¹ Nkahakaba oburhulirize muli Kristu, nkahakaba okuinamulwa omu buzigire, nkahakaba olushange lwa Mûka, nkahakaba oburhulirire n'obwonjo, ² obushagaluke bwani mubucèse, omukubu na nyifinjo nguma, buzigire buguma, oku murhima muguma, ntanya nguma. ³ Muleke okukacigaba mwo mirhwe ibirhi, n'okucikuza, obwirhohye bumujire n'okukabona abinyu nka bobakulu kumulusha. ⁴ Ngasi muguma winyu, ahali hokuganja obunguke bwage yene, asime n'obw'abandi. ⁵ Mubage n'olwifinjo lwali muli Kristu, ⁶ olya, wali lamire omu bworhere bwage nka Nyamuzinda, cikwone abone okulama nka Nyamuzinda karhali kantu kakucishwekera kwo. ⁷ Cikwone acijira busha, acijira nka muja, ashusha abantu; abonekana nka muntu kone omu bandi, ⁸ acirhohya, acijira wakuyunva kuhika afa, afira oku musalaba. ⁹ Co cirhumire Nnâmahanga naye amukuzize, n'okumuha Izino liri enyanya z'agandi goshi, ¹⁰ mpu lyo okw'izino lya Yezu ngasi idwi lifukame e malanga, omw'igulu, akaba ekuzimu, ¹¹ na ngasi luderho luyalagaze oku Yezu Kristu ye Nnâhamwirhu, okw'irenge lya Nyamuzinda Ishe. ¹² Ntanya, bazigirwa bani, nk'oku munayorha mukenga, mukolere oku bucunguke n'oku coba n'okukujuguma, c'arhali kone omukuhaba kwani, ci kwinja kulusha na kulusha amango ntahali; ¹³ bulya Ali Nnâmahanga okajira muli mwe obulonza n'okukola, nko kwalonzize. ¹⁴ Mujire ebintu byoshi buzira midudumo n'okurhindira, ¹⁵ lyo muba beru-kweru na bacèse, mube bana ba Nnâmahanga barhali kwo izabyo omu kagarhi k'iburha libi kwo mulangashana nka rhumole omw'igulu, ¹⁶ muberhule omwanzi gw'obulamu; nayishikacikuza, olusiku lwa Kristu, bulya ntakagi libirhira busha n'oku kolera obusha. ¹⁷ Mâshi ciru omuko gwani gwankabulagwa oku nterekero n'oku ntulo y'obuyemere bwinyu, nsimire nanci shinzire hagamu ninyu. ¹⁸ Ninyu, musime haguma, munacishinge haguma nani. ¹⁹ Nangalire muli Nnâhamwirhu Yezu na murhumira duba Timoteyo, lyo ayishi muheba emisi nani omu kuyiga bilya bimushinganine. ²⁰ Bulya nta gwerhi muntu hano wankabashibirira, akage lwoshi; ²¹ boshi, ntya, banakalwira obunguke kwabo bone, c'arhali bwa Kristu. ²² Mumanyire oku ajijirwe lwiganyo, omu kucihana oku mukolo gw'Emyanzi ya Kalembe haguma Nani, nka mwana w'Ishe. ²³ Ncikebirwe oku namurhumira ye hano mbona akasangi kakwanine kuli nie; ²⁴ na ngwerhe obulangalire muli Nnâhamwirhu nka nie nene nani ayishi ija duba. ²⁵ Ngererize oku kukwanine mbarhumire mwene wâni Epaphrodite, murhabzi wani omogu mukolo n'entambala, oyo ye mwali ntumire mpu antabale omu bulagirire bwani. ²⁶ Bulya alicifinjire amubone mweshi, n'ali wamisi omu byo mwamanyisibwe kw'endwala yage. ²⁷ Ali mulwala, ciru, na hofi hakufa; arhanali yene, ci nani, mpu lyo ntabe n'oburhe oku burhê. ²⁸ Y'oyo murhumirage duba, nti hano mumulola kwo, mucirishagaluka, na nani niene akarhinda kampwe emurhima. ²⁹ Mumuyankirire muli Nnâhamwirhu haguma n'obushagaluke bwoshi, n'oku kenga abantu akage. ³⁰ Bulya kuli oku mukolo gwa Kristu ali hofi ho kufa, ahana obugumana bwage kulibuzibwa omu kurhahaba kwawe omu mukolo mukanjirira.