¹ Mbuse e sabata, la hilihili e lisio la poo e poso, Maliya Magadala la moliya weeti wakeeli odhendji mbila. ² Eho dhenda! mbume edudumali makasi meenene, laate ahumbwa e Mwengei alongwali likolo, ayadjimbia, agulia libhukeli liwoso e modhuhe mo mila, ayabatia likolo la ho. ³ Ndenge ende edjakali nda abalimani, pe wisindje wande ebubali nda mapata. ⁴ Wasindjili wangilimali la owangi, waumali nda wagui. ⁵ Ase ahumbwa ehoo awawongoselali wali waho ate: Otiwangeni, laate eyewi ate okolukakani Yesu, ongo omobakali oyo. ⁶ Ati alandjo laate asusoigaa, nda eyasali inde. Djakani odhenge ebete Likumu alangalali. ⁷ Ase kekeni galagala pe walehela watutiani wande ate asusoi. Aki liwoso la nu la Galileya. Ongo nde okomoeneni ino. Meemene isilisiga oowaselini. ⁸ Walongwali obangu la mbila, la owangi la mwemu sungu, wakeeli obangu owasumbeli watuatiani wande mboli. ⁹ Dhnda! Yesu agbotonia la iwo pe awaaselia: mbaa! wadjali wamohelia mangbanda pe wakuya mauli liwoso lande. ¹⁰ Ndjingo Yesu awahaselia ate: oyiwangeni! kekeni owasumbeli wamanima wa mbai mboli, ate wakee a Galileya laate ongo wakohene ¹¹ Ango edjakiyo iwo la mboka, weeti wasindjili walingelali la gbata, wawasumbelia wiloko wa wanganga Mwengei sambo kpa ekelamali. ¹² Mbuse e waabondji la wiloko la olingeli likita, waahali wasoda makuta masungu. ¹³ Ase wawaselia: asani ate watutiani wande wadjaali oyiwi wenge ndji iso todjei la ilo. ¹⁴ Inga ewuma la matoyi ma likumu e gbata, tokomondimisa alidji tokokela ate watootungeseni. ¹⁵ Ndjongo watotali wambele eho ewibende pe wakelali ndi nda ewatiesakolali iwo; pe loi luhoo esombali atie wa yuda tee la lisio la keke. ¹⁶ Kaikowase, watuitiani liomo la esi wakeeli la Galilaya a mokoli enge Yesu awa wunelali iwo wagbotone. ¹⁷ Ango emoenia iwo, wamomayelia mauli sese kasi wadji wakokiali. ¹⁸ Ase Yesu ayandongbali pe akpomesali la iwo, aasia: wahekeli mbai okumu kpaa e likolo pe la mbume. ¹⁹ Eho lenge, kekeni pe owumeseni wato wa miki kpa watutiani wa mbai, owapateseni la kombo e wawa pe la mana pe elimo satu. ²⁰ Watiesakolani watose sambo kpaa enge oyohekelini. Pe dhenda! edjei la ino tee gboo e moki.