¹ Musa azamuk'omu mashwa ga kadekerera k'e Moabu oku ntondo Nebo, oku busoso bw'e Pisga, hofu n'e Yeriko. Na Nahano amuyerek'echihugo choshi : Gileadi kuhik'e Dani, ² Nafutali yoshi, echihugo cha Efurahimu n'echa Manase, echihugo choshi cha Yuda kuhik'ewa nyanja nkulu yewakulya kw'ezuba, ³ ewa bushoshokero bw'ezuba, eburhambi bw'e Yordani, olubanda lw'e Yeriko, echizungu ch'engazi, kuhik'e Zoari. ⁴ Nahano amubwira : Echo che chihugo na chigashaga mpu njinaha Abrahamu, Isaka na Yakobo, omukuderha : Njina chiha eburha lyawe. Njinakuyerekacho n'amesho gawe; aliko orhakachihikamo. ⁵ Musa, mukozi wa Nahano, afiraho, omu chihugo cha Moabu, kugerer'omwazi gwa Nahano. ⁶ Na Nahano amuhamba omu lubanda, omu chihugo cha Moabu, hofu n'e Beti- Peori.Nta muntu wamenyer'eshinda yage kuhika zene. ⁷ Musa aliri wa myaka egana na makumyabiri amango afaga; n'okubona kwage kurhalizi kuhuma, n'emisi y'omubiri gwage erhalizi kukeha. ⁸ Abana be Israeli balakira Musa siku makumi masharhu, omu mbanda z'e Moabu; na mwezo siku z'okulaka n'ezemishibo ya Musa zahik'oku buzinda bwazo. ⁹ Yoshuwa, mwene Nuni, aliri ayunjwizwe n'omuka gw'obwenge, bulala Musa abag'amulambulire kw'amaboko gage. Abana be Israeli bamukenga, n'okukeng'amarhegeko ga Nahano ahaga Musa. ¹⁰ Ntaundi mulebi waboneken'omu Israeli oli nka Musa, eyi Nahano aliyinji masu oku masu. ¹¹ Ntaye chintu chakalinganyizwe mpu n'ebijiro byoshi n'ebisomezo bya Nyamuzinda amurhumiraga mpwa jir'omu chihugo ch'e Misiri enyanya wa Farao, enyanya wa bakozi bage n'enyanya w'echihugo choshi, ¹² n'oku bisomezo byoshi Musa ajiraga n'okuboko kwage kw'emisi omu mesho ga ba Israeli boshi.