¹ Chirhumire Ogala-Byoshi nta mango gaba abikire, na chirhuma abamuyinji barhabona esiku zage? ² Banakula olubibi, banayiba obuso, n'okubulisa; ³ Banaheka endogomi ye fubi, enkauu y'omukana banayirhola chikinja; ⁴ Banashunika abakene omu njira, banaseza abagunda boshi bw'omu chihugo bachibishe. ⁵ Lolaga, nka punda z'elubala omu mpinga, zanahuluka esezi zajilonza obwasi, baherhe empinga zonine mu balonzeza ebiryo by'abana babo; ⁶ Banacha ebyoshi bya yorhaga omu mashwa, n'okuhumbula emizabibu y'omubi; ⁷ Banalala butambara omu budufu, barhaherhe echi bayambala, Nta bulingirhi enyanya w'emboho. ⁸ Barhulwa n'envula y'omu ntondo, bana chigonyera omu bale nka hantu h'oku chibisha. ⁹ Banakule efubi oku bere, banarhola echikija enyanya z'abakene. ¹⁰ Banalema bagenda boshi busha, buzira mushangi, baliri shali, banaseza omugozi omu nda. ¹¹ Banalema bajira amavurha omu byogo by'omubi, n'okukanda emikenzi, n'eyorha yiyana bagwarha; ¹² Omu bishagala balemaga bayisa nka mifu, n'omurhima gwalumwa n'okubanda endulu na Nyamuzinda arhahuliganaga kw'agola mabi goshi! ¹³ Abandi bali bashombanyi bw'obuche, barhanayinji enjira zabo, barhanagera omu mihanda yabo. ¹⁴ Echishambo chinazuka lumbulimbuli, anayirha omukene n'omushangaga, n'oku shambuh'amango g'obudufu. ¹⁵ Elisho ly'omuhushi lyanalema lya husa omu kulonza okuchibisha; ntaye nji wabona, n'okuderha, n'okuheba echitambara omu malanga gage. ¹⁶ Obudufu banajichinguz'omunju, ezuba banachichingira. ¹⁷ Kw'abola, esezi gw'amango ch'echichu ch'olufu, bayibuk'amabi gabo goshi. ¹⁸ Ngurhe! Omubi arhazidohere bwenene nyanya w'amenji, n'echigabi akagwarha oku gulu kuli muvumo, arhakabona enjira y'omuzabibu! ¹⁹ Nka kula echanda chiyumya amenji g'olubula, ntyo kw'eshinda emira abanya byaha! ²⁰ Gurhe! Ebere lyabayonsaga lyaka muyibirira, emivunyu yanabajira chavu, nta kuchimuyibuka! Omubi banauchamo nka murhi, ²¹ Olala onyega omukazi w'enguba n'olala orhajira mwana, Olala orhalaga n'ebinja bajirire omukana. ²² Nanga! Nyamuzinda oku misi yage anayushula esiku z'ababi, anabayumanza amango barha chiherhe obulangalire bw'akalamo; ²³ Anabalanga n'oku bah'obulangalira, mesho gage gaba gali oku njira zabo. ²⁴ Baliyumangire; n'oku hi chanji hityu eri barhachiriho, bakumbagala, bafa nka kulal'abantu boshi, bachibwa nk'amarhwe ga nguku. ²⁵ Akaba arhali ntyo, nde waderha mpu kubesha na beshere, nde nji wahindamula mpu emyazi yani eri ya busha?