¹ Musa aliyabwire obuso bw'embuzi z'eshezala Yetero; mudahwa w'e Mediyani. Alongola n'embuzi hale omu mpinga, ahika oku ntondo ya Nyamuzinda e Horebu. ² Malayika wa Nyamuzinda amubonekera omu ngulumira y'omuliro yaliherhe yakolera omu karhi k'eshaka. Musa alolereza, abona eshaka ligwerhe lyagulumira, chirhasingonyoka. ³ Musa achiderheza: Nazunguluka ndole zakaba nkengero zichi zinganaha: Bichi birhumire eri shaka lirhanagwerhe lyasingonoka. ⁴ Nahano abona oku ayinja azunguluka mpu alole; lero Nyamuzinda anachimuhamagala omu kagarhi k'aliry'eshaka eri : << Musa, Musa!>> eri << Karame! >> ⁵ Aderha eri : << Omenye wakagera hano! Hogola ebirato byawe omu magulu, bulala hanola hali hantu hachesibwa. ⁶ Ashubiderha eri: << Nye Nyamuzinda wa Isho, Nyamuzinda w'Aburahamu, Nyamuzinda wa Isaka, Nyamuzinda wa Yakobo. Musa achishukira amesho, bulala aliyobohere okulolaku Nyamuzinda. ⁷ Nahano aderha : kubinali na bwene amalibuko g'olubaga lwani luli e'Misiri, nayunvirhe n'endulu lugwerhe lwaband'embere z'abaherhe balulibuza. Nechi, menyere amalibuko machi lulimo. ⁸ Cho chirhumire nayandagala mbalikuze omu maboko g'abanya-Misiri; mbakule mwechi chihugo, mbaheke omu chihugo chikwirire chinagalihire, omu chihugo chahululamw'amarha n'obuchi, omu chihugo chibamo AbaKanana, Abahiti, Abamoriti, Abaperizi, Abahivi n'Abayebusi. ⁹ Na bulal'endulu za bene Israeli zampikireko, bulala na bwene gurhe abanya Misiri bagwerhe babablibusa. ¹⁰ Yumukaga, ogende; nkurhumir'emwa Farao nti ogendekul'olubaga lwani lwa bene Israeli e Misiri.>> ¹¹ Musa abwira Nyamuzinda, eri: Ndi muntu muchi nani obwo naj'emwa Farao, nkule olubaga lwa bene Israeli e'Misiri? ¹² Nyamuzinda amubwira, eri : Ndi haguma nawe. Talaga n'echimenyiso oku nye nkurhumire: Hano oba wakula olubaga e'Misiri, nji mwakolera Nyamuzinda kw'eyi ntondo. ¹³ Musa abwira Nyamuzinda : Nkala nachibanda hali bene Israeli, mba bwire mpu : Nyamuzinda wa bayisho antumire emunda muli. Aliko, bakadosa, Ezino lyage, gurhe mbabwirage? ¹⁴ Nyamuzinda abwira Musa, mpu: NYE NYAMUBAHO. Ashubi yushula: Oyinjibwira bene Israeli, mpu: Ollala ontumire emunda muli. ¹⁵ Nyamuzinda ashubi bwira Musai: Nj'obwire bene Israeli ntya: Nahano, Nyamuzinda wa bayisho, Nyamuzinda wa Abrahamu, Nyamuzinda wa Isaka, na Nyamuzinda wa Yakobo, antumire emunda muli. Elyo ly'Ezino lyani emyaka n'emyaka, bakazimpamagalamo kurhenga oku burha kuja oku lindi. ¹⁶ Ogende oshubuze abagula ba bene Israeli boshi, obabwire: Nyamubaho, Nyamuzinda wa bayisho, Nyamuzinda wa Abrahamu, Nyamuzinda wa Isaka, Nyamuzinda wa Yakobo ambonekere; ambwira : Mbamenyisize bulala na bwene amabi goshi bagwerhe babajirira e'Misiri. ¹⁷ Che chirhumire naderha mpu: Nabakula omu malibuko g'e Misiri, mbayinamulire omu chihugo ch'Abakanana, chAbahiti, ch'Abamori, ch'Abaperizi, ch'Abahivi, ch'Abayebusi, omu chihugo chihulula mwo amarha n'obuchi. ¹⁸ Bayunve omulenge gwawe, oyinji genda n'abagula ba bene Israeli, oje emunda mwami w'e'Misiri ali, mumu bwire, mpu: Nahano, Nyamuzinda w'Abayahudi arhubonekere. Bunola orhulekage, rhugende lugendo lwa siku esharhu omu mpinga, rhurhulire Nahano Nyamuzinda werhu entulo. ¹⁹ Aliko menyere oku mwami w'e'Misiri arhabayemerera mwagenda, akaba arhasezibwe n'okuboko kw'emisi. ²⁰ Nkola nalambula okuboko kwani, nshurhe Misiri n'ebisomerene najira eyo. Enyuma ly'oko, anabalika mugende. ²¹ Narhabala olu lubaga na ndurhonye emwa Abanya Misiri, li hano mugenda, mulekigenda maboko mumu. ²² Ngasi mbuguma eheme omwalungwe wage n'omuhisi oli omu mwage ebintu by'amarhale, eby'ehoro n'emyambalo muyambise bagala benyu na bali benyu. Mutungule ntyo abanya Misiri.