¹ Yubu ashuza Nahano n'okuderha: ² Menyere oku wa kajira byoshi, na ntaye wakakurhagana oku nkengero zawe. ³ Nde oherhe sire ly'okuyiza ebyani na jira? Nechi, naderha, buzira okubayunva, ebinja bintalukire n'oku nta kagala kubijira chiro. ⁴ Onyumvirize, nji nakushambalira, nji nakudosa, na nji wananyingiriza. ⁵ Okurwiri kwani kwaliyumvirhe bakuderha; Aliko lero elisho lyani lyali kubwene. ⁶ Che chirhumire na chinja lubanja na mpugame oku kachulo n'okuluvu. ⁷ Enyuma Nahano abwira Yubu eyi myazi yage, abwira Elifazi w'e Temani: Oburhe bwani bwakolerere enyanya zawe n'enyanya za bera bwawe babiri, bulala orhaderhaga enyanya zani haguma n'obushinganyanya bwani nk'okuna jiriraga omukozi wani Yubu. ⁸ Murhole mpanzi mushanvu n'abishakalume mushanvu, mugende emw'omukozi wani Yubu, mu murhulire enterekero. Yubu, mukozi wani, abahunira, na kugerera emunda ali yenine njita chibajirira kukulikira n'esire lyenyu; bulala burhaderhagaenyanya zani haguma n'obushinganyanya bwani, nka kulala ajiraga omukozi wani Yubu. ⁹ Elifazi w'e Temani, Bilidadi w'e Suwaki, na Sofari w'e Naama bagenda n'okujira nk'oku Nahano aba bwiraga: na Nahano ayunva amahuno ga Yubu. ¹⁰ Nahano akwiza Yubu nkw'okwali bwambere, amango Yubu ahuniraga bira bage; Nahano amuhereza kabiri oku byaliherhe byoshi. ¹¹ Bene babwo, bali babwo, na bira bamira ba Yubu bayinja mulambagirira, balya haguma naye omu nju yage. Boshi balemaga bamulakira n'oku murhuliriza nk'obw'obuhanya boshi Nahano ajiraga mpu bumujeko, na ngasi muguma omuhereza efuranga n'olupeta lw'ehoro. ¹² Nahano agisha Yubu oku kalamo k'emyaka, yage mizinda kulusha eye mbere. Ashweka bibuzi bihumbi e kumi na bine, ngamiya bihumbi ndarhu, chihumbi ch'enkavu, na punda z'echikazi chihumbi. ¹³ Aburha barhabana mushamvu na banyere basharhu: ¹⁴ Omwali mwambere omuyirika ezino lya Yemima, n'owa kabiri erya Kesiya, n'owa kasharhu naye ezino lya kerina-Hapuku. ¹⁵ Omu chihugo choshi murhabonekaga abandi bakazi balushire abola banyere ba Yubu. Eshe abahereza echigabi oku kashambala kage, kuguma na basheja babwo. ¹⁶ Enyuma lyahola Yubu achilamira myaka egana na makumi mane, abona oku bana bage, na bana ba ba bagala bage kuhika oku burha lya kane. ¹⁷ Na Yubu afa mushaja eri ayugurhire esiku.