¹ Bwenwe balume, bawehe bacha benyu biya bya kiine na bibenju, na mumane ugana nabenwe muli na Mlumyenu haguli. ² Shamwe m'nda mwa usaba, na uyesha na buswachi. ³ Iyaka m'tusabila na beswa wa Abetcha atubugulile michango bululi tulisambe mwano kwetu na ubasambila lubisakulu lwa Keleshito yulu yage nene nihambilwe m'mihambo. ⁴ Sabwe bulule nawatilichiwe ulisamba mwano wa hululu nahi byandi hubenja udogoma. ⁵ Giwe wa lwenguu baya bene bali hambuga, na uhogononya mengu menyu. ⁶ Binwa byenyu bibe bya keene masugu mose, bibe gilogu miinyu, na umana ugaa mtugegese. ⁷ Tikiko mshiwetu mmunjwa, mgichi m'bwilile, mgichi nanyi wa Mlume, gwimsambila mwano gwanyi gose; ⁸ noo gwandahila wenyu wa yulu yoka iyo, bululi mimane myano gyetu, nage gwimmungya mitima gyenyu; ⁹ hamwechi na Onesimo, mshiwetu m'bwilile, mmunjwa, gee ii mtu gwa wenyu. Babo bimsambila byose bya hano hetu. ¹⁰ Aristarko, guhambilwe hamwechi nanyi, gwagana salamwa; na Marko mmwabo na Barnaba, mine gwamuhuliche mwano gwage ; gabehiya wenyu mumgae. ¹¹ Na Yesu gulihugiswa Yusto; babo noo batu ba ugya kumbi. Iyaka babo boo buchima ii bagichi ba mgilo hamwechi nanyi yulu ya buolo bwa Abetcha; nabo babele mmungyo wandi. ¹² Epafra, mtu gwa wenyu, mcha gwa Yesu Keleshito, gwagana salamwa,gusugila wa shigilwe masugu mose yulu yenyu na hesusaba, bululi mugimane ba bawilile na ugolowa abisa ii luundo lose lwa Abetcha. ¹³ yulu nihusamba ugana gwina bichigililwa biingi yulu yenyu, na wa baya bene bali Laodikia, na wa baya bene bali uya Hierapoli. ¹⁴ Luka, guya ng'anga mmunjwa, na Dema, bagana salamwa. ¹⁵ Salamwa u bashiwetu bene bali uya Laodikia, na Nimfa, na ihwilo yine ili mndu gyage. ¹⁶ Mkanda guno gwahuhwa usomwa wenyu, muite iyka gusomwe mlubunga lwa ba Laodikia; na guya gwa ba Laodikia gusomwe nenyu. ¹⁷ Mumsambile Arkipo, gagulole guya mgilo golihelwe na Mlume , na ugugile. ¹⁸ Salamwa gwanyi nene Paolo, wa uboo wanyi nene mine .Engelechiwe uhambwa wanyi. Keene na chibe hamwechi nenyu.