¹ Musa ashubiza mpu : Barhanyemera, barhayunva omulenge gwani, s'aliko baderha oku Nahano arhakubone keraga! ² Nahano amubwira: Chi echo ofumbarhire omu fune? Naye ashubiza mpu : Karhi. ³ Nahano amubwira: Kakweb'oku daho. Akakweba oku daho: Akarhi kahindamukaka njoka, Musa ayaka. ⁴ Nahano abwira Musa: Lambula okuboko, oyigwarhire oku hunga! Alambula okuboko, ayigwarha: Eyo njoka yashubihindamuka karhi omu fune zage. ⁵ Li bayemera oku Nahano akubonekere, Nyamuzinda wa b'eshe, Nyamzuinda wa Aburahamu, Nyamuzinda wa Isaka, Nyamuzinda wa Yakobo. ⁶ Nahano ashubi mubwira: Hira efune omu mabere yawe Ahira efune oku mabere anazigalula. Okuboko kwage kwayunjula bibenzi, kwahindamuka mweru-mweru nka lubula. ⁷ Nahano amubwira: Shubiza okuboko kwawe oku mabere. Ashubiza okuboko oku nda anakugalula; kwali kwamashubiba nk'ebindi bigabi by'omubiri gwage. ⁸ Nahano: " Akaba barhakuyemerere n'akaba barhayunvirize omulenge gw'echimenyiso chambere bayemera omulenge gw'echimenyiso cha kabiri. ⁹ N'akaba barhayemere ebyo bimenyiso bibiri n'akaba barhayunvirize omulenge gwawe, wanarhola amenji g'omulwinji, ogashandaze oku daho; ago menji warholaga omu lwinji gahindamuka shagama oku daho." ¹⁰ Musa abwira Nahano: " Onfe lukogo, yagirwa Nahano, omenyere oku ntenji kuderha ebi bichanji byoshi oli waderhes'omwambali wawe, obunu bwani buba buzidohere n'olulimi lwani lurhahundula." ¹¹ Nahano amubwira: " Nde wahaga omuntu obunu? Nde odumya omuntu eri oku mujire chihuli, amujire wa kubona eri muhurha? K'arhali Nyono Nahano? ¹² Obangulage,ogende naba haguma n'obunu bwawe; nakazikurhabala n'oku kuyigiriz'ebi okwanene okuderha. ¹³ Musa ashubiza: " Onfe lukogo, yagirwa Nahano, orhume owundi olonzeze!" ¹⁴ Aho Nyamuzinda agayisibwa na Musa, amubwira: Ka mukulu wawe Haruni w'omulawi arhaliho? Menyere oku yewe ayinji derha. Chiro y'oyu oyinjire kukulamusa, na hanoakubona, asima omu murhima gwage. ¹⁵ Oyinji mushambalira, onahire eyo myazi omu bunu bwage. Nani naba n'obunu bwawe n'obwage. Nabayigiriza ebimwajira. ¹⁶ Ye wakazi shambaza olubaga ahali hawe, ye waba bunu bwawe, nawe obe nka Nyamuzinda wage. ¹⁷ N'aka karhi, okafumbarhe, ka wakazijiramo ebisomezo. ¹⁸ Musa agenda, ashubira emw'eshezala Yetero amu bwira: Nkwanene nshubire emwa bene berhu bali e'Misiri, njilola eri bachibamo omuka. Yetero ashuza Musa mpu: Ogende n'omurhula! ¹⁹ Nahano abwira Musa e'Mediyani: " Bangula, oshubire e'Misiri bulala bala boshi bakazagilonza okukuyirha bafire. ²⁰ Musa arhola mukage n'abagala, abashoneza oku farasi, ashubira omu chihugo ch'e'Misiri. Kala karhi ka Nyamuzinda, Musa akafumbarha. ²¹ Nahano abwira Musa: Obu ashubira e'Misiri, obuhashe bwa bila bisomerene byoshi nakuahaga, obujirire embere za Farao, nani narhundisa omurhima gwage, arhalika olubaga mpu lugende. ²² Ojibwira Farao ku Nahano aderhere ntya: Israeli ye fula yani; ²³ Nku bwirire: " Lika mugala wani ajinkolera, nawe wamalahira bwamulika! Koko, nani nkola nayirha efula yawe!" ²⁴ Mpu bahika omu njira aha balyama, Nahano ashonda oku muyirha. ²⁵ Sipora arhola ebale oku likalihire, akembulamo omugala, orhola echishisha, achigeza oku magulu ga Musa, aderha: " Shagama nguma rhwembi!" ²⁶ Nahano amuleka. Omu kuderha: " Shagama nguma rhwembi", bukembule aderhaga. ²⁷ Nahano abwira Haruni: " Bangula, obugane Musa omu mpinga." Agenda, amubugana oku ntondo ya Nyamuzinda, amuhobera. ²⁸ Musa ashambalira Haruni emyazi yoshi Nahano amubwiraga mpu ajiderha n'ebisomezo byoshi amurhegekaga mpu amujirira. ²⁹ Musa na Haruni bagenda kushubuza abagula ba bene Israeli boshi. ³⁰ Haruni ashubiderha ela myazi yoshi Nahano abwiraga Musa, anajirira ebisomezo omu mesho g'olubaga. ³¹ Olubaga lwayemera. Lwayunva oku Nahano agashanire bene Israeli n'oku anabwene amalibuko gabo, bafukama, baharamya.