja, bunola nka gandi mango goshi, oku nkalama erhi nkafa, Kristu akuzibwe omu mubiri gwani; ²¹ bulya Kristu by'obugumana bwani, n'okufa bw'obunguke. ²² Ci akaba okuyorhana obugumana mw'ogo mubiri kwankarhuma najira omukolo gugwerhe amakwanane, ntabwini ebi nanka cishoga. ²³ Nkulikire bwenene engambo zombi: ncifinjire okucigenderera n'okuba na Kristu, kwo kwakanabire kwinja kulusha; ²⁴ Cikwone ahanyanya zinyu bili binja bwenene ndame omu mubiri. ²⁵ Nnamanyire oku, nayishi lama n'okubera na ninyu, lyo muji mbere munabone obushagaluke omu bwemere, ²⁶ na ntyo, hanongaluka emwinyu, mwayishiba n'erindi igwarhiro ly'okucikungira muli Kristu Yezu. ²⁷ Kwonene, mube n'olugenzi lwinja lw'emyanzi ya kalembe ya Kristu, lyo, nyishir'ibonana ninyu, mbe mbezire kuli ninyu, nanyunve baderhe oku haguma bacishwekire oku murhima muguma, mulwira omurhima bw'Emyanzi ya Kalembe, ²⁸ buzira okucilekerera mwakangwa n'abashombanyi, byobili emwabo cimanyiso c'obuhezi, cikwone mwehe mwacira; ²⁹ n'okyo kurhengine na Nnâmahanga, bulya amujijire olukogo, muli Kristu, c'arhali kumurhanyiza, cikwone kandi kulibula kuli ye, ³⁰ omu kulya yo ne yo ntambala eyo mwabonaga nalwa, n'eyi muyizire buno nayilwa.