¹ Mw'ezo siku, basoma omu chitabu cha Musa embere z'olubaga, bashimana bayandikire ok'omu Abamoni n'aba Moabu barhakajire omu ndeko ya Nyamuzinda, ² bulala barhaliyinjir'embere z'abana b'e Israeli n'omugati n'amenji, na bulala balihamagere Balaamu enyanya w'efuranga mpw'abakome; aliko Nyamuzinda werhu ahindamula ogo mwikomo gwaba mugisho. ³ Amango bayunvaga erhegeko, bahiga Israeli oku bundi buko bwali baliri mo. ⁴ Embere z'aho, omudahwa Eliashibi, ajira omu masika ga ka - Nyamuzinda, na muzere wa Tobiya, ⁵ babaga bamurheganyiz'obusika bunene ahakazi rhabik'entulo zage, n'obuku, n'ebintu, chiguma c'ekumi ch'engano, edivayi n'amavurha,bye byalirhegekerwe oku Balawi, abimpiza n'abalanzi b'enyunvi, n'okuba birheganyizwe abadahwa. ⁶ Ntalichiri e'Yerusalemu amango ebyo byoshi byabaga, bulala na baga namagaluka emwa mwami omu mwaka gwa makumi masharhu na kabiri gw' Artazerizeri, mwami w'e Babeli. Obuzinda bw'omwaka, n'ahabwa omwete gwa mwami, ⁷ oku galuka e' Yerusalemu, nabugana amabi Eliashibi abaga ajirire, barheganyiza Tobiya obusika omu mbuga ya ka - Nyamuzinda. ⁸ Nagaya bwenene, na kabula ebintu bya Tobiya byoshi embuga; ⁹ Naderha oku bashukulule obusika, na shubiza mw'ebintu bakolesa omu ka - Nyamuzinda, n'entulo n'obuku. ¹⁰ Nabona okw'Abalawi barhachiihabwagwa echigabi chabo, n'okw'Abalawi n'abimpiza bakazagi jira emirimo ngasi muguma alibirhira omu mashwa gabo. ¹¹ Nakalihira abazuzi bakulu, n'ababwira: Bichi birhumire mwaleka aka - Nyamuzinda? Nashubuza Abalawi n'abimpiza, nabashubiza omu mulimo gwabo. ¹² Ago mango Abayuda boshi bashubirhondera okulerha echiguma ch'ekumi omu nguli y'engano, n'edivayi n'amavurha. ¹³ Nabwira omujinji Shelamiya oku yi wakazi lola eyo nguli, omudahwa, Sadoki, omwandisi, na Pedaya, muguma w'aBalawi, nabayushula ku Hanani, mwene Zakuri, mwene Mataniya,. bulala bali kubagirwe kubali bashinganyanya. Bahabwa emirimo y'okugabira bene babo. ¹⁴ Onyibuke nani, mani Nyamuzinda wani, enyanya w'ebyola, na ntakuyibirira ebijiro byani by'obuchesibwa enyanya w'aka-Nyamuzinda n'ebintu byoshi byalishinganene oku langwa! ¹⁵ Mwago mango, nabona chiro omu Yuda abantu bakazagi kanda edivayi olusiku lw'e Sabato, n'okulerha ebikono, n'okuhesa ba punda emihuli y'engano, n'edivayi, n'amalehe g'Omutini, n'ebintu bizidohere, n'oku biheka e' Yerusalemu olusiku lw'e Sabato; nabayigiriza amango bayinjaga baguza oburhimbuzi bwabo. ¹⁶ Hali n'abantu be Tiro, baliri e' Yerusalemu, bakazi lerha efi n'obundi burhimbuzi bwa ngasi lubero, n'okubiguza Abayuda b'e Yerusalemu omu lusiku lw'e Sabato. ¹⁷ Nakalihira abarhambo b'e Yuda, na nababwira: Bye bichi ebila bijiro bibi mwamajira, by'oku hemula olusiku lw'e Sabato? ¹⁸ Arhali ntya ku bay'isho nabo bajiraga, nakugerera enyanya z'oko kwarhumaga Nyamuzinda werhu arhuheba kwago mahanya n'oku chishagala? Nenyu, muli mwalonza mpu Nyamuzinda ashubi hanyagaza aba Israeli, omu kubihya e'Sabato! ¹⁹ Na ntyo na derha mpu baching'enyunvi z'e Yerusalemu embere z'e Sabato, eri lyabaga golo, n'oku yichingula enyuma z'e Sabato. Na narhabika baguma bw'omu bakozi bani oku nyunvi, mpu ntachindi chintu chijagemo olusiku lw'e Sabato. ²⁰ Na ntyo abokugula n'abarhimbuzi ba ngasi buko bw'ebintu bagera liguma changwa kabiri omu budufu eburhambi bw'e Yerusalemu. ²¹ Nabakalihira, n'oku babwira: Bichi birhumire mwagera budufu embere z'olugurhu? Mukashubi jira ntyo kandi, nji nabagwarha. Na kurhenga ago mango, barhachijiraga ntyo olusiku lw'e Sabato. ²² Nabwira ntyo n'Abalawi mpu bachishukulule n'okuba balanzi b'enyunvi libakengesa olusiku lw'e Sabato. Onyibuke nani, mani Nyamuzinda wani, enyanya wa ntyo,n'oku ndanga kugerera n'olukogo lwawe lunene. ²³ Mwago mango, nabona Abayuda bali bashabire omu Baasidodi, Abamoni, Abamoabu. ²⁴ Banene omu bana babo babaga bakola baderha oluderho lw'aba Asidodi, barhali chimenyere echi Yahudi; bali menyere enderho z'embaga z'emahanga zonine babaga bakala bayinji. ²⁵ Nabakalihira, nanabakoma; chiro n'abandi nabashurha, nabagugula enviri, nanabagasha embere za Nyamuzinda, nababwira: Omusezi murhachishubiriraga mwashabisa bali benyu oku bantu b'elwahanda,na bagala benyu nabo barhachishabiraga elwahanda. ²⁶ Oko kokwarhumaga mwami Sulemani w'e Israeli ahemuka ? Omu bami boshi b'e mahanga ntaye walimuhikireko, arhonya emwa Nyamuzinda wage, Na Nyamuzinda amuyimika omu Israeli moshi; lero enyuma, abahya b'emahanga barhuma aja omu chaha. ²⁷ Kukwanene mbamenyese oku mwajirire amabi manene n'oku murhachishinganene embere za Nyamuzinda oku shabira emahanga? ²⁸ Mwene Yoyada muguma, mwene Eliashibi, mudahwa mukengwa, aliri muhunga wa Sanibalati, w'omuhoroni.lNamuhiga aje hale nani. ²⁹ Obayibuke, mani Nyamuzinda wani, bulala bahezeze obuchesibwa n'echilagane bajiraga haguma n'abadahwa n'Abalawi. ³⁰ Nabashukululu kw'ebi bakulaga ehanga, nagalulira abadahwa n'abalawi, ngasi baguma n'emirimo yabo, ³¹ Narhabika abakazi lola entulo z'eshali amango gashinganene, n'emburho ntanzi. Mani Nyamuzinda wani onyibuke kwebi byoshi nakolere onankombere bwinja!